میرزام نەمامان
بەشۊ دوەمۍ

نۊ نەمام ئاماوە جواب، واتش ئەی حاڵ نەزان، ئەشیێ پانەیە زانێت کە نۊ پایېز ئامان، سیوەیل جە یەمەن بارخانەش ئاوەردەن، خەڵاتو ڕەنگەکاش ملو دار و نەمامارە پەخشان کەردەن، هەر دارێ ڕەنگێش پەنە بەخشان، وېنەی نەو عەرووس داران ڕازنان. مەر هەر میرزا ئۆلقاڎر وېش تاوابۊش پا تەرزە هونەریە زەریفە پەیمان ۋېناکەرۊن.

نەمام ئېڎ شنەفت خەیلێ نۊحە کەرد
ساتێ ئاما وېش کېشا ئاهی سەرد
واتش ئەی کەم هۊش نەفام چۊڵ‌گەرد
حاڵ نەزان حاڵ، بیخەبەر جە دەرد
هەر وە شېوەی ڕەنگ زەردی خەزانان
نۊ پاییز ئامان مەر تۊ نەزانان
سیوەیل جە یەمەن بارخانەش ئاوەرد
چوون قەڎیم شاهان خەڵات پەخشان کەرد
وە ئەمر بېچوون پادشای بېعەیب
بارخانەی ڕەنگین جە کارخانەی غەیب
جەعبە جەعبە ڕەنگ ئاڵای دیاری
ئاوردش دەس‌دەس پەی نەقاش کاری
شەوێ جە شەوان جە شیرین‌ خاوان
کووپەی ڕەنگ‌ڕەزیش ۋست ئه و شەتاوان
بوغچە بوغچە کەرد ئەلوان شاران
قەرار دا یەک یەک خەڵات پەی داران
ئەوەڵ وەن‌داران کۊساران هەرد
وە دیبای عەقیق گرد موخەلەع کەرد
جە سەندووق‌خانەی دانای لایەنام
چارشېوەی چینی بەخشا وە باڎام
عەرووس گوڵ‌ڕەنگ زەنگار بووم خەز
جە ڕووی مەرحەمەت بەخشا وە (تەنگەز)
دا وە (بەڕوو دار) پارچەی خەزاوی
بەخشا وە (کیکف) نیم‌تەنەی ماوی
خەڵات داران گرد کەردەن کارسازی
شیر داخ وە (هەمرۊ) ماوت وە (مازی)
خارایی شەجەر وېنەی شای دارا
پۊشا وە باڵای ئالووی بوخارا
سەرف بەخشا وە (سېف) ، ئەبرە وە (ئەنجیر)
زەردئالووش پېچا وە تافتەی حەریر
نیم‌ ڕەنگ زەردفام ئاڵای دیاری
بەخشا وە (چنار) پەی یادگاری
عەمامەی ئەتڵەس لەتیف گوڵنار
پېچا وە حورمەت نە فەرق (توو دار)
نەفیس شەوخاو زەرد شیرازی
بەخشا وە (ئەنار) پەی سەرئەفرازی
پەی دەفع سەردی هەوای تۊف سەرد
بەخشا وە (گردوو) بادڵەی بېگەرد
کەرەم کەرد وە (مېو) لۊنگ قەفاویز
ئەعلای بۍ بەدەڵ حاشیەی وەڵگ دیز
(عەنەب) قۊڵ وە قووی لاجیوەردەوە
(فەندووق) وە سەلتەی ئەعلای زەردەوە
(ئالوو) وە دیبای زەڕنیشانەوە
(ئالووچە) وە بەرگ زەعفەرانەوە
(ئەمرۊ) وە سوخمەی حەریربافەوە
(بەی) وە تۊی پەڕەند سورمەی سافەوە
کیم خوڎا پەی (گیلاس) کەتان پەی (خاران)
وەیتەورە کەردش خەڵاتی داران
توڵ قەڵوەزان نە پای تافەوە
یەکسەر گرد پېچا وە زەڕبافەوە
وېنەی نەو عەرووس داران ڕازنا
قسمەت کەرد تەمام دنیا سازنا
لەب ڕووی شەتاوان ئەخیاوانان گشت
ڕەنگین کەرد ڕەزان چوون ڕەوزەی بەهەشت.[1]