فیدای سنعت بام
بەشۍ یەکەمە
بەشی یەکەمەنە، میرزا ئۆلقاڎر باس جە خەڵاتێ کەرۊن کە حەزرەتو جوبرەئیلی ئاردەن پەی پېخامئاوەری، خەڵاتێن گەر ماناش ڕۊشنەبۊن لاو هەر موسوڵمانێوە، ئانە بېشک مەیاونۊش دلۍ بەهەشتی، خەڵاتو تەریقەو نەقشیی، کە وەڵتەر نەدریان بە هیچ پېخامئاوەرێ، حەزرەت خەڵاتەکەش وەرگېرت، پېسە وېش لوانە دڵش، هەر چاگە بەخشاش بە ڕەفیقو غارەکەیش، ئاڎییچ دڵشەنە جاگیرشکەرد و بەخشاش بە عومەری فارووقی، پا تەرزە وەستەرە پەی یاوەرەکاش.
فیدای سنعت بام سانیع هەر تۊنی
(شدیدالعقاب) کەرەم بۍ شۊنی
هەر ڕۊ جبرەئیل سەفحەی خۊش‌خەبەر
وەحی تۊ ماوەرد وەلای پېغەمبەر
تا یەک ڕۊ ئاما ئه و ئەخی ئەمین
وەلای شای لەولاک (ختم المرسلین)
واتش یا ئەحمەد شای (خیرالبشر)
سەڵامت کیاست دەهەندەی داوەر
ئارۊ وە فەرمان تەعجیلم کەردەن
سەوقات خاسم پەی تۊ ئاوەردەن
پەی هیچ ئەنبیا نەڕووی دەهر دوون
عەتاش نەکەردەن پادشای بېچوون
چوار ڕاگەی حەق شیقان جادە
خوداوەند پەی تۊش کەردەن ئامادە
هەم پەرێ زومرەی ئومەتان تۊ
یا حەبیب هەرکەس مەیلش بەهەشت بۊ
بکەرۊش بە وەر بۍ خۊف و خجڵ
یەقینەن سالم مەشۊ وە مەنزڵ
بکەرۊش عادەت جومعە و جەماعەت
خاستەرەن جە سەنگ قورسی قەناعەت
جه و دما حەبیب (مصطفی)ی مورسەل
سەفەری میعراج قاپی لەم‌یەزەل
تەریقەی شەریف قەبوڵ کەرد وە دڵ
خونچەی سەرگۊناش شکۊفا چوون گوڵ
جه و دما حەزرەت حەبیب داوەر
ڕوکەرد وە جەناب سدیق ئەکبەر
فەرما هەی ئازیز ڕەفیق غارم
هامڕاز ڕای چۊڵ تاریک و تارم
تەریقەی نەقشیم ها سپەرد وە تۊ
بگېرەش بە دڵ شەوان تا وەڕۊ
دیسان ئه و سەروەر ئاماوە جواب
فەرما ئەی فاروق شای (ابن الخطاب)
فەرما بە عومەر عەداڵەت ئەندېش
پەنای فەقیران بېنەوا و دەروېش
پشتی ئەسحابان ڕۊشنی دینم
سەیقەڵ نمای ڕەنگ جام جەمینم
زیکر و تەلیلەم ها سپەرد وە تۊ
جە دمای تاعەت بکەرەش وە خۊ
بازهەم بەڕووی لوتف (ابوالحسنین)
تەڵەب کەرد ئەمیر ئەعلای (زی النورین)
فەرما یا عوسمان شای حوشمەت بېشۊ
مەلایک ماتەن گرد جە حەیای تۊ
دۊس دنیا و دین ڕەفیقی گیانی
(کاتب‌الاوراق) وەحی ڕەبانی
ها سوهرەوەردیم جا وە تۊ سپەرد
تۊم سپەرد وەزات تاک تەنیای فەرد
دیسان هەم سەیید (مصطفی) ی نازار
تەڵەب کەرد ئەمیر شای دڵدڵ سوار
فەرما یا ئەمیر ڕۊشنی عەینم
مەشعەل نمای ڕەنگ پەرداغی زەینم
شیری خوداوەند(ساقی الکوپر)
غارت حەسار دەروازەی خەیبەر
تۊ خۊ چەنی من دایېم هەم قسمی
(لحمک لحمی، جسمک جسمی)
تەریقەی قەدیم قادر قودرەت
دەریای مەعریفەت بەحری حەقیقەت
زیکری زاتی پاک دانای جەلیلەن
تەلیلە و تەوحید بابا خەلیلەن
ها بەخشام وە تۊ نیگاداریش کەر
پەی قەزا و قەدەر مەبۊ وە سپەر
دایەر بۊ نە دەور موڵک خوداوەند
پەی گشت ئوممەتان تا زەمانەی ئەند
جەناب حەیدەر کەردش تەمەڼا
بۊسا پای سەریر ئەعلای (مصطفی)
جەودما دایېم کەردش وەعادەت
زیکری (زوالجلال) دمای عیبادەت
دەنگی تەلیلەش مەشی وە فەرسەنگ
کەش و کۊ چەنیش گشت ماما وە دەنگ
مەلاییک نەپای حەفتەم سەماوات
یەکسەر (لا الە، الا الله) مەوات
جە تەئسیر دەنگ نام ئیلاهی
زەمین مەلەرزا تا گاو ماهی
جە غەرب تا وە شەرق دنیاش مونەوەر
جە فەیزش عالەم گشت بی موعەتتەر
هەی من وە سەرگەرد فاتمەی بەتوول
فەرزەند عەزیز دڵبەند ڕەسوول
پاک‌زاد پاک‌دین وە پاک سرشتە
ڕشتەی لیقای حەق نوور پېدا وەشتە.[1]