فەلەک خامۊش کەرد
بەشۍ ششەمە
میرزا ئۆلقاڎر، دما بەشو شین و زاریشەنە پەی(سەی نیزامەدین و سەی ئیبراهیم)ی، شین پەی خامە و دەفتەر و مەدرەسەیشان کەرۊن، شین پەی پلەو عیرفانیشان کەرۊن. پېسە وەفێوە پەیشان، ماچۊ: شەرتەن تا زیڼەی ڕووی سەربیساتم، شېوەتان هەرگیز نەشۊ جە یادم. دماجار بە براڵە و مامۊزا نامېشان بەرۊن.
شېخ باوەفا ناگا مەردەم ڕۊ
بار حەسرەتان وە گڵ بەردم ڕۊ
فەرهاد کۊکەن هونەرمەندم ڕۊ
والیزادەی خاس کار پەسەندم ڕۊ
دەریای مەعریفەت کان گەنجم ڕۊ
میرزای مەعنەوەی سوخەن سەنجم ڕۊ
بوزورگ جادار بوڵەند پایەم ڕۊ
شای نەوجوانان کۊتا مایەم ڕۊ
برای دەعیەدار غیرەت‌مەندم ڕۊ
شیرینتەر جە تام مەزەی قەندەم ڕۊ
سەعات نەگەردەن شوخ ڕەندم ڕۊ
مارنەگەز نە پا دڵ پەسەندم ڕۊ
برای نامدار بوڵەند بەختم ڕۊ
لایەق وە تۊمار تاج و تەختم ڕۊ
کاکە خۆم بە فیدای ڕېزەی ڕازت بام
وەفدای جای خاڵی وە بی نازت بام)
وەفدای مەلبووسات زەرق و بەرقت بام
وەفدای چەتفەی زەڕ، فەوق فەرقت بام
وە فدای بەرگ و بۊی ئاڵا و واڵات بام
شیرینی شەوکەت بەژن و باڵات بام
وەفدای مەسکەنی خۊش مەجازت بام
ئەسڵ کارخانەی فەرهەنگ سازت بام
بە فدای سوفرەی توحفەجاتت بام
فدای سەندوقچەی ئەماناتت بام
فدای قەڵەم دان ئینشای نامەت بام
فدای تەحریرات شەمەی خامەت بام
فدای توڕەی لاڵ سەربەمۆرت بام
فدای شەئن خاس شارەزوورت بام
وەفدای خەستەگی خەستەزامەت بام
وەفدای ئینتزار جواو نامەت بام
وەفدای جبەی شۊخ ئاڵای کۊڵت بام
قۆنگەرەی نەعڵ پا و پانتۆڵت بام
وەفدای تەق و تۆق ماردوم بازیت بام
وەفدای شەوق و زەوق سەر ئەفرازیب بام
وە فدای خۆش‌خانان شیرین نەزمت بام
شەوان تا وەڕۊ بەزمە و بەزمت بام
عەبای تەڵاریز لارە شانت بام
ئاهەنگ مەجلیس دیواخانت بام
وەفدای سەماوەر دایېم جۊشت بام
چەنی هامسەران نۊشای نۊشت بام
هەر وەتۊ مەکەفت مەواتی یاهو
خۊ نەکەوەت وە من کاکە قەزای تۊ
هەنی وە بۍ تۈ چۆنەن ژیانم
مەبۊ چېش کەروون قەزات لە گیانم
ئەر کەشەن ئەر کاو، ئەر باخەن ئەر کۊن
یەکسەر جە د یدەم نەقش شېوەی تۊن
ئەو هەر کۊ مەدیۊ کاکە هەرتۊنی
بنمانە باڵات توو خوڎا جە کۊنی
ئامینەی غەریب تەمام بەڎحاڵەن
دەرونش وېنەی سفتەی زوخاڵەن
مازەشان وەجا بۍ ڕەحمی مەکەر
هەر ئاخ مەکېشان تا وە ڕۊی مەحشەر
تا شەمع ئەروام خاس نەبۊ خامۊش
شەرتەن شېوەکەت نەکەم فەرامۊش
هەتا تۊی کەفەن نەکەم پارەپۊش
شەرتەن شێوەکەت نەکەم فەرامۊش
تا زووخاڵ وە جۊش نەجۊشۊ وە جۊش
شەرتەن شېوەکەت نەکەم فەرامۊش
سا با هەر دەردم ئەوگار بۊ نە دڵ
جۊش دەرۊ وە هەم تاسای سەرای گڵ
بەیدی پیمەوە هامسەران یاران
تەوەن هەر وە بەخت سیای من واران
کۍ چوون من دووزام کاریش ئاوەردەن
سەردار خاس و براڵەش مەردەن
نەمەندەن تاقەت تاویان زاڵەم
ئاخ پەی ئامۆزای داخ پەی براڵەکەم.[1]