سەرەڕای ئاستەنگی ئەمنی و قەیرانی دارایی لەمساڵدا ڕێژەی گەشتیارانی فڕۆکەخانەی نێودوڵەتی سلێمانی زیادیکردوە، هەروەک 70 هەزار تەن شتومەک لەڕێی فڕۆکەخانەکەوە گەیەندراوەتە سلێمانی.
زریان محەمەد، سلێمانی: ساڵی 2014 بۆ شارەکانی هەرێمی کوردستان ساڵی پڕ قەیرانی ئەمنی و دارایی بون بەتایبەتیش لەشەش مانگی کۆتایدا، بەڵام لەروی گەشتی فڕۆکەوانیەوە ئه و ئاستەنگانە بەدیناکرێت.
بەڕێوەبەری فڕۆکەخانەی نێودەوڵەتی سلێمانی، تاهیر عەبدوڵڵا ئەمڕۆ چوارشەممە، لەکۆنگرەیەکی ڕۆژنامەوانیدا ڕایگەیاند، لەساڵی 2014دا 518 هەزارو 891 گەشتیار لەرێی فڕۆکەخانەی سلێمانییەوە گەشتی هاتن و ڕۆشتنیان ئەنجامداوە و بەبەراورد بەساڵی 2013 بەڕێژەی 39% زیادیکردوە کە ئه و ساڵە ژمارەی گەشتیاران نزیکەی 373 هەزار کەس بوە.
وتیشی، لەمساڵدا 6907 گەشتی فڕۆکە هەبوە، بەڵام لەساڵی ڕابردو 5965 گەشتکراوه.
بەهۆی ناکۆکیەکانی نێوان هەولێر و بەغداد، لەمانگی شوباتی ئەمساڵەوە حکومەتی ناوەند ناردنی بەشە بودجەی هەرێمی کوردستانی ڕاگت و بەهۆیەوە قەیرانی دارایی و دواکەوتنی بودجەی پڕۆژەکان و موچەی فەرمانبەرانی و گرانکردنی سوتەمەنی و شمەکی بەدوای خۆیدا هێنا.
هەروەک لە10ی حوزەیرانی ڕابردو ڕێکخراوی دەوڵەتی ئیسلامی هێرشەکانی بۆ دەستبەسەراگرتنی ژمارەیەک لەشار و شارۆچکەکانی عێراق دەستپێکرد و دواتریش شەڕی ڕوبەڕوو ڕاستەخۆی لەگەڵ هێزی پێشمەرگە هەڵایساند.
سەبارەت بەدەستبەسەراگرتنی بەڵگەنامەی ساختە و گەڕاندەوەی هاوڵاتیان، تاهیر عەبدوڵڵا وتی، لەساڵی 2014 توانراوە 106 بەڵگەنامەی ساختە دەستی بەسەردابگیرێت و 128 کەسیش بۆ وڵاتەکانی خۆیان سنورداش بکرێنەوە بەهۆی ئەوەی بەڵگەنامەکانیان تەواونەبوە و 94 کەسیش لەسلێمانیەوە سنورداشکراونەتەوە و 5005 کەسیش بەفیزای فڕۆکەخانە هاتونەتە ناو سلێمانیەوە.
دەربارەی شمەکیش ڕایگەیاند، لەرێگەی فڕۆکەخانەی سلێمانیەوە 70 هەزار تەن شتومەک هاتونەتە ناو سلێمانی و 164 ئاژەڵی جۆراوجۆرو 23 پەلەوەر بەپێی ڕێنمایی هێنراونەتە شارەکەوە.
بەڕێوەبەری فڕۆکەخانەی نێودەوڵەتی سلێمانی ئاماژەی بەوەشدا، لەمساڵدا هیچ فڕۆکەیەکی بارهەڵگری چەک و تەقەمەنی لەفرۆکەخانەکەیان نەنیشتۆتەوە.
- 01-01-2015