وەهار ئینا ڕاوە
نەم نەمێو بوەو وەهاری میە و دەنگو قاڵاوا و دارکۆی دلۍ باخانە میە گۊش و مریچیڵێ خەبەر مارا کە وەهار ئینا ڕاوە
سارا و دەشت و دەر بەهەشت مرمانۆ
مۊرەی هەوای وەش٫ وەش ئەژدەر شانۆ
لالە گەرڎەن کەش توی دیڎە ڕەشتەن
گۆیا عەتری یار وە ڕووشدا وەشتەن.
قووڵ و وەرەتاو و گزیچار و مەرەقووڵە و هانەو ناوېیا پەڕ بېیەن ڕنگڵێ و
قەڵاگا بە گۆراڵێ وېش ڕازنانوە پەی یاگێو قەراروو گجیە سوور و کەوا و تەزبیە بە دەسا
وەلێ مەزانا کە:
بەمن چېش وەهار سەرسەوز و مەسەن
من چەنی پاییز قەرارم بەسەن.
وەهار خەیلێوەن جە وەڵاتوو ئېمەنە و جە یاناو ئېمەنە بارش بەسەن و یاگێ وېش دێنەش بە خەموو خەفەتی کە هەر دمایش نمیە
مریچڵێ پۆپەو نەرەی بۍ گەڵای
تۆ هەر پېسەو وېت مەنێنی هەڵای
بڎیە زەمانەی منش پیر کەرڎا
کەرڎاش شەریکوو هەناسە سەرڎا
جاران چی وەختنە تەنیا خەفەتما ئانە بۍ داخۆم شەو عەیدی واران وارۆ؟
ئاخر ئەر واریا نەتاوێنمێ ئاویر کەرمېوە و ترێقەکێما نەتەقێنی!!
زانێنمێ هەمیشە ئەوەڵین ئاویر لالۊ حەمەزارا کەرۊشوە.
جاران چی وەختنە زارۆڵێ دلۍ مڵکانە خەریکوو چنیەو وەنەوشەی بێنێ، ئیسەیچ نەزانام ئا گرڎ وەنەوشەمە پەی چېشی چنی؟ هەر چن لالۊ ڕەحمان (عالە)زانیاش پەنەما نەمدرێ تاکو مەدرەسە!
دەیبۊ ئینەی وەش کەرە!!!
سەبا سەرو سەفێوە ئامووزگار و مۆدیر نامۍ شلۆقا و بازیکۆنا و وەنەوشە دزا و نەرگز کەننا و پیچان کەرا وەنێنێوە و ئارێنېشا بەرو بە خەتکېش ئڼە کېشێنێ دەساشارە تاکو دوێ یەرێ زەنگێ نەتاوێنی قەڵەم گېرا دەسشاوە.
ئاڎێچ یانەشا ئاوەڎان سەفەرێو وېشا نەنیا یاگێما نەپەرساشا خۊ دەرسنە زرنگێنی چی کۊشمێشا؟ ڕایێ نەواتشا ئەر دۆڵەو یەگوی بازی نەکەرا، ئەر شارەگڕ نەکەرا، ئەر نەلا پەی بنەوا قەڵاتا پەی نەرگۆزا، ئەر پیچانی نەکەرا
ئەر ششخان نەکەرا دەی مشۊ چیش کەرا، ھەڕەو کۆی پیما ئەی چکۆ کەمېو وەشی کەرا
نەواتشا خۊ ئاڎێ زارۆڵێنێ و مشۊ کېڵۍ کەرا نەواتشا خۊ گرچېو دەرس وەنای نیا
نەواتشا با جە زاڕۆڵەیشا لەزەت بەرا چوون تاکو چەمۍ کەراوە گەورێ با و خەموو خەفەت ڕوەشا کەرۊوەنە و زەمانە خاس حاڵیێشا کەرۊ!!
ئەڎاو تاتەیچ هەر ئێننە داواو پووڵیت نەکەرڎیا چەنەشا و بزڵەکێت خاس لەوەڕنیانێ ئێتر لتێوت لویاوە لا کارشا نەبۍ سەرتوە.
گرڎوو ئا چېوا پېسەو شرێتێوە ڕەڎ کەری ئاما و لوا و خەریکوو تەمامیاین
ئېمە مەنێنمێ و هەزار خاترێ تاڵ و شیرینێ و
هەزار ئاواتێ.
دڵوەشی جارام نەزانام کۊ ڕەما یاڎش بە خەیر
بەرزە باڵای عەرعەرینم کەی نەما یاڎش بە خەیر
خاس پەیشان خاترێش کەرڎيمێ ڕۊتوو مانگ و ڕۊی
کۆڕ و کۆگاو دڵوەشا و خاترجەما یاڎش بە خەیر
ئەجیۆ هېزی بی قەڵاو لاو یانەکەیما دېوە دەنگ
باڎە باڎە و ویوە ئاما و کۆن زەما یاڎش بە خەیر
بە ئاواتوو لەزەت بەرڎەی جە تەنیا فرسەتوو ژیوای.
مادێح سەحرایی.[1]