بەرەی گەل:
بەهۆی دەستپێکردنی شەڕی چەکداری لە نێوان چەکدارانی (پێشمەرگەی ڕۆژئاوای کوردستان) و یەکینەکانی بەرخۆدانی شەنگال(یەبەشە)، ” بەرەی دیموکراسی گەل” بەیاننامەیەکی بڵاوکردەوە، لەبەشێکیدا هاتووە:
ئامانجی تورکیا لەو شەڕەی شەنگال ئەوەیە سنورێکی تازە لەگەڵ داعش بکاتەوە لەکاتێکدا کە تیرۆریستانی داعش لەهەموو لایەکەوە گەمارۆدراوە و هیچ سنورێکی لەگەڵ تورکیا نەماوە.
دەقی بەیاننامەکەی “بەرەی دیموکراسی گەل” بەمشێوەیە:
جەماوەری گەلی ستەمدیدەی کوردستان
ماوەیەکی دوورودرێژە تورکیا هەوڵدەدا کێشە و دووبەرەکی بخاتە نێوان هێزە کوردییەکانی بەشە جیاوازەکانی کوردستان، لەو چوارچێوەیەدا دەوڵەتی تورک بە ڕاشکاوانە چەندین جار ڕایگەیاندووە شەنگال دەکاتە ئامانجی سیاسەتە گڵاوەکانی خۆی.
دوای ترافیکی دیپلۆماسی نێوان تورکیا و هەرێمی کوردستان و سەردانەکەی (بن عەلی یەڵدرم) بۆ هەریمی کوردستان و هەرە دوایش سەردانی (مەسعود بارزانی) بۆ ئەنقەرە، بابەتی ناردنی هێزێکی چەکدار بەناوی(پێشمەرگەی ڕۆژئاوای کوردستان) بۆ ڕۆژئاوای کوردستان لە ڕێگای شەنگال یەکێک لەتەوەرە گرنگەکانی سەرەکی گفتوگانیان بووە.
ڕۆژی هەینی 2017/3/3 لەناوچەکانی (سنونێ و خانە سۆر)ی دەڤەری شەنگال، کاتژمێر(6:00)ی بەیانی شەڕی چەکداری لەلایەن (پێشمەرگەی ڕۆژئاوای کوردستان) کە بە پاڵپشتی تورکیا و پارتی دیموکراتی کوردستان دروستکراوە لەدژی یەکینەکانی بەرخۆدانی شەنگال(یەبەشە) دەستیپێکرد.
ئەو هەنگاوە نەک هەر خزمەت بە بەرژەوەندی گشتی گەلی کورد ناکات، بەڵکو دژی یەکێەتی نەتەوەیی و یەکڕیزی ناوماڵی کوردە و خەونی سەربەخۆیی کورد لەباردەبات.
دەسەڵاتدارانی هەرێمی کوردستان لەبری ئەوەی چارەسەری قەیرانەکانی ناوخۆی هەرێمی کوردستان و باشترکردنی باری گوزەران و پێدانی مووچەی تەواوی خەڵک، بەتایبەتی ژیانی پێشمەرگەکانی هەرێمی کوردستان بکەن و خزمەتگوزاری دابین بکەن، بەو هەڵوێستەیان بارودۆخی ژیانی خەڵک خراپتر دەکەن و سەرباری قەیرانەکان، جەماوەریش دووچاری شەڕی کورد کوژی دەکەنەوە، ئەوەش ڕاستەخۆ خزمەت بە دوژمنانی کورد بە تایبەتی تورکیا و (داعش) دەکات.
ئامانجی تورکیا لەو شەڕەی شەنگال ئەوەیە سنورێکی تازە لەگەڵ داعش بکاتەوە لەکاتێکدا کە تیرۆریستانی داعش لەهەموو لایەکەوە گەمارۆدراوە و هیچ سنورێکی لەگەڵ تورکیا نەماوە.
چۆن لە ساڵی (2014)دا ڕادەستکردنی شەنگال و جینۆسایدکردنی ئێزیدیەکان و کەنیزەکردنی (ژنان)ی کوردی دەڤەرەکە و بۆ تەواوکردنی گەمارۆدانی ڕۆژئاوای کوردستان لە ڕێگای داخستنی خاڵی سنوری ڕەبیعە ئامانجی تورکیا و سەرانی حکومەتی هەرێم بوو، ئێستاش بەهەمانشێوە هەوڵی داگیرکردنی ئەو ناوچانە لەسەر خواستی تورکیا و دەسەڵاتدارانی هەرێم بۆ کردنەوەی خاڵێکی پەیوەندییە لەگەڵ داعش بۆ ژیاندنەوە و یارمەتیدانی داعش، پاش ئەوەی خاڵی کۆنتاکتی نێوان تورکیا و داعش بەرەو کۆتایی دەچوو.
ئێمە وەک (بەرەی دیموکراسی گەل)، دەستپێکردنی شەڕ لەدەڤەری شەنگال ئیدانە و مەحکوم دەکەین، هاوکات دەستوەردانی دەوڵەتی فاشیزمی تورک بەتوندی ئیدانە و مەحکوم دەکەین، داوای دەستبەجێی ڕاگرتنی ئەو شەڕە دەکەین و پێوویستە چەکدارانی (پێشمەرگەی ڕۆژئاوای کوردستان) هەرێمی کوردستان نەکەنە گۆرەپانی ڕمبازی، لەبری ئەوە کێشەکانیان بە دیالۆگ لە چوارچێوەی بەڕێوەبەرایەتی ڕۆژئاوای کوردستان چارەسەر بکەن.
بەرەی دیموکراسی گەل
03-03-2017