دەسەڵاتو محەمەد یوسف سانی کوڕو ئیسماعیل سانی کوڕو قاسم سانی جە هۆرامان
وەختێ محەمەد یوسف سان ساڵەو (1732ز) ی، بی بە سان و فەرمابڕەواو هۆرامانی، یاساو قانون جابەجا کەرۍ و ستەمو ناداڎیش ناوچەکەنە لابەرد.
عەباس قولی بەگ، وەختێ خەڵاتو نامەو فەرمانو ڕاوەبەری هۆرامانیش ورەت پاڎیی، تەمەنو نەوەڎ و نۊ ساڵینە بۍ، دمای ئانەی کوچی دمایېنش کەرد.
بەعزەجارێ بەخەڵکی واچۍ: من بەڵگەو نەوەڎ و نۊ ساڵەو تەمەنو وېم ئەسان، پېسە تاتەیم و قۆمەکام
تەمەنی ئازیزو بایەخدارو وېم سەرو چېوێ کەم بایەخی و هیچو پووچی، قوربانەو ئی دنیا ڕوشنۍ نەکەردەن.
سەرەتا وەختێ عەباس قولی بەگ، کوڕو عیساسانی ئا کارەشەکەرد، خەڵک واچۍ گېل و نەزانەن، بەڵام جە کۊتانە کارەکەشا بە عال و ژیرانە زانا.
وەختێ محەمەد یوسف سان بی بە سانو فەرمانڕەواو هۆرامانی، تا ماوەو شش ساڵا، بۍ گیر و گرفت و بۍ کېشە هۆرامانش ڕاوە بەرد.
نادرشاو ئەفشاری ئاڎیی فرە خاس ئەشناسۍ و فرە وەشش سیۍ، نازنامو سانە گولانەیش دابۍ پەنە، مەڵامەتو ئانەیچ، گولانەییش بۍ.
فرەوجاری واچۍ: سانە گولانەم پەی چڕدۍ، وەختی ئۍ خزمەتو پاشای، فرە قەدرش گېرۍ.
دوۍ یەرۍ جارۍ کیاستش پەی لاو پاشاو بەغڎای، هەر هەواڵ و قسێوە کە کیانیش پەی پاشاو ئېرانی، بایەخدارەو یاگۍ متمانەی بۍ.
ئەحمەد بەگ کوڕو گەنج عەلی سانی، کە خاوەنو دەگاو (کڵوم) ی بۍ، کوچی دمایېنش کەردەبۍ، جەنازەکەشا ئاردەبێ ڕوەو شارو هۆرامانی، چا ڕوەنە حسێن سان بە سوپێوە گۆرېوە ڕوەو محەمەد یوسف سانی ئامابۍ کە گردو بەگزادەکاش چەنی وېش ئاردېبېنۍ، ڕانە تووششابی بە تووشو محەمەد یوسف سانی و جەنازەکەو ئەحمەڎ بەگی، محەمەد یوسف سان چەنی عەلی بەگی برایش ڕەمێ، عەلی بەگ وېش شاراوەو سوپاو حسێن سانی نیاشا شۊنەو محەمەد یوسف سانی، بە سواری ئەسپێ کە نادر شاو ئەفشاری خەڵات کەردەبۍ، ئا ئەسپە ڕاو مېیانو بەغڎای و هۆرامانی بە یەرۍ مەنزڵۍ بڕۍ، وەختێ یاوا دۊڵەو کونەگای ئەسپەکە سینیش کەردەو مدرا، ئتر سوپاکۍ یاوا سەرش، قوڵبەسشا کەردو گېڵناشاوە، عەلی بەگی برایچش ڕانە گېرتشا، بە قوڵبەسی چەنی چن نەفەرێ ئاردېشا پەی هانەگەرمڵەی، چاگەیچۆ کیاستېشا پەی دیاربەکری، چاگە زیڼانی کریێ، دماتەر عەلی بەگ و هامڕێکۍ سانیشا ئازاڎۍ کەردۍ و محەمەد یوسف سانشا کیاست پەی زیڼانو خنکاری کە چېرو دەسەڵاتو ڕومەکانە بۍ، دمای ماوێ جە ساڵەو (1742ز) دەنگ و باسش نەمەن. چی ساڵېنە، بە فەرمانو دەسەڵاتدارا عوسمانی، جهانگیرسان کوڕو حەسەن عەلی سانو مەریوانیشا کەرد بە فەرمانڕەواو هۆرامانی، پەی ماوەو حۆت مانگا فەرمانڕەواییش کەرد، ئیتر تەواناو ڕاوەبەری هۆرامانیش نەمەن و وازش ئارد، چا ماوەنە خەسرەو بەگ کوڕو بارام سانی دوەمیش کەردەبۍ بە یاگەگیرو وېش، بەڵام ناوچەو لهونی چېرو دەسەڵاتو حسێن سانینەبۍ کە گۊشدارو فەرمانو ڕومەکا (عوسمانیەکا) بۍ.
خەسرەو بەگ ساڵەو (1747ز) کۊشیا، کە هامکات بۍ چەنی کوشیای نادر شاو ئەفشاری. حسێن سانیچ ساڵەو (1748ز) ینە کوشیا، دمای ئاڎیی بارام سانی دوەم کوڕو گەنج عەلی سانی، بی بە فەرمانڕەواو هۆرامانی.[1]