دۆڕان
تۆ چیت...
لە هەر شتێک بوونت هەیە
تەنها لە ژیانی من نەبێ
بۆ هەر شتێک سەرنج دەدەی
بۆ هەر دەنگێک ڕادەچڵەکێی
تەنها گریانی من نەبێ
لە هەر شوێنێک ڕادەمێنم
تۆ دەبینم
لە ئاسمانی شەوی یەڵدا
لە ئاپۆڕەی کاروان کوژە
لە نەسیمی بەربەیاندا
تۆ دەبینم
لە ناو زوقم و بەستەڵەکدا
لە ناو شین و ڕەشبەڵەکدا
لە چەمانەوەی پەڕەنگ
لە ناو دڵۆپەی باراندا
تۆ دەبینم
لە سەوز بوونی گیا ، لە کرانەوەی گوڵ
لە توانەوەی مۆم
وەها دۆنای دۆنی یەکین
لە ئاوێنەش ، لە بری خۆم
تۆ دەبینم
تۆ کێیت...
ئەو سەرابەی ، چەندین ساڵە
بە دوات وێڵم
نە لەبەر چاوم ون دەبی
نە دەتگەمێ دەست نوێژێکت لێ هەڵگرم
ئەو توولە ڕێیەیت
بە خەیاڵم دەگەیێنی
ئەو خەیاڵەیت
ڕۆژی سەد جار بەر لەدایک بوونم دەمرم
تۆ کێیت...
کە هاوارم عەرشی ئاسمان دەهەژێنێ
تۆ نایبیستی
کە فرمێسکم بەرد کون دەکا
تۆ نایبینی
ئەوەی درەختەکان دەخاتە سەما
ئاهی منە، نەک ڕەشەبا
ئەو سەدایەی وەکو هەور دەگرمێنێ
ئاخی، پڕ لە تاسەی ناخی منە
تۆ نایبیستی
ماندووم ... ماندوو
لە بێ باکیت،
لە تەواوی ژیان تۆرام
بەرگەی بێ ئاگایت ناگرم
پەتی ئارامیم پچڕا
دانی پێدادەنێم
بێ شەڕ دۆڕام
ناوی نووسەر: #مستەفا نادر# [1]
Dieser Artikel wurde in (کوردیی ناوەڕاست) Sprache geschrieben wurde, klicken Sie auf das Symbol
![](https://www.kurdipedia.org/images/flags/ku.png)
, um die Artikel in der Originalsprache zu öffnen!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
![](https://www.kurdipedia.org/images/flags/ku.png)
بکە بۆ کردنەوەی بابەتەکە بەو زمانەی کە پێی نووسراوە!
Dieser Artikel wurde bereits 253 mal angesehen
Schreiben Sie Ihren Kommentar zu diesem Artikel!