=KTML_Bold=دەمارگیریی و گەمژەیی=KTML_End=
#هۆمەر محەمەد#
دەمارگیریی و گەمژەیی نەک دژی یەک نین، بەڵکوو وەک خۆشەویستی و ئازادی عاشق و مەعشوقی یەکدین. لە بنەڕەتەوە دەمارگیریی لە مێرگی گەمژەییدا سەوزدەبێت و گەمژەیش بەرهەمی دەمارگیرییە. جا دەمارگیریی ئایینی وئایدۆلۆجی بێت یان نەتەوەیی، بەرهەم و دەرئەنجامەکەی هەر تاوان و خراپەکارییە، نەک ئاسوودەیی کۆمەڵگە. ئەوەی لە #کەرکووک# گوزەرا و دەگوزەرێت لە ئێستا و ڕابردوودا چاوچنۆکی و تەماحی نەوتە و بەدەمارگیریی و گەمژەیی دەشاردرێتەوە.
ئێمە حیزبی کوردی دەناسین و دەزانین، کە لە بەها ئەخلاقییەکان دوورن و پەتای گەندەڵی چووەتە مۆخییەوە و وابەستەی خێڵ و بنەماڵە و تایەفەیە. دەشزانین جگە لە دزینی سامانی کەرکووک سەروسەکوتێکی ئەوتۆی لەگەڵ کوردستان و مافی نەتەوە و گەلی کوردستان نەماوە. دەزانین ئەگەر #بەعس#ییەکان گوندی کوردستانیان ڕووخاند ئەمانیش مرۆڤی کوردیان ڕووخاندووە، ئەگەر بەعسییەکان فیزیکی مرۆڤی کوردیان دەکوشت ئەمان ڕۆحی کوردبوون دەکوژن! بەڵام خۆ ناکرێت لە ڕقی ئەوان ئاگر لە ماڵی خۆمان بەردەین و شوناسی کوردستانییبوونی خۆمان بسوتێنین، خۆ ناکرێت هەر سەرکۆنەی دەسەڵاتدارانی هەرێمی کوردستان بکەین لە ستەمکارییەکانی دەوڵەتی ئێراق و میلیشیاکانیان بێدەنگ بین. خۆناکرێت لەبەر ئەوەی دەسەڵاتدارانی هەرێم گەندەڵ و نابەرپرسیارن، مافە ڕەواکانی خەڵکی کوردستان بخەینە خانەی دەمارگیریی نەتەوەییەوە و لە ئاست سیاسەتە توند و ڕەقەکانی دەوڵەتی ئێراق و توندرەویی میلیشیا حیزبی و ئایینیەکان بێدەنگ بین و قسەیەکمان نەبێت.
زۆر گرنگە مرۆڤ دژی دەمارگیریی نەتەوەیی بێت، بەڵام خۆناکرێت هەر دژی دەمارگیریی کوردەکان بیت و چاوت تاوان و دەمارگیریی ئەوانی دی نەبینێت. یاخود بۆ ئەوەی پێت نەڵێن نەتەوەپەرست دڵرەقی و توندڕەفتاری نەتەوەکانی دیکە نادیدە بگریت.
بەشبەحاڵی خۆم دژی دەمارگیریی و فاشیزمم، جا چ هیی کورد بێت دژی عەرەب و تورکمان چ هیی ئەوان بێت دژی کورد. دژی دەمارگیریی ئایینی و ئایدۆلۆجیم، جا چ هیی ئیسلامییەکان بێت دژی عەلمانییەکان، چ هیی عەلمانییەکان دژی ئیسلامییەکان.
گرفتەکە ئەوەیە مرۆڤ لەسەر ڕق هەڵوێست وەرگرێت نەک لەسەر بنەمایەکی عەقڵانی، دەی خۆ دەستەڵاتدارانی کەرکووک فریشتە نین و کوردەکان شەیتان بن، زەق بە بەرچاوانەوە عەرەبەکان و تورکمانەکان لە کەرکووک شەڕی داد ناکەن بەڵکوو شەڕی مافەکانی کورد دەکەن و بێشەرمانە پشتیان بە سوپا و میلیشیاکان بەستووە، سوپایەک کە لە بەردەم #داعش# خۆی نەگرت، نەک کەرکووک بەڵکوو تکریت و ڕومادی و دیالەشی بۆ نەپارێزراو ئەوەی کەرکووکی لە داعش پاراست کوردستانیان و پێشمەرگە بوون. کەچی ئێستا هەمان سوپا بێتەوە و بێشەرمانە خوێنی کەرکووکییەکان بڕێژێت و کوردیش بێدەنگ بێت؟ ئەمە چییە، کاکم دژی حیزبە کوردستانییەکانە. دەی ئەمە چ جۆرە تێگەیشتنێکە لە مافی ئەوانی دی؟
ئەی بۆچی ئەوە مایەی هەڵوەستە و تێڕامانی کوردستانییەکان نەبێت، کە عەرەبەکان و تورکمانەکان و هێزە میلیشیاکانیان شەش ڕۆژی ڕەبەق ڕێگای سەرەکی #هەولێر#-کەرکووک دابخەن و پشێوی بنێنەوە و کێشە بۆ هاتوچۆی هاووڵاتییان درووست بکەن، حکومەت لە گوڵ کاڵتریان پێ نەڵێت، بگرە سوپاسیان بکرێت، کەچی خۆپیشاندەرانی کورد گوللەباران بکرێن کە لە دژی ئەو ناهەقییە هاتبوونە دەنگ. [1]