لەتەمەنی 14 ساڵان بە شو دراوە بە پیاوێک 15 ساڵ لەخۆی گەورەتر بوە
لە تەمەنی 36 ساڵان لەژێر ئەشکەنجەی هاوسەرەکەی کوژراوە
خاوەنی شەش مناڵ بوە.
کوێستان لە پێناوی منداڵەکانی هەموو شتێکی لە خدری هاوژینی قبوڵ کرد، ئەو چاوەڕێ بوو مێردەکەی ڕۆژێ لە ڕۆژان بەخۆیدا بچێتەوە و هەڵسوکەوتی بەرامبەری بگۆڕێ، بەڵام نەک هەر چاک نەبوو، بەڵکو کوێستانیشی لەژێر ئەشکەنجەدا کوشت. ئێستا مێردەکەی خۆی حەشارداوە و کەسوکاری کوێستانیش دەڵێن تاوەکوو تۆڵەی خۆیانی لێ نەکەنەوە، پرسەی بۆ دانانێن.
رۆژی 30-05-2017 تەرمی ژنێکی تەمەن 36 ساڵ بەناوی (#کوێستان.ح#)، دایکی شەش منداڵ، لە نێو ماڵەکەیدا لە گەڕەکی ڕاپەڕینی شارۆچکەی قەڵادزێ دۆزرایەوە. بەپێی ئەو پشکنینانەی بۆ تەرمەکەی کراوە، شوێنی ئەشکەنجەدانێکی زۆر لەسەر جەستەی دیارە. مێردەکەشی کە تۆمەتبارە بە کوشتنی، هەڵاتووە و شوێنی بزرە.
بە گوتەی کەسوکارەکەی، ئەو ئافرەتە هەر لە منداڵییەوە ژیانی پڕ بووە لە دەردەسەری، بە تایبەتی دوای ئەوەی باوکی مردووە و دایکی شووی کردووەتەوە. ئەو تەمەنی تەنیا 14 ساڵ بووە کاتێک باپیری بەشووی داوە.
حوسێن خدر، مامی کوێستان بە (رووداو)ی گوت، ئەوان زۆر نیگەران بوون کاتێک باوکیان کوێستانی بەشووداوە، چونکە کوێستان جگە لەوەی منداڵ بوو، 15 ساڵیش لە هاوژینەکەی بچووکتر بوو، بەڵام لەبەر ئەوەی باوکیان قسەی لە بەشوودانەکەیدا کردبوو، وەکو عورفێک نەیانتوانیوە قسە لە قسەی باوکیاندا بکەن.
حوسێن دەڵێت کوێستان تەنیا دوو سێ ساڵی یەکەم لەگەڵ هاوژینەکەی کێشەی نەبووە، ئەگینا بەردەوام کێشە لە نێوانیان هەبووە، چەند جارێکیش تۆراوە و ماڵی بەجێهێشتووە.
حوسێن ئاماژە بە کێشەکانی نێوان ئەو ژن و مێردە دەدات و دەڵێ خدر پیاوێکی ڕەزیل بوو، خەرجیی لە کوێستان و منداڵەکانی نەدەکرد، کوێستانیش ناچار دەبوو پارە لە خزم و کەسوکاری قەرز بکات، یان شت بە قەرز لە دووکانەکان بهێنێ، کاتێکیش خدر پێی دەزانییەوە بەردەبووە گیانی.
حوسێن دەڵێت کوێستان بەردەوام لە خدر دەتۆرا، ئەوانیش ناچار دەبوون سوڵح لە نێوانیان بکەن و کۆتایی بە کێشەکانیان بهێنن، بەڵام هەر کاتێک کوێستان دەگەڕایەوە، دووبارە کێشەکانی نێوانیان سەری هەڵدەدایەوە.
حوسێن چەند جارێک داوای لە برازاکەی کردووە، چیدی نەگەڕێتەوە لای خدر، بەڵام کوێستان پێیگوتووە :لەبەر خاتری منداڵەکانم ناتوانم لێی جیاببمەوە و ناچارم هەموو شتێکی لێ قبوڵ بکەم، بەڵکو خوایە ڕۆژێک بێت بەخۆیدا بچێتەوە و هەڵسوکەوتی بەرامبەرم بگۆڕێ.
حوسێن دەڵێت زۆر هەوڵمان لەگەڵ خدر دا، بەڵام سوودی نەبوو، هەر جارێکیش کوێستان دەتۆرا دەستی چەندین کەسی ماچ دەکرد، بەس بۆ ئەوەی کوێستانی بۆ ئاشت بکەنەوە.
مامی کوێستان باسی ڕۆژی ڕووداوەکە دەکات و دەڵێت لە دەرەوە بووە کاتێک بە تەلەفۆن هەواڵەکەیان پێڕاگەیاندووە، ئەو یەکسەر گومانی کردووە لەلایەن خدرەوە کوژرابێ. حوسێن گوتی خدر بە دار و سۆندە لە کوێستانی دابوو، بە پلایس گۆشتی لە جەستەی کردبووەوە، ئەشکەنجەی داوە تاوەکوو گیانی دەرچووە.
سەبارەت بە هەڵوێستی بنەماڵەکەیان دوای ئەو تاوانە، حوسێن گوتی: ڕووداوەکە تازەیە و هێشتا هیچ هەڵوێستێکمان بەرامبەر خدر و کەسوکارەکەی نەبووە، باوەڕمان بە تۆڵەکردنەوە نییە. بەڵام پرسەشمان بۆ کوێستان دانەناوە، چاوەڕێی یاسا دەکەین کاری خۆی بکات و بکوژی کوێستان دەستگیر بکرێ.
