شەمال ئاکرەیی
پشتی بۆ چەند هەفتییان، مە ب رێکا چاتێ هەڤدو باش نیاسی، من زانی کا چەند یا ب زەحمەتە ژ مال دەربکەڤیت لێ ئەز هەر بێهیڤی نەدکرم. ل پشتی نیڤرۆیەکا زوو، نامەیەک ل مەسنجەری بۆ من هێلا بوو ونڤیسی بوو: “ئەڤرۆ دەلیڤەکا باش مە یا هەی، دێ ل دەمژمێر 4:00 چمە کلینیکا نۆژداری و تو ژی ل فلکا هەسپا ل سەر جادەیا دچیتە زەری لاند ل ژڤانێ من بە، دێ نۆژداری بینم و هێم”.
بێهنخوەشترین گولاڤ من ب خوە داکر، رندترین جلک من کرنە بەرخوە، من هزرا خوە د جوانترین رستە و هەڤۆکان دا کر دا کو د ڤێ دیدارێ دا ئاراستەی وێ بکەم. دا ژ بیر نەکەم، من قەفتەکا گولان ژی بۆ کڕی، هەرچەندە من هزرا هندێ نەکر دێ ب چ بەهانە وان گولان ل گەل خوە بەتە مالێ.!
وەکو هەموو وان کەسێن ل هیڤیا ژڤانەکێ ئەستەم، من ل گەل خوە گۆت: “ئەرێ راستە خەون دێ بیتە ڕاستی؟”..
د ترۆمبێلێ دا ل بەندەمانێ مام، پشتی من جامێن دەرگەهێن ترۆمبێلێ ڤەکری هێلاین و دویکێلا جگارەکێ و ئێکا دی و ئێکا دی ژی دای بای، هەر ب خەیال ئەز یێ هزرا وێ گاڤێ دکەم کو ژ کلینیکی دەردکەڤیت و بەرەڤ من ڤە دهێت، ئەز یێ ب باوەرم دێ ترۆمبێلا من ناسکەت چونکی من رەنگ و جۆرێ وێ گۆتبوونێ.
ژ خافلەتی ڤە و پشتی نزیکی دەمژمێرەک و پازدە خۆلەکان، من دیت یا خوە ب چاکیتەکێ ڕەش پێچای و شالەکا سۆر یا ل گەردەنا خوە ئالاندی و یا بەرەڤ ترۆمبێلێ ڤە دهێت.
دەرگەهێ ترۆمبێلی ڤەکر و سووار بوو، ئێکسەر گۆت بهاژۆ، هندەکێ ژ ڤێرێ دوور بکەڤە.. دنیا هندەکێ تاری بوو بوو و بارانەکا هوور دباری، من ژی بێ دودلی بەرەڤ ژووردا ترۆمبێل هاژۆت و من دیت جادەیەکا ڤالا و تاری ل وێرێ هەیە، من ترۆمبێل ڕاگرت، ژ هژمەت و خەریبیێ دا من نەکرە نە مەردی و من لیڤێن خوە بۆ جۆت لێڤێن وێ برن و ب ماچەکا ژ دل لێڤ لێ مێتن.. هندی وێ کر و نەکر و بزاڤا رەدکرنا من دا و د گۆت نە.. نە لێ؛ نە خێر من لێڤ هەر بەرنەدان.
من سووراتییەکا گەرم تام کر، پشتی لێڤێن من شل بووین، من رۆناهییا ترۆمبێلێ هەلکر.. و ب کلینیکسەکێ لێڤێن خوە سترین، من دیت کو کلینیکس یا سۆر بووی! من گۆتی: ” دینێ ما تە چەند سۆراڤ د لیڤێن خوە دایە؟”. گۆت: ” من هەر سۆراڤ بکار نەئینایە!؟”. ” پا ئەڤە چ سۆراتییە؟!.. تیق تیق کرە کەنی و گۆت: ” دلێ من، ئەز ل کلینیکا نوژدارێ ددانا بووم و من ددانەکێ خوە یێ ئیناتیە دەر![1]
Dieser Artikel wurde in (کرمانجی - کوردیی سەروو) Sprache geschrieben wurde, klicken Sie auf das Symbol
![](https://www.kurdipedia.org/images/flags/ku.png)
, um die Artikel in der Originalsprache zu öffnen!
ئەڤ بابەت ب زمانا (کرمانجی - کوردیی سەروو) هاتیە نڤیساندن، کلیک ل ئایکۆنا
![](https://www.kurdipedia.org/images/flags/ku.png)
بکە ژ بو ڤەکرنا ڤی بابەتی ب ڤی زمانا کو پی هاتیە نڤیساندن!
Dieser Artikel wurde bereits 1,520 mal angesehen
Schreiben Sie Ihren Kommentar zu diesem Artikel!