واتەو گۊشگېرتەی مېیانو ئاسمانی و زەمینی
بەشۊ یەکەمۍ
ئەچی واتەو گۊشگېرتەینە، ئاسمان بە گردو عەزەمەتاشۆ مڎیۊرە وار پەی زەمینی، پەی ئانەی زورانبازیێ سەردش چەنی گېرۊ، دەسکەرۊ بە نیشاندای عەیب و عارەکا زەمینی، باس جە قەتڵ و قاتڵی کەرۊن، باس جە تاوانو ۋن متەی کەرۊن، ماچۊ: ئەی زەمین، تۊ یاگەی مارو موورەنی، یانی پیسەنی، بۊی عەفوونەتت مەیۊ وە لای من. ئاسمان پەی زیاتەر زەلیلکەردەی زەمینی، گەرەکشەن هەیبەتش ماڕۊ، پەنەش ماچۊ: من بەزەییم مەیۊ تۊرە!
یاران زەمینەن یاران زەمینەن
سەیر گفتوگۊی سەما و زەمینەن
موقەددیمەی تەرح بەزم ڕەنگینەن
مەعرەکەی مەساف دنیا و هەم دینەن
باس (فەزیلەت) بەین ۋېشانەن
نمەز تا ئاخر هەق وە کېشانەن
ئەوەڵ ئاسمان چەرخ چەپ نگین
واتش مەرحەبا سەتح سەرزەمین
(دایېمەلئەوقات) هەر شەو تا وە ڕۊ
جەرگم مەسۊچۊ من پەی حاڵ تۊ
بېقەدر و قیمەت ڕۊی ئەلەستەنی
یاگەی مەخلووقات خاس و کەستەنی
زیندەگی باتڵ عەبەس مەویاری
یاگەی نەجاسات، جای کرم و ماری
ماوای مەعسیەت گونابارانی
مەنزڵگەی تەقسیر شەرمەسارانی
یەقین ڕۊی ئەزەڵ چوون نامەقبووڵی
جای غەیرە مەشرووع قەتڵ و قتووڵی
زەمین من پەی تۊ پەشېوەن حاڵم
چۊنت قەرارەن هاوار وە ماڵم
هەرچی قەباحەت توخم ئاڎەمەن
گرد جە بان تۊ یەکایەک جەمەن
بارت مەعسیەت سەربارت تاوان
بۊی عەفوونەتت وەلای من یاوان
مەعلوومەن خالق بینای بۍ دیڎەن
پەی ئه و ئیفتزاح تۊش ئافەریدەن
شوکر، من ۋېم پاک هەم جای پاکانم
گوزەرگای مەنزڵ شەرەفناکانم
پاک مەبۊ نەجس نیگا نەدارۊ
جوابت چېشەن بواچە ئارۊ
زەمین من پەی تۊ دەروون کەواوم
دەلیلت چېشەن بدەر جواوم.[1]