نەک هەر من
بەشۊ یەرەمۍ
میرزا ئۆلقاڎر، بارەگاو نزاکاشەنە مدرۊ، نامۍ فرەو ئەولیا و پیر و عاریفەکا مارۊنە حاجەت، داوامەکەرۊن ئەو زاتو هەققی، پەی خاترەو پاکی و بەرزی ئا گرد ئیماما، ئا پیا خاسا، شېخی بەسرە ماوا(شېخ حەسەنی بەسری)، شېخش گەیلانی، چوار ئیمامان، شەمسی تەبرېزی، شېخی تاڵەبان، بە سەداو لەبەیک لەبەیکی، بە شەریفی شارو مەککەی، بەشکم وەکېڵ و مامۊش ناوەران زەرەر.
بە ورشەی جەوهەر ستاران یەک یەک
بەو شوعلەی شارق سەما و هەم سەمەک
وە نەعرەی برزو ڕەعد پەڕ خرۊش
وە ڕېزای ئەمتار بەحر جەیحوون جۊش
وە زەلزەلەی باد تەم و تۊز و هەور
وە چەرخ گەردوون وە چەپ مەڎۊ دەور
وە چرەقەی برقەی چەخماخەی شەرەر
وەکېڵ و مامۊش ناوەران زەرەر
وە ئەولیاهان نە ڕووی سەرزەمین
وە شەهیدان گرد مەقتول جە ڕای دین
وە عیلم عەمەڵ عالمان پاک
وە ڕوو گوشاڎی خاکیان خاک
وە عەدڵ و ئیسناف شاهان خۊش بەخت
وە خەیر و ئیحسان ئەمیران وەخت
وە شەرم و حەیای ئەهل دینداران
وە دین و دانش تاعەت گوزاران
ئومېڎم ئېدەن یا دانای داوەر
وەکېڵ و مامۊش ناوەران زەرەر
بەشق شېخ حەسەن جە بەسرە مەنزڵ
شېخ ئەوەڵین ئەولیای کامل
باجەتی حەزرەت وەیسی میشەکۊ
ئەوەڵ تابعین شاباز خوشخۊ
باجەتی مەعروف شېخ کەرخی زەید
بە عەشق ڕوتبەی سولتان بایەزید
بە قورب جونەید وە بوشرە حافی
یاوا بە مەتڵەب وە پاکی و سافی
بە سولتان حەبیب شېخ ئەبو سەعید
وە بارەگای بەرز شېخ ئەبول موعید
وە شای موحیەدین غەوس گەیلانی
شېخ عەبدول قادر قوتب ڕەبانی
وە پیرە لاهوور وە خواجەی ئەحرار
وە ڕیجالولغەیب عەزیز نازدار
باجەتی شاباز خواجەی قەڵەندەر
وەکېڵ و مامۊش ناوەران زەرەر
وە ئیخلاس پاک ڕیازەت کېشان
وەکۊرەی تەوحید زکر دەروېشان
وە ئیمەی خشوع موریدان ساف
کەشفەن جە لاشان جە قاف تا بە قاف
وە مجری گرد جەزبەی ئەهل حاڵ
وە زکر و مەخفی وە بۍ قیل و قاڵ
وە هەر پەنج مەقام تەریقەی پیران
وە چوار ئیمام سەر مەزهەب گیران
وە چوار قەسەبە بۍ زیاڎ و کەم
وە چوار مەقام کەعبەی موعەزەم
وە پەنج ئەندەر پەنج ئەسڵ و فەرع دین
ئەرکان ئەحکام ئەعلای نازەنین
وە پەنج فەرزەی پاک دین پیغەمبەر
وەکېڵ و مامۊش ناوەران زەرەر
وە سەڎای شەریف قاری قورئانان
وە ئەوراد پاک سوب سەحەر وانان
وەڕای حاجیان ئەعلای دەرەجات
وە لەبەیک لەبەیک جە کۊی عەرفات
وە سەڎای سەڵات بانگ حیجازی
وە ڕوتبەی بوڵەند شەهید غازی
وە مەککەی شەریف مەدینەی ئەنوەر
وەکېڵ و مامۊش ناوەران زەرەر
وە عەبیدوڵڵا پیری بەهرەمەند
خواجەی خواجەگان ماڵ‌جە سەمەرقەند
شای موشکڵ گوشا شاه نەقشبەن
خواجە بەهائەدین بوخارا مەسکەن
وە خواجە یوسف هەمەدان ماوا
یانەی دڵ وە بۊی فەیز حەق ئاوا
وە ئیمام ڕەزا وە شەمس تەبریز
وە سولتان مەحموود مورغ سەحەر خېز
وە بارەگای بەرز بالول دانا
وە پیر شالیار جای ڕجا و هانا
وە هومەرمەڼان پیر بوڕادار
حەکیم ئازار شېت و هار و مار
وە شای تاڵەبان پیر پاک نەزەر
وەکېڵ و مامۊش ناوەران زەرەر.[1]