ژیوای سەفەرێوەن، پەڕەن وەشی و ناوەشی
ژیان سەفەرێوەن پەڕەن جە وەشی و ناوەشی، گرنک ئانەن خوڎا ئا قەدەرێ کە پەنەت بەخشۆ یان ڕەحمەتنێ یان حیکمەتنێ، کەواتە واچە (حەمد و سەنا پەی خوڎای سەروگرڎ حاڵێ) .
ژیان دوێ ڕوێن ڕوێ پەی تۆن ڕوێچ دژو تۆن، ئاڕوە کە هنو تۆن جەوېت بایی مەبە و ئاڕوەیچ دژتا بۍ هومێڎ مەبە.
ژیان تاقیکردنەوێوەن نە شایستەو ئانەین لوتەو وېتش چەنە کەری عاسمان، نەبۊ بە نشینگێوە کە تەنیا خەمو خەفەتش چەنە کۊ بۊوە.
عاقڵانی دەور قەڎیم ئەیامان
یانەی دنیاشان وېنەی پل فامان
ئەرکەسێ نەبۊ وێڵو دېوانە
وەبانی پلدا کێ کەردەن یانە
(سەیدی هۆرامی).
وەختارێ پەلەوەرێ مەنەن، مرۊچێ وەرۆ،
عانێ مرۊ مرۊچێ وەراش!
زەمانە هەمیشە یەک جۊر نیا، دەوران تاوۆ
فاڕیۆ، بە عەمرت نە بە سوکی بڎیە خەڵکیرە
وە نە عەزیەتشا کەرە!
ڕەنگا ئارۊ دەس لوابی! وەلێم دەور و زەمانە
جە تۊ دەس لواتەرێنێ!
درەختېوە میلیۆنها دڼە شقارتێش چەنە وەشێبا، بەڵام وەختوو وېش یاوا دڼە شقارتێوە
تاوۆ ملیۆنها درەختێ سۆچنۆ!
ئینسانیچ ئاخر یاگێش شارو خامۆشانو جلو بەرگی باقو بریقدارش تەنیا پارچە قوماشێ چەرمەن.
هەرپېسە ماموسا (فەهیم) باسو ئەرەنیشتا زیارەت تەڵانی کەرۊن:
زۊردارو هیزی ئارۊ بېزۊرەن
گۊش کەڕ زوان لاڵ نابیناو کۊرەن
نەیۊ ماقوڵو ساحیب دەمارەن
نەیۊ شڕۆڵو تەمام هەژارەن
یەکسانەن پلەو پایەو سەروەتش
گرد سفید پۊشەن شاهو ڕەعیەتش
ماواو مەکانش کون چېرزەمینەن
یاڕەبی کارت بۍ حەد شیرینەن
ئانەکە هیزی دەسەندەرکاربۍ
چەنی هەژارا ساحیب دەمار بۍ
یانەش چن نهۆم بەرزو یانا بۍ
بە خیاڵی خامش خانو خانا بۍ
ئیسە جانیشتەی یانەی بۍ بەرەن
جە هەر هەژارێ خۊ هەژارتەرەن
گیرۆدەو دیلی ماوای مەزارەن
ئومێڎش ڕەحمی پەروەردگارەن.
فراوان عەفان دەرەمەڕی.[1]