باخچێوە بېگەرد
نویستەی: میرزا ئۆلقاڎرو پاوەی
بەشۍ: چل و هەشتەمە
جەو دما، حەزرەتو نووحی سەرزەمینش ملو نەوەکاشەرە بەشکەرد. هەر قسمێش دا بە کوڕێش، ئاڎییچی هەریۊشان بیۍ با خاوەنو مەملەکەتێ، تەشریفشان بەرد پەی سەرزەمینو وېشان کە تاتەیشا پەی دیاریکەردېبېنۍ، ئاوەڎانەشا کەردۆ.
جەو دما، وە شاڎ، دونیای قەوم تەمام
بەخشا، وە (یافت) ، چەنی (سام) و (حام)
ڕوبعی مەسکوون، گرد چوون خوردمەندان
کەردش وە سێ قسم، داش وە فەرزەندان
سام، چوونکم ئەرشەد، ئۆ لادی وېش بۍ
نووری موحەممەد، موستەفا، پېش بۍ
شەریفی قاپی، شای، لەم یەزەل، بۍ
ڕەسوولی ڕەسوول، زادەی مورسېل، بۍ
وەلیعەهدی نووح، واڵا سیفات، بۍ
نادرەی نەدیم، ڕووی سەر بیسات، بۍ
ئایلەم، شام، جەزیرەی ئێراق
فارس، خوراسان، تاکو نیمە ئافاق
نېسفێ، بەل فېشتەر، جە دنیا تەمام
ڕوم و عەرەب، گرد کەرەم کەرد وە (سام)
زنج، تاکو مەغریب، هەم حەبەشە و هیند
بیلاد بیلادان، تاکو ئەقلیمی سەند
باقی گرد یەکسەر، کەرەم کەرد وە (حام)
باقی ئەقالیم، هەر چی، مەند تەمام
سەقلاب، سەرانسەر، تورکستان چین
بەخشا، وە (یافت) ، تاکو مەغریب زەمین
جە نۊ خوڎاوەند، دانای، لا یەنام
نۊ فەرزەندی پاک، عەتا، کەرد وە (سام)
ئەوەڵ، (ئەرمەخشە) ، ئەبولئەنبېیا
دوەم، (کەیومەرث) ، ئەبولپادشا
ئەسوەد) و (یەفن) و (یورج) و (لاود) )
عیلمی (ئېرەم) ، (یۊر) ی ساحیب جود
(بەیافت) یازدە وە (حام) بەخشانۊ
جېیابین جە هەم، گرد گرۊ گرۊ
هەر یەک وە جایێ، تەشریف بەردشان
هەر کام ئېقلیمێ، ئەحیا کەردشان
دیسان دنیای دوون، تیپ تیپ و تەوق تەوق
مەعموور بی، تەمام، جە کرۊی مەخلووق
سا نووح، عەمری وېش، پەی ڕەزای باری
سەرفش کەرد، نە ڕای، تاعەت گوزاری
خولاس، بی جەددی سێ قەومی بەڎ ئەدېش
دەس کەرد، وە تەوبیخ، ئۆ لادانی وېش
عومری شەریفش، وەبۍ قیل و قاڵ
یاوا، وە نۊ سەڎ، چەنی پەنجا ساڵ
[1]