ناونیشانی بابەت: دووگیانی هێشوویی
ئامادەکردن: د. #کەژان کاوە تەها#

دووگیانی هێشووی بریتییە لە پیتاندنی هێلکەیەکی بێ ناوک لەلایەن تۆوەوە یان کاتێک هێلکەیەکی ئاسایی لەلایەن دوو تۆو بپیتێنرێت کە ئەبێتە هۆی درووستبوونی کیسێکی گەورەی شێوە هێشوو ترێ لەناو منداڵدان، ئەم دووگیانیە ناتوانێت وەکوو دووگیانی ئاسایی گەشەبکات و بەردەوام بێت و لەوانەیە هەرخۆی لەباربچێت یاخود پێویست بکات لەلایەن پزیشکەوە چارەسەر بکرێت.
دووگیانی هێشوویی لەوانەیە لە هەر تەمەنێک و هەر خانمێک ڕووبدات بەڵام هەم هۆکارانە ئەکرێت مەترسی ڕوودانی زیاتر بکەن:
1- ئەو خانمانەی تەمەنیان لە 20 ساڵ کەمتر یان 35 ساڵ زیاترە.
2- ئەگەر خانمێک پێشتر دووگیانی هێشووی هەبووبێت.
ئەگەر خانمێک دووگیانی هێشوویی هەبێت ئەتوانیت دواتر دووگیانی ئاسایی هەبێت و مەرج نییە هەمان حاڵەت دووبارە ببێتەوە.
$نیشانەکانی چین؟$
1- خوێنێکی سووری گەش یان قاوەیی کە هەندێ جار لەوانەیە کیسی بچوکی شێوەی دەنکی ترێی تیابێت.
2- دڵ تێکەڵهاتن و ڕشانەوەی زۆر.
3- ڕێژەیەکی نائاسایی بەرزی هۆرمۆنی B-HCG کە لەلایەن وێڵاشەوە درووست ئەکرێت.
4- ئازاری حەوز یان هەست کردن بە قوورسایی.
$چۆن دەستنیشان ئەکرێت؟$
1- لە ڕێگەی ئەنجامدانی سۆنار.
2- بەرزی نائاسایی هۆرمۆنی دووگیانی HCG
دوای دەستنیشانکردنی پێویستە بەزوویی خانمەکە چارەسەری پێویست وەربگرێت لەلایەن پزیشکی پسپۆڕەوە. [1]