حەمە ژەنی مارۊ
بەشۍ: یاڼزەهەمە

دەربازەکەنە تاکو لوایمێ سەر، هۆڵم دا قسێش چەنی کەرو، وەلێم تەنیا یەک جاریچ نەڎیاوە لا تاکو بزانۆ باڵش کێ گرتەن. ئا ژەنە زەڕەتاڵێ کە ئۆ باڵەکەش گرتێبێ، زانام کە ئینە پاۋەیۋەش هەنە. بە هەر جۊرێو بی، پلەکانێ یانەکارە لوایمێ سەر. یانەکێ دوێ هۆڎێ و هەیوانێوە بێنێ و هۆڎېوی گولانەێچ سەرۆ بێ، کە کاک ڕەحیمم چەنەش وسێ. یۊ چا هۆڎا حازرشا کەردەبۍ پەی وەیۋە و زەمای.
وەرهەیوانەکەنە نیشتێمێرە. ڕەسم ئانە بێ، وەیۋە و زەما ئەشیێ پێوەرە نانوو زەماوڼێشا واردێ. سفرێو چەولاوە یاویابێرە و ئا جەمێ کە چەنی وەیۋێ تازە یاوایبێنێ وەرۆ، دەسشا کەرد نان واردەی.
ئەڎام دلێ نانەشانېوەنە دۆریێو برنج و گۊشتاوێوەش پەی ئاردێمێ. چەمېم سەرو وەیۋێوە نەترازیێنێ، پېسە وارانی هەڵسی مجێرە. پاوەیۋەکېش جار جارێو چېوێو چفنێ گۊششەرە. بە چەمۍ تەڕېوە سەرەش بەرز کەردۆ و دیا پەی پاوەیۋەکێ و واتش: هیچ مەتاوۊ بوەروو وازم چەنە بارە.
وەختێو دەمش کەردۆ و قسێش کەردێ، دڵم خەریک بۍ بەر بێ، چوون فرە بە بەسەزوانی جوابش داوە. سەرو نانەکەیۆ هۆرساوە، ئەڎام زاناش وەزعەم تێکە شیێنە، ئاما لامۆ و فرە بە یەواشی واتش:
ڕۆڵە حەمە گېیان، خەفەت مەوەرە ئانە غەریبی کەرۊ، کناچەیی کەرۊ، هیچ نېیا گردیما پاسنێ بېیېنمۍ، لوە لاش و کوچېو دۆنەش ئیسە خاسەبۊ.
ئەڎام بە بۍ ئانەیە ئاگاش جە دڵوو من بۊ، سەرو بەرنامەو وېش لوێ و وەشحاڵە بۍ کە وەیۋێوە تازێش ئاردێنە یانە.
نان وریا بە بۍ ئانەیە وەیوە تەنیا تکێو ئاویچ کەرۊ دەم. وەختێو سفرەکەشا لا بەرد، پاوەیۋەکێ نەما دەسش و بەردەش پەی دلێ هۆڎەکەی کە وەڵتەر حازر کریابێ.
من وېم پەی گرد چېوی حازر کەردەبۍ. نەزانێنێ چېش ڕوە مڎۆ، هەرچن کاکە ڕەحیمیم وەڵتەر گرد چېوش پەنە واتەبێنێ، وەلێم هەر ویمۆ دڵەۋرکێم بێ.
کاک ڕەحیمم وەرهەیوانەکەنە ئەی و لوێ، پەی ئاخر جاری، کېشانېش قەراخێوە و واتش:
حەمە هۊشتبۊ، حەیاو تایفەکەی نەبەری، هەرپاسە واتیم پەنە، ئاڼەت پۆ نەشۊ.
ئەڎام و پاوەیۋەکێ، پېسە نگابانا بەرەو جەحەڼەمی، ئی لا و ئۆ لا بەرەکەیشا گرتەبێ، چا وەختەنە گەرەکم بۍ بلوو دلێ، ئەڎام دیام پۊرە و زاناش کوچېو پەشۆکیانا، دەسش کەردەنە دلێ بیبنەکەیم و واتش:
ڕۆڵە حەمە گېیان ئاگات وېت بۊ، قوربانەت بوو ئاڼە مەپەشۆکیە ئانەیە کەرە کە کاکە ڕەحیمیت پەنە واتەنی.
چا فرسەتە کوڵەنە بە هیچی ویر نەکەرېنێوە بێجگەم وەنۊشێ. هەرچی سەرە ئارێنێ و بەرێنێ جە دڵڕەقی ئەڎێیم و کاکە ڕەحیمیم حالیم نەبۍ، ئاخر چی مشیۊ ئا کارە هەر ئا شەوە کریۆ، من چینەیە نەیاوێنێنە.
چەنی ڕەفێقەکام فرە جارێ ئی باسێما کەردێبێنێ. هەر یۆشا بە جۊرێو ویر و ڕېوەش بێ. یۊ ۋاچۍ: مشیۊ هەرمانەکۍ زوو تەمامنی ، ئەر گنیۆ دما حەیات بەرا. یۆتەریچ ۋاچۍ: وەڵا من هیچ پەلەم نیا، هەزار کەسێچ واچا تاکو وېم مەیلم نەبۊ ئا کاریە مەکەروو.
ئیسە من وېم فرە پەشۆکیا بێنێ و نەزانێنێ چېش ڕوە مڎۆ.
پا حاڵ و وەزعێوە، بەرەو هۆڎەکەیم کەردۆ و لوانێ دلێ. دلێ هۆدەکەی هەر پېسە جارا بێ، تەنیا چېوێو کە زیاڎ بیەبێ، لێف و دۊشەکېو بۍ چەنی سەرنگێوەی تازێ کە وەڵتەر نەڎێبێنێم. ئی لێف و دۆشەکە خەڵاتو واڵە گەورەکێم بێنێ کە پەی مەبارەک باڎیی زەماوڼەکێم ئاردێبێنېشا.
لێف و دۆشەکەکە، دلێڕاسەو هۆدەکەیەنە یاویابێرە و سەرنگاکێ سەرشۆ بێ، جە ئاخروو هۆدەکەیۆ دلێ دیوارەکەیەنە یاگە و بان هۊرچنیابێ و بە پەردېو شاریابێوە و کوچېوش دیار بێ. هۆدەکە دەلاقێوی گولانەش بۍ کە دیێنە دلێ کوجیەکێ.
وەنۊشە لا دەلاقەکەیەنە کە کۆتەبێ وەراوەروو دۆشەکەکەیۆ، نیشتێبێرە. هەر بە ئا کاریشە کە سەرو دۆشەکەکەیۆ نەنیشتێبێرە، یاونابېش، کە ئا شەوە ئاماڎۍ ئا کاریە نېیەنە!
بە بۍ ئانەیە بە چېوېتەری ویر کەروۆ، لوانێ لاشەنە نیشتارە. دڵم پۆ بۍ قسێوە بېزوۆ و دەس پەنە کەرو تاکو تۆزێو سامش مەڕیۊ و گنۆ قسێ چەنیم.
ڕەزا بەهمەنی.[1]