خانەوادە جە هۆرامانەنە

جە کۊمەڵگای ئێنسانېیەنە خانەوادە بە تاقمېوی ماچیۆ کە جە ڕاو ها‌م ونی یا ‌زەماوڼێوە و یا یاگێو ژیوای هامبەشیەوه، ‌ بە یەکترینی پێوەنیشا هەن.
ئۊسا خانەوادە جە هۆرامان وەروەڵا بېیەن. یانېو دویەر پەشتێ پێوەرە ژیواینێ. ژەن و پیا، ئەڎا و تاته و پیای و هەر پاسە زارۆڵێ کە بڕېو وەختێ کوڕێ گۆرێ ئی خانەوادەیە ژەنی ئارێنێ و هەڵای جیا نەبېیێبێنێ و چاگە ژیوێنێ.
پیا جە هۆرامان پێسه و گرڎوو کۊمەڵگاکا، ڕەئیسوو خانەوادەیا کە گرڎوو باروو مۆدیریەتی ئابووری و ماڵی یانەی ئینا سەرو شاناو ئاڎیەو. پیا پێسه و شوو ژەنی و تاته و زارۆڵا، جە یانەنە ساحېبوو نفووز و قۆدرەتیا و گرڎوو خانەوادەی ئینای شۆنه و ئێتاعەتوو پیایەنە. ئا هەرمانێ کە قۆرسێ بێنی پێسه و هەرمانه و باخی و یا کاروان کەرڎەی و ئەسای و ورەتەی، ئەرکوو پیای بێنی.
ژەنی جە یانەنە کارش یانەڎاری، شووداری و زارۆڵەداری بێ. بەڵام بێجگە ئی کارا، شان بەشانوو پیای، بڕېو هەرمانی کەرۍ. پېسە کاروو باخی و ئاژەڵداری کە بە ڕاسی قەوەتی ژەنی هۆرامانی وەختێو دیاری دێ کە هەرمانه و باخی کەرۍ و جە ئاڵف کەڼەی و لۊ پېتەی هیچ جە پیای کەم نارێ. و یا وەختێو کە نیشێ دەرزە هېزماوە. وەختی فرە بېیەن زارۆڵە کۊڵشه و یا وەرەشەنە دەرزە هېزمیچش گېرتەن کۊڵێوە و جە مڵکەنە ئامەێنەوە ئه و دەگا.
زارۆڵێچ هەر جە سنعی واره و نەقش و وەزیفەشا دیاری کریێ. جە هۆرامان کوڕ فرەتەر جە کناچۍ هەرمانەش دریا‌ینە ملەره. پێسه و یارڎی دای تاتەی جە هەرمانه و مڵکیەنه، ئاڵف کەڼەی و ‌ حەیوان لەوەڕنای. کناچېچ فرەتەر جە یانەنە یاوەری ئەڎایش دانش پێسه و یانە پۆختە کەرڎەی و بېشکە جمنای و هەوەڕ شتەی.
هەر یانېو پەنج شش زارۆڵێش بېیېنۍ. چوون ژەنی نەتاوانشا وەرگیری کەرا. ژەنی بېیېنە تاکو (15) زارۆڵێش بېیېنۍ و وەختوو لەمەپەڕیش هەرمانەیچش کەرڎێنه. ئەۆسا ژەنی جە پیای ڕەنجی فرەتەرش کېشتەن. ژەنی لەمەپەڕە بېیېنە لواینە پەی هېزما، جە کەشەو زارۆڵەش بېیەن. گېڵناوە ژەنېوە وەزیش تەکنەینێ. قەڎوو وەزەکێوە پنە گیریۆ، وەزۊرە زارۆڵەکەیش وینۆ. ئینەیە وەراوەر کەردێ چنی ژەنی ئیسەیە بە مەحزێو لەمەپەڕە بیە ئێتر تاکو وەختوو زارۆڵە دیەیش ژیوایش ئه و وېش و خانەوادەیش تاڵ کەرۊ.
بە پېچەوانه و ئیسەیە جە هۆرامان تەڵاق فرە کەم بېیەن. ژەنی بۊنه و کەم دەسەڵاتیش بە هەر شەرتێ حازرە بە ژیوای چنی پیای بێێنە.
ئۆسا نەزمېوی خاس جە یانەنە بېیەن. گرڎ کەس قسێ گەوره و یانەیش قەبووڵێ کەرڎێنێ.
حۆرمەت دلۍ خانەوادەو ئەۆساو هۆرامانی یاگێوە هێقمە و فرە بەرزەش بېیېنە تاکو ئا یاگێ، کناچۍ هیچ وەخت نەکەرڎەنش هەرمانۍو دەگانە بە خرابی نامېش بەرا. چوون کۊمەڵگا گولالە بېیەن. زارۆڵە تاکو گەورەتەر جەوېش لاشەنە بېیایا، پای نەکېشېرە. ڕیش چەرمە بېیەن قەتڵەش وەشە کەرڎێنە و دوێ تایفێش دەینێ ئاشتی، بەڵام ئیسە ئێتر ئا قۆربە نەمەنەن.
قە‌ناعەت جه دلۍ ‌ هۆرامانیە‌نە نموودېوی عالش بېیەن. گرڎوو خەڵکی پێسه و یۆی بیێنی. کەس دڵش نەشیەن دارایی یۆتەری. چەم و هام چەمی فرە کەم بېیەن. بە ژیوایوی ساڎە و فەقیرانە عاڎەتشا کەرڎەن. وەلحاسڵ ئینە ئاژه و خانەوادەی جە هەرامانەنە بېیەن کە بە کوڵی باس کریا.
بە پەیلواو شما ئۊسا خاستەر بېیەن یا ئیسە؟
ئیبراهیم شەمس.[1]