رۆژنیوز دلێر عەبدولڕەحمان
بەپێی ئامارێکی بەڕێوەبەرایەتی گشتی بەرەنگاربونەوەی توندوتیژی دژی ئافرەتان لەهەرێمی کوردستان، لەماوەی 9 مانگی سەرەتای ئەمساڵدا زیاتر لە 5 هەزار حاڵەتی توندوتیژی بەرامبەر بەژنان تۆمارکراوە.
بەپێی ئەو ئامارە کەوێنەیەکی دەست (ڕۆژنیوز) کەوتوە لەماوەی 9 مانگی سەرەتای ئەمساڵدا 5519 حاڵەتی توندوتیژی بەرامبەر بەژنان تۆمارکراوە کە 2087 یان لەپارێزگای هەولێر و 1285 یان لەپارێزگای دهۆک‌ و 934 یان لەپارێزگای سلێمانی و 727 یان لەئیدارەی گەرمیان و 361 یان لەئیدارەی ڕاپەڕین‌ و 162 حاڵەتیشیان لەسنوری ئیدارەی سۆران تۆمارکراون.
بەپێی ئامارەکە حاڵەتەکانی توندوتیژی لەماوەی ئەو 9 مانگەدا بریتین لە 30 حاڵەتی کوشتن‌ و 29 حاڵەتی خۆکوشتن‌ و 165 حاڵەتی سوتان‌ و 67 حاڵەتی خۆسوتاندن‌ و 105 حاڵەتی دەستدرێژی سێکسی و 5123 حاڵەتی سکاڵا تۆمارکردن.
لەئامارەکەدا دەردەکەوێت کە مانگی ئەیلول زۆرترین ڕێژەی توندوتیژی تێدا تۆمارکراوە کە 781 حاڵەتەوە و بەپێچەوانەشەوە مانگی کانوونی دووەم کەمترین ڕێژەی تێدا تۆمارکراوە کە 471 حاڵەتی توندوتیژیە.
بەپێی ئامارەکانی ئەو بەڕێوەبەرایەتیە ڕێژەی توندوتیژی بەرامبەر بەژنان بەبەراورد بەساڵی 2013 زۆر زیادیکردوە بەڕادەیەک لەماوەی 12 مانگی ساڵی 2013 دا 5307 حاڵەتی توندزوتیژی بەرامبەر بەژنان تۆمارکراون، کەچی تەنها لەماوەی 9 مانگی ئەمساڵدا ڕێژەکە بەرزبۆتەوە بۆ 5519 حاڵەتی توندوتیژی.