دواڕۆژ، عیسا عەبدولقەهار
سەرۆکی سەنتەری ستراتیژی کوردستان ڕایدەگەیەنێت، قەرزەکانی حکومەتی هەرێم 17 ملیار و 350 ملیۆن دۆلارە، لەهەمان کاتدا فەرمانبەران و چین و توێژەکانی تریش بڕی 6 ملیار و 700 ملیۆن دۆلاری حکومەتیان لایە.
ئاراس خۆشناو، سەرۆکی سەنتەری لێکۆڵینەوە و زانیاری ستراتیژی کوردستان بە دواڕۆژی ڕاگەیاند بەهۆی بڕینی بودجەی هەرێم لەلایەن بەغدا و شەڕی داعش و دابەزینی نرخی نەوت لە ساڵی 2014وە، حکومەتی هەرێم کەوتە ژێرباری قەرزێکی زۆر، بەڵام بەهۆی باشبوونی بارودۆخی دارایی هەرێم قەرزەکان دەدرێنەوە.
وتیشی حکومەتی هەرێم لەماوەی 2014 تا کۆتایی 2016، قەرزی لە بەڵێندەران و کۆمپانیا ناوخۆیی و بیانییەکان و کۆمپانیا نەوتییەکان و بانکە تایبەتەکان کردووە، بەشێوەیەک بڕی 7 ملیار دۆلار قەرزداری کۆمپانیا نەوتییەکانە، بڕی دوو ملیار و 800 ملیۆن دۆلار قەرزداری بانکە تایبەتەکان، بڕی یەک ملیار دۆلار قەرزداری کۆمپانیا ناوخۆیی و بەڵێندەرانە.
لەبارەی قەرزی فەرمانبەران و موچەخۆران، ئەوەشی وت قەرزەکانی فەرمانبەران و موچەخۆران کە لای حکومەتی هەرێمە گەیشتۆتە 8 ملیار و 50 ملیۆن دۆلار.
سەرۆکی سەنتەری لێکۆڵینەوە و زانیاری ستراتیژی کوردستان، ئاماژەی بەوەشکرد، لەگەڵ باشبوونی دۆخی دارایی و بەرزبوونەوەی نرخی نەوت، حکومەتی هەرێم دەستیکردووە بە دانەوەی قەرزی بەڵێندەران و کۆمپانیا نەوتییەکان، بەمەش کۆی قەرزەکانی حکومەت لەئێستادا 17 ملیار و 500 ملیۆن دۆلارە.
لەبارەی قەرزەکانی حکومەت لەلایەن فەرمانبەران و چین و توێژەکانی تر، ئاماژەی بەوەدا پێش قەیرانی دارایی حکومەتی هەرێم کۆمەڵێک قەرز و پێشینەی بە هاووڵاتیان داوە کە پێکدێن لە پێشینەی هاوسەرگیری و قەرزی بچووک و خانووبەرە و کشتوکاڵ و کەرتی پیشەسازی، بەمەش حکومەتی هەرێم بڕی 6 ملیار و 700 ملیۆن دۆلاری لای فەرمانبەران و چین توێژەکانی ترە.
وتیشی یەکێک لە بەدیلەکان بۆ کەمکردنەوەی قەرزەکان، حکومەتی هەرێم بەنیازە ئه و قەرزانەی لەسەریەتی بیداتەوە و ئەوانەشی کە لەلای بەشێک لە چین و توێژەکانە وەربگرێتەوە.[1]
27-08-2017