بە تەنیا کەسوکاری کوێستان نین کە قسەی باش لەبارەی خدرەوە ناکەن، بەڵکو نزیکترین کەسی خدریش کە دایکیەتی دانی خێر بە کوڕەکەیدا نانێت. (ئایش، ئا) کە دایکی خدرە، زۆر پەسنی بووکەکەی دا و گوتی کوێستان کەسێکی زۆر باش بوو، زۆر بە ئەدەب بوو، خاوەن ڕەوشتێکی بەرز بوو، بەڵام یەک کێشەی هەبوو، قەرزی زۆر دەکرد، بەردەوام لەگەڵ خدر لەسەر قەرز دەبووە کێشەیان، ئێمە زۆر تێکەڵی کێشەکانیان نەدەبووین، دەمانگوت ژن و مێردن و ئاشت دەبنەوە.
ئایش لەگەڵ ماڵی کوڕەکەی تەنیا دیواریان لە نێواندایە، لە کاتی ڕووداوەکەدا لە نەخۆشخانە خەوێندرابوو. ئایش گوتی بەیانی هاتمەوە ماڵەوە کۆڵانەکەمان پڕ بوو لە پۆلیس، گوتیان کوێستان کوژراوە.
ئایش باسی کوڕەکەی دەکات و دەڵێت لەدوای ڕووداوەکە هەڵاتووە و نازانین لە کوێیە. گوتیشی خدر کەسێکی بەکێشە بوو، لەگەڵ خزم و کەسوکاری خۆیشی باش نەبوو، تەنانەت قسەی لەگەڵ خوشک و براکانیشی نەدەکرد. ئایش حەز دەکات کوڕەکەی بە زووترین کات دەستگیربکرێ و سزای خۆی وەربگرێ.
دراوسێکانی کوێستان شایەتی دەدەن کە خدر لەگەڵ کوێستان زۆر خراپ بووە و دەڵێن چەندینجار کوێستانیان بەدەموچاوی ڕەش و شین هەڵگەڕاوەوە بینیوە.
دراوسێیەکی ماڵی خدر و کوێستان کە نەیویست ناوی بڵاوبکرێتەوە، بە (رووداو)ی گوت کوێستان ئافرەتێکی زۆر بێ کێشە بوو، زۆر بە کەمی دەهاتە دەرەوە. کێشەی خۆی لەلای دراوسێکانی باس نەدەکرد، بەڵام چەند جارێک بینراوە کە دەموچاوی ڕەش و شین هەڵگەڕاوە. دراوسێکان دەیانزانی کێشەی لەگەڵ مێردەکەی هەیە.
سەبارەت بە ڕووداوەکەش ئەو دراوسێیەیان گوتی هەتا هێزەکانی پۆلیس نەهاتنە گەڕەکەکەمان نەمانزانی کوێستان کوژراوە، بەڕاستی زۆر خەمبار بووین بۆ مەرگی ئەو ژنە، قەت لە یادمان ناچێ.
دایکی خدر لەبارەی چۆنیەتی زانینی ڕووداوەکە لەلایەن پۆلیسەوە گوتی کوڕێکی کوێستان چوو بوو هەواڵی بە پۆلیس دابوو، ئێستا پۆلیس ئەویشیان دەستگیرکردووە.
عوسمان محەممەد، یاریدەدەری بەڕێوەبەری نەخۆشخانەی شەهیدانی قەڵادزێ بە (رووداو)ی گوت، تەرمی ئەو ژنە پێش نیوەڕۆی ڕۆژی 31-05-2017 هێنراوەتە بەشی دادپزیشکیی نەخۆشخانەکەیان، لەوێ پشکنینی سەرەتایی بۆ کراوە و پاشان بەڕێکراوە بۆ پەیمانگەی دادپزیشکی سلێمانی.
سەبارەت بە ئەنجامی پشکنینەکە، عوسمان محەممەد گوتی: ئافرەتەکە 12 کاژێر بوو مردبوو، ئینجا هێنرابووە نەخۆشخانە. هەروەها شوێنەواری ئەشکەنجەدان بە جەستەیەوە دیاربوو، دیارە لەژێر ئەشکەنجەدا مردووە.
دۆسیەیان لە دادگا بووە
نووسینگەی بەڕێوەبەرایەتی بەرەنگاربوونەوەی توندوتیژیی دژی ژنان لە پشدەر، دوای ڕووداوەکە دەستیان بە بەدواداچوون کردووە. ڕائید عەبدوڵڵا بابە ڕەسوڵ بەرپرسی ئەو نووسینگەیە بە (رووداو)ی گوت ئەو ژنە تەمەنی 36 ساڵە و دایکی شەش منداڵە. تەرمەکەی لە ماڵەکەی خۆیدا دۆزراوەتەوە، شوێنەواری ئەشکەنجەدان و لێدان بەسەر جەستەیەوە هەبووە.
گوتیشی: ڕێکاری یاسایی گیراوەتەبەر و کەسی نزیکی ئەو ژنە بۆ لێکۆڵینەوە بانگکراوە و ڕاگیراوە.
رائید عەبدوڵڵا دەڵێت تاوەکو ئێستا بۆیان ڕوون نەبووەتەوە بۆچی ئەو ژنە کوژراوە، بەڵام دەڵێت گومان هەیە هاوژینەکەی کە ڕایکردووە، دەستی لەو تاوانەدا هەبێ، چونکە پێشتر سێ دۆسیەی لە دادگا هەبووە، ئەو ژنە داوای لەسەر هاوژینەکەی تۆمار کردبوو.