یاڎەوەریەکېم
بەشو: شاڼزەی
ھەمیشەو خوای ماچوونە کیسێم پەڕێنێ ڕووداوێ نەواچیێ ونەترووکییەی. ئی ڕووداوێ و ئی کیسە پەڕێ جە سەفەرانە خېزیانە و سەرە بەرمارانە. (جوممانە حداد) شاعێرە و نویسەرەکێ وەڵاتوو لبنانی واتەنش: (ھیچ کەس نمەزانۆ کەی سەفەر کەروونە، کەی ملۊ ڕانە، چ وەخت گوم بوونە، و ھیچ کەس نمەزانۆ کە لوایم ئامایوەن و ئامایوەم غەیبەتەن و ئا چېوە کە ئینا ڕانە پەی وېش تووفانێوەن. گومانشان ھەن کە مزانانە، کە چېش من مەوزووشان دلێ شکێ و گومانێ).
ئی جارە کەوتێنمێنە لاشە بۍ نازەکەو ھامنە ھەواروو بووکی، ڕۊحێوە سەرگەردان، پەڕێنمێ بۍ دەنگی. گەرەکمانە ئاڎ پەیما گنوونە قسێ و حیکایەتێ و ڕاز و نیازێ. منیچ خېیاڵێوە (55) ساڵە و عال پوختە بییە. تەوەنەکاش، ڕاکېش، چۆڕەو ئاوەکېش، منەرە چکای چکېنېرە و زێھنیم ئاوژین کەرېنێ.
بووک و مارانی پەی وېشان حکوومەتېوەنێ و دەسەڵاتێوە ئەوەمەنەجیای. ھیشتای ساموو دەسەڵاتیش چەنە نەکنیانوە. ئەجۊت پەناو ھەر درەختېونە، بنەو هەر وشکەکەڵەکێنە دەسەڵات فەرمانە مڎۆنە و بەشەرەکێ ئاوێزانوو قسا و گۊش و ھۆشینێ. سام، تاریخەنە گوم نەبییەن و دیوارە وڕایەکاشرە چکای چکۊرە! بۍ دەنگ، بۍ قسە و باس و بە بۍ چرپە پایېوە لاشارە لوێنمێ و کەسی نەچڵاکنێنمێرە و نەدۆنێنمێ. تاکو یاوایمێ سەراونەو هەواری. شنەوایەوە سەرکەش و چیامانان و تەنیا، بەڵام پەڕەن جم و جۆڵ و لیپاولیپ جە تاریخی و ژیوای و زندەگی.ھەناسەش جە ئېمە بڕییەن و هەناسەسوار. کەش و کوەکەش فریادڕەسوو ڕۊحیمان بێنە و ساڕێژ کەروو دەرد و ئازارامان. ھیشتای قول و قاچما نەچڵاکیابێرە. کەوتەبێ وەڵێ ڕۊحی سەرکەشیما. چەمېما پەڕێنێ دیای و دیمەنێ سەرسووڕمەنێ. قرمەو ئاوەکېش تاکو قووڵایی زاوەڕۆییمان لوێنە. ڕاکېش بۍ دەنگیمان چڵاکنېرە و ئارێماوە تەلەو قسا. تەوەنەکاش پێوایماوە خوای خوێنێ و زەردەخەنە ئازێنېرە گېیانیمان. دار و درەخت وېشا ئەرمانێنێ و بە وەجدەوە میاچەماما ختلێ دێنێ.
بووک، وەیۋلێوە چواردەساڵانێ و ھار و ھاجە. میاچەماو کۊساڵانیوە لەرزی گرتێنە و قرمەش ئەینە. کەس نەتاوێنە لەغاموو زەردەخەنەکەیش کەرۊنە! چی مانگەو گۆراڵانە ئاوسەنە و مژنوو ھەڵووچە ترشا کەرۆنە! تاموو دەمیش، پېسە ژەنېوە گېیان دارە، تاڵتەر جە تاڵشکێن و لەمەش پەڕەنە قسێ و کەلیمێ نەواچیێ. گۆلەئاوەکاش زیاتەر جە پەنجا ساڵان گۊرانیێ ماچا و تەژناو ھیلاکی ئاسمانی ماڕانە. کەڵەکەکاش شێعرێ واناوە و ڕازێ ئی دیم و ئۆ دیم کەرانە. ھەمرۊ گوڵاوییەکاش بەینوو ڕاوېیارانە شیرنیی و مەززەی بەھەشتی خەڵات کەرانە.
بورهان ئەختەر.[1]
Dieser Artikel wurde in (هەورامی) Sprache geschrieben wurde, klicken Sie auf das Symbol
![](https://www.kurdipedia.org/images/flags/ku.png)
, um die Artikel in der Originalsprache zu öffnen!
ئی بابەتۍ بە زۋانی (هەورامی) نۋیسیێنە، پەی ئەۋەکەرڎەی بابەتەکۍ بە زۋانېۋ کە نۋیسێنە، سەرو ئایکۆنو
![](https://www.kurdipedia.org/images/flags/ku.png)
ی کلیک کەرە!
Dieser Artikel wurde bereits 159 mal angesehen
Schreiben Sie Ihren Kommentar zu diesem Artikel!