هەڵوێست ئەنوەر
کۆمپانیای ئەفرێنی بەریتانی کە لەهەرێمی کوردستان کاری گەڕان و بەرهەمهێنانی نەوت دەکات بێئومێدی خۆی لە کێڵگەی نەوتی بەردەڕەش دەربڕی دوای ئەوەی بەپێی دواین پشکنینەکانی ئه و کێڵگەیە دەرکەوتووە پێشبینی بوونی نەوت له و بیرەدا لە %80 کەمیکردووە.
کۆمپانیای ئەفرینی بەریتانی بۆ نەوت و غاز لە میانەی ڕاپۆرتی پێداچوونەوەی یەدەگی ساڵانەی کۆمپانیاکەیان بۆیان دەرکەوتووە کە پێشبینییەکان بۆ یەدەگی نەوتی کێڵگەی نەوتی بەردەڕەش لە هەرێمی کوردستان بەشێوەیەکی بەرچاو کەمیکردووە و ئێستاش بژاردەکانی بەردەستیان تاوتوێدەکەن.
تۆبی هایوارد بەڕێوەبەری جێبەجێکاری کاتی ئەفرێن کە ناوەندی کۆمپانیاکەیان لە لەندەنە لە نووسراوێکدا ڕایگەیاند: کۆمپانیاکەیان بژاردە ستراتیژییەکانی بەردەستیان بۆ کێڵگەی نەوتی بەردەڕەش تاوتوێدەکەن. دەشڵێت: بەردەوام دەبین لە کارکردن لە فۆکوس خستنەسەر کێڵگەکانی ئەفریقا و هەروەها دابینکردنی سەرمایە بۆ ئه و پرۆژانەی کە سوودی نەختینەییان هەیە.
بەپێی ڕاپۆرتەکەی ئەفرێن بڕی نەوتی یەدەگی بەردەڕەش بەپێی دوایەمین پشکنینەکانی ئه و کێڵگەیە دەرکەوتووە لە 1.24 ملیار بەرمیل نەوتەوە کەمبووەتەوە بۆ 250 ملیۆن بەرمیل نەوت کە دەکاتە %80-ی ئه و بڕە نەوتەی کە لە کێڵگەی بەردەڕەشدا خەمڵێندرابوو.
دوابەدوای ئەم ڕاپۆرتەش پشکەکانی کۆمپانیای ئەفرین لە بازاڕی دراوەکانی لەندەن گەورەترین دابەزینی بەخۆیەوە بینی لە ماوەی شەش ساڵی ڕابردوودا و بەڕێژەی %28 دابەزی.
ئەفرین خاوەنی لە %60-ی پشکەکانی کێڵگەی نەوتی بەردەڕەشە و جگە لە هەرێمی کوردستان لە ئەفریقاش کاری وەبەرهێنانی نەوت دەکات.
12-01-2015