دواڕۆژ، #زریان محەمەد#
ماوەی چەند ساڵێکە کێڵگەی ماسیمان دروستکردووە و ساڵانە نزیکەی 70 تۆن بەرهەممان هەیە ئەمە وتەی خاوەنی یەکێک لە پڕۆژەکانی بەرهەمهێنانی ماسیە کە دەشڵێت پڕۆژەکانمان مەترسی لەسەر دروست بووە.
فەرەیدون محەمەد، خاوەنی کێڵگەی ماسی ڕەش لە شارباژێڕ بە دواڕۆژی وت، کێشەی ئێمە لە نرخدایە لەبەرئەوەی ماسی لە ئێران و باشورەوە زۆر دێتە کوردستان، کە نرخی ئەوان هەرزانە، ئەوەی ئێمەش بەهۆی ئەوەی تێچوەکەی زۆرترە گرانترە و زیان دەکات.
وتیشی وەرزی گەورەبوونی ماسی لای ئێمە لە مانگی تشرینی دووەم دایە، بەڵام ئێران لەوکاتەدا زۆرترین ماسی دێنێتە کوردستانەوە، لەکاتێکدا ماسی ئێرانی وەک ئەو ماسیەی ئێمە تامی خۆش نیە، هەر کیلۆیەک ماسی لەسەر ئێمە 2750 دینار دەکەوێت، لەکاتێکدا بەرهەمی ئێرانی دێت و بەو نرخە دەفرۆشرێت.
ئاماژەی بەوەشدا کۆمەڵێک پرۆژەی زۆر دایانخستووە بەهۆی ئەو ڕێژە زۆرەی هاوردەکردنی ماسی لە وڵاتانی دراوسێوە، حکومەتی هەرێمیش هیچ هاوکارییەکی کێڵگەکانی ماسی ناکات، نە لە پێدانی عەلەف و نە کارەبای پێویست، ئەمەش زیانی زۆری گەیاندووە بە کێڵگە پەلەوەر و ماسی.
ئه و خاوەن کێڵگەیە ئەوەشی خستەڕوو لە پڕۆژەکەم بەرهەمی ماسیەکانی (کارب و سلفەر و گراس) هەیە، هەر لە پڕۆژەکەی خۆم عەلەف بەرهەمدەهێنم و پەنجەماسیشم هەیە.
دەربارەی پێدانی گۆشتی ئاژەڵی مردوو بە ماسی، خاوەنی ئەو دەڵێت ماسی کە لە کێڵگەکان بەرهەم دێت گۆشتخۆرنین تا گۆشتیان بدرێت، ئێمە وێنجە و قامیش و سەوزە و و عەلەفیان پێدەدەین و سەوزاییش زۆرتر دەخۆن.
بۆ زیاترکردنی بەرهەمی ناوخۆ پسپۆرێکی سامانی ماسی دەڵێت، پێویستە هاوکاری تەواوی ئەو کێڵگە پەلەوەریانە بکرێت.
سەڵاح مەجید، پسپۆری بواری سامانی ماسی لە سلێمانی بە دواڕۆژی ڕاگەیاند بەخێوکردنی ماسی لە هەرێمی کوردستان بەراورد بە وڵاتانی دراوسێ تازەیە، لە سلێمانی کێڵگەکانی ماسی لە زیادبوندایە، بەرهەم هێنانیش لەزیادبوندایە، کۆمەڵێک کێشە و گرفتیش بۆتە هۆکاری داخستنی بەشێکی زۆری کێڵگەکانی ماسی و پەلەوەر.
وتیشی ماسی بە سێ شێواز بەرهەم دەهێندرێت، شێوازی یەکەم کێڵگەی گڵینە، شێوازی دووەم کێڵگەی کۆنکرێتیە، کە ماسی سەلەمونی تێدا بەرهەم دێت، شێوەی سێیەمیش کێڵگەی هەڵواسینە کە ئەوەش لە ناو دەریاچەکاندایە لەئێستادا ئەو جۆرە کێڵگانە لە ٪40 بەرهەمی ناوخۆی پڕدەکەنەوە وە لە ٪60 لەدەرەوە هاوردە دەکرێت