ژیونایۆ شېعرەی هۆرامیۍ
بەشۍ: نۊهەمە
نویستەی: #ڕەئوف مەحموودپوور#
یەکەمین بەیاننامه و ژیونایۆ شێعرێ هۆرامیێ
دەقوو ئارۊی ئیتر خوانەی حازرە نېیەنە تاوەکوو بەئاسانی وەردەسنەبۊ، بەڵکوو دەقێوە دەمهەراش و ئەکتیڤ چنی وەردەنگېوە وریا و هووشېیاری گنۆ چەلەحانێ و بەئاسانی وېش مەدۊ دەسۆ. پەی بەدەس ئاوردەیش لازما وەردەنگ وېش ئامادە کەردەبۆ و زەینە و فکریش وزۆ هەرمانە و تەنانەت زەحمەتوو شۊنیرەگېڵایچ بدۆ بە وېش. مەبۊ چانەی غافڵێ بیمێ کە دەقی سەردەمیانە، یەک ڕەهەندی و یەک مانایی نېیا و کریۆ چنی جۊروو ئامادەیی و زەینیەتوو وەردەنگی ناواخن پېشکەش کەرۊ. چوونکای دەقی ئارۊیانە گردچیوی مەدرکنۆ و بەشێوەش مازۆوە پەی وەردەنگی تاکو جە ڕۊتوو دال مەدلوول (دەنگاژ دەنگاژۆ)یەنە لەیەکش بدۆوه.
ڕەنگە مەژگوو وەردەنگو ئېمە خوو پنە دریا (موعتاد) بۊ و عادەتش بە شیوازێوە تایبەتی کەردەبۆ و سەرو ئەسپوو وېشۆ نەوەزۊرە، بەڵام بە دڵنیاییەوە دەقی ئەکتیڤ وەختیێ گنۆ گەمه و هورڕووشکنایۆ دەقی وېیەردەی، وەردەنگیچ هورڕووشکنۆوە و چنی ڕۆتوو وېش، وەردەنگی تایبەت وێزۆوە یان پەروەردەش کەرۊ. ئینەیچ هەنگامێنە جە وەرۋستەی ڕۆتەکەی. ئەزموونەکێچ ئینەشا سەلەمنان. هەرئینەن ئیتر ئېمە وەردەنگی یەکسانما نېیا و جە ڕاسیەنە باویچش مەمەنۆ، بەڵکوو بەپاو زانیاریی و ئامادەیی و وریایی کەسەکا، وەردەنگیچ فاڕیۆ و جۊروو مامەڵەی ئاڵ و گۆڕش سەرنە مێ. ئیتر وەردەنگ ماتڵ نېیا تاکو بلۆ سەرو خوانێ ئاماڎێ و چەمەڕاو مانا یان لەزەتێ تایبەتی جە دەقی کەرۊ، بەڵکووم بەپاو زەینه و وېش چنی دەقی گنۆ دەمدوو و مانا یان لەزەتش چنە کەشف کەرۊ. پەوکای دوور نېیا وەردەنگیچ بەجۊرێوە خەللاق بۊ بەتایبەت وەختیێ ‌ وەردەنگ تاکو ئاستوو ڕەخنەگری بەرزبۊوە. چی قۆناغێنە ڕۆتوو ڕەخنەیچ سەرهۆرمڎۆ و وەردەنگی ئامادە و ساحیب هاز، گنۆ وانایۆ دووباره و دەقەکاو و کەشفی تازەی و تەنانەت هورسەنگنای دەقەکایچ . چېگەنە ڕۆتی شێعریی ڕوو بە پەردا‌خیی ملۆ. پېسە واچی کاروانەکە بە کامڵی گنۆ ڕا، بەڵام ڕاکێ ئەوەنەبڕیێنە و مەنزڵە نادیارە.
کۆتایی:
جە کۆتاییەنە ماچوو:
نەرم
پېسە قژاو شەمێ و
بێدەنگ
پېسە ناڵه و شێعرێ
گېیان کارەوان
ئارام ئارام.[1]