داستانۊ حەیدەری و سنۊبەرۍ
بەشۍ شەس و ششەمە
هەواڵو کۊشیای قەزەنفەری بە شاری یاوا، کەسوکارش گرد ئاما، شار شڵەژیا، شاهەنشاو کشمیری ئا هەواڵەشە پەنە قبووڵ نەکریا، بە لەشکەری فەرمانشدا، کە وېشان ئاماڎە کەران و تەدارەک کۊکەراوە، واتش: هەرکەسێ سنۊبەرە و حەیدەر پەی من بارۊ، بە گەنجێ فراوان خەڵاتش کەروو:
خەلایېق جۊشا، غەوغا کەفت نە شار
بەردشان خەبەر، پەی لای شەهریار
شا، وات؛ یە بیسات، ئێرانییانەن
ئینە دۊستەکەی ماهی تابانەن
فەرما، دەر سەعات، جاڕچی کەفت نە شار
جاڕ کېشان، تەمام، لەشکەر بیی سوار
هەرکەس کاسەی ئاو، پادشا واردەن
سوار بۊ، ئارۊ، واڎەی نەبەردەن
شا، وېش، بەرئاما جە شاری کشمیر
چەنی سەڎ هەزار، سواری دلېر
بە تاو، ڕوو نیان، وە ڕاگەی ئێران
بەڵکم بیاوان، بەو ماهی تابان
تا، یاوان، وە پای سەوزە سەراوێ
ئەسپێ دین، تەنیا، کومیتە، ئاوێ
چەنی یەک کومیت، لەجامەی زەرکار
مەگېڵان وەناو، چەشمە و مێرغوزار
زانان بە تاقی، ئەسپی یارانەن
ئەسپی ئێرانی و ماهی تابانەن
شا، وات، بە جاڕچی، واچە بە لەشکەر
هەرکەس باوەرۊ پەرێم سنۊبەر
چەنی ئەو جوان، دلېری ئێران
مەبەخشوو پەنەش، گەنجی فراوان
لەشکەر ئېد ئەژنی، ئامان وە هەمدا
پۊشان، سەرزەمین، جە تۊز و تەمدا
شریخەی ئەسپان، بسکەی بەیداخان
کېشان، پەی نەبەرد ئەو ماهی تابان
[1]