خانی خاس خەیاڵ شای کەمەر لاڵان
سەرداری سوپای گشت سیاﮪ ماڵان
سینەی کانە گەنج گەوهەر دانەی لاڵ
فەرخوندەی فەڕبەخش سەحرای چەمچەماڵ
ئومێدەن دەوڵەت سولێمانیش بۊ
تەڵای دەس ئەفشار خوسرەوانیش بۊ
ئەژنەفتم نوسخەی کورەی کاسەدەم
یاوان وە خزمەت خانی خاتەر جەم
پرساوی ئەحواڵ لەیلەکەی موڵڵا
لەیل کەس چوون لەیل من نیەن وەڵڵا
بەڵام چی کەرین پەی جوان مەردی
حاسڵ کومراز هەناسە سەردی
دەردی عشق ویردەی خاتر غەمگین بۊ
زەدەی زام وەدەس مەتار جەمین بۊ
جورعەیە نە جام نەو ویردە بۊ
لەیلی شیېوەش کاریش کەردە بۊ
ژەهری ماری دەرد دووریش نۊشا بۊ
بەهرام پەی دوست نمەد پۊشا بۊ
ڕویەوەی سەمەن شەو دێز نماوە
وەو کول کمەیت جیهان پەیماوە
وەو شەوقی شکار غەزاڵانەوە
وەو سەودای سنوور نەوهاڵانەوە
وەو شەعشەعەی ئەسپ خۊش ئاوازەوە
تەشریف باوەردای جە ناسازەوە
بدیای ئەی جەستەی خەستەی هەستیمە
ئەی پەرێشانی ئەی سەرمەستیمە
بپرسای پەی کێن ئەی عەبداڵیمە
ئەی سەرگەردانی و وێران ماڵیمە
ئانە قەیس پەی لەیل من پەی کۍ وێڵم
پەی کۍ وێران ماڵ کەڵپۊس وە پێڵم
وێنەی بایەقوش وە کەژ و کۊوە
پەی کۍ هۆهۆمەن تارو مەبۊوە
وەلحاسڵ تۊمار دڵەی پەڕ دەردم
شەرحی ماجەرای هەناسەی سەردم
بنووسای وزەوخ یەکاویەک فەرد فەرد
باوەڕ داش دڵەش پەی دەردەم وەدەرد
داد لە ڕای بیمون خانی خاس خەیاڵ
یا بە زەبر هوێت بە زەبر گەنج ماڵ
مەلاش شاد کەردای وە دیین مولا
خاستەرەن لە حەج بەینی و بینەڵڵا
مەلا شاد کردای دیسان هەم و هەم
خاستەرەن لە حەج کەعبەی موعەزەم
#مەلای جەباری# [1]