باخچێوە بېگەرد
نویستەی: میرزا ئۆلقاڎرو پاوەی
بەشۍ یەرەسەڎ و یەرەمە
یەهوودیەکۍ چن پەرسێ زانستیېشا کەردۍ حەزرەتی، پەرسۍ جە بارەو پېڎابېیەی زارۊڵەیۆ، شکڵ و شېوەو زارۊڵەی، پی تەرزە:
وەختێ ماچان زارۊڵە جە ئاوێ (نوتفێ) جە پەشتەو تاتەیشۆ پېڎابۊن، ئەی چی باعزە زارۊڵێ ئەڎێشا مشان؟
حەزرەت فەرماواش: گەر نوتفەکۍ سیفەتۍ پیاوەتیش فرەتەرۍ بان، ئانە تاتەیش مشۊ، بەڵام گەر کەمتەرۍ بان ئانە ئەڎێش مشۊ، جولەکەکۍ واتشا ڕاست واتەن. دیسان پەرساشان: بەنی ئیسرائیل وەڵتەر چەنی ژیوېنۍ؟ چېش پەیشان حەراڵ و جېش حەرام بۍ؟. حەزرەت جوابش دێوە، واتشان ڕاست فەرماوان.
حەزرەت فەرماوا بواچن کامەن
خەیاڵی پوختەن یاخو هەر خامەن
پەرساشان نوتفەی چوون نوتفەی مەردەن
جە پەشتی مەردان حەقق ئیجاد کەردەن
پەی چېش ئەو فەرزەند جە پا تا وە سەر
مەنمانۊ شکڵش بە شېوەی مادەر
حەزرەت جوابدا دەردەم و پېشان
جوابی شافی حاڵی بۊ لېشان
ئەر بی نوتفەی مەرد غالب جەو ئانە
فەرزەند جە بابۊش دارو نیشانە
وەرنە بە عەکسی وە بۍ چوون و چەند
وە مادەر مەشۊ شېوەی ئەو فەرزەند
واتشان: نەعەم بەڵۍ یە ڕاسەن
فەرموودەت سادق بۍ کەم و کاسەن
دیسان هەم یەهوود پەرساشان خەبەر
ڕووی خېتاب کەردەن گرد بە پېغەممەر
واتشان چېش بی ئیسرائیل جە پېش
قەبل جە تەورات حەرام کەرد جە وېش
خواجەی کائېنات دەردەم دا جواب
فەرما: ئیسرائیل شای عیسمەتمەئاب
جە توعمەی شەراب کەم عەلاقە بۍ
مەیلش هەر گوشت و شیری ناقە بۍ
تاکە ئازارێ گران یاوا پېش
بېزاربی تەمام جە زیندەگیی وېش
جەو دما حەکیم تاکی تەنیای فەرد
ڕەفعی کەسالەت ناوەشی ئەو کەرد
هەنی گوشت و شیر وشتر چوون یەکسات
حەرام کەرد بە وېش (مادام الحیات)
قەبل جە نزوول ئامای تەورات بۍ
ئیسرائیل جەو دەرد ئەهلی نەجات بۍ
یەهوود واتشان (ئەی عەفاکەاللە)
سیدق وە سیدق یا ڕەسوولەڵڵا
باز هەم واتشان: خاوی تۊ چۊنەن
ڕەوانی ڕۊحەن یا مەستی هوونەن؟
حەزرەت فەرماوا: جیسم دیار بۊ
دایېم جیسم نە خاو وە دڵ بېدار بۊ
واتشان بەڵۍ مەعلوومەن جە عام
هەر ئەوەن مەحب و حەیی لا یەنام
حەزرەت فەرماوا: خۊی من وەیتەرزەن
پایەی مەراتیب ئەنبیای بەرزەن
دیسان پەرساشان هەم ڕوحەلئەمین
چە نەوعی مەیۊ نە ڕووی سەرزەمین
حەزرەت فەرماوا: ئامای جوبرەئیل
جە لای من و حەقق هەر ئەوەن دەلیل
مەدەوتان سەوگەند بە خوڎای جەلیل
مەویندۍ وە چەم ئېوە جوبرەئیل.[1]