بەناوی خوای گەورەو میهرەبان
هاوڵاتیانی سەربەرزی کوردستان
کەس و کاری شەهیدان
پێشمەرگە قارەمانەکان
رێکخراوەکانی کۆمەڵی مەدەنی
حزب و لایەنە سیاسیەکان
بەداخ و پەژارەیەکی زۆرەوە هەرێمەکەمان بەدۆخێکی ناوخۆیی ناتەندروست تێدەپەرێت و پرۆسەی دیموکراسی بەئاراستەیەکی نەخوازراو دا دەروات، ئێمە لە یەکگرتووی ئیسلامی کوردستان هەر لەسەرەتاوە پێشبینی ئەم دۆخەمان دەکرد، بۆیە داوای لەیەکتر گەیشتن و سازانمان دەکرد لەنێوان لایەنەکاندا تاکو ئەزمونەکەمان لەدابەشبون و لێکترازان بپارێزین، بەڵام بەداخەوە ئەم دڵسۆزیەی یەکگرتووی ئیسلامی کوردستان لەلایەن هەندێک کەس و لایەنەوە نەنرخێندراو خوێندنەوەی هەڵەو نادروستی بۆ کرا، لای هەموان ئاشکرایە لەلایەکیتریشەوە شەری تیرۆر (داعش) و ڕوبەروبونەوەی مەترسیەکان، پێویستی بە ڕێکخستنی نێوماڵی کوردی و یەکدەنگی و یەکریزی لایەنەکانە.
یەکگرتووی ئیسلامی کوردستان وەک هەمیشە دژی دوو ئیدارەیی و شکاندنی شکۆی دامەزراوە سیاسی و دەستوری و شەرعیەکانی هەرێمی کوردستانەو دەبێت هەموان خەمی پاراستن و گەشەدان بەو دەستکەوتە نەتەوەیی و نیشتیمانیانە دابین و نەیانکەینە ئامرازو میکانیزمی یەکلاکردنەوەی ململانێ سیاسی و حزبیەکان، بەڵکو بەپێی چوارچێوەو ڕێکارە یاساییە کارپێکراوەکان مامەڵەیان لەگەڵ بکرێت کەبەداخەوە ئەوەی ئەمرۆ ڕوودەدات پێچەوانەی ئەو ڕێکارە کارپێکراوانەیە.
بۆیە داوا لەهەموو لایەک دەکەین بەدان بەخۆداگرتن و دووربینی و ئاییندەسازی و دوور لە زمانی زبرو گیانی تۆڵەکردنەوە مامەڵە لەگەڵ دۆخەکە بکەین تاکو ئاراستە هەڵەی پرۆسەی سیاسی ڕابگرین و ئەزمونی نیمچە دیموکراسیمان بگێرینەوە بۆ ڕێڕەوە سیاسیەکەی خۆی و ئەزمونە تاڵەکانی ڕابردووی حوکمرانی کوردستان دووبارە نەکەینەوە.
جەماوەری خۆشەویست:
ئێمە لە یەکگرتووی ئیسلامی کوردستانەوە پشتگیری داواکردنی مافە مەدەنی و پیشەیی و چاککردنی بژێوی پێشمەرگەو مامۆستایان و فەرمانبەران و سەرجەم چین و توێژەکان دەکەین بەشێوازی مەدەنی و ئاشتیخوازانە لە چوارچێوەی ڕێکارە یاساییەکان، هەروەها داکۆکی لە پاراستنی موڵک و ماڵی گشتی و دوورکەوتنەوە لە زیانگەیاندن بەدام و دەزگاکانی حکومەتی هەرێم و سوتاندنی بارەگای حزبە سیاسیەکان دەکەین و هەموو جۆرە توندوتیژیەک و تەقەکردنێک لە هاوڵاتیان و بارەگاکان لەهەر کەس و لایەنێکەوە بێت ئیدانەی دەکەین.
یەکگرتووی ئیسلامی کوردستان جەخت دەکاتەوە لە پاراستنی گیانی پێکەوە ژیان و لێبوردەیی و یەکدەنگی و یەکریزی گەلەکەمان چونکە بناغەی پاراستنی ئەزمونی سیاسی و حوکمرانیمانە لەهەموو هەڵەیەک و بەهەڵەدابردنێک.
سەبارەت بەرووداوەکانی 12-10-2015 یەکگرتووی ئیسلامی کوردستان نیگەرانی قوڵی خۆی دەردەبرێت، چونکە ئاییندەی سیاسی و دیموکراسی هەرێمەکەمان ڵێڵ و تەم و مژاوی دەکات، بۆیە هاوڵاتیان دڵنیا دەکەینەوە ئێمە لەهەوڵەکانمان لەگەڵ لایەنەکان بەردەوام دەبین بۆ هێورکردنەوەی دۆخەکەو دۆزینەوەی چارەسەرێک بۆ کێشەکان هەتا دۆخەکە بگێرینەوە بۆ بارە ئاساییەکەی خۆی.
مەکتەبی سیاسی یەکگرتووی ئیسلامی کوردستان
12-10-2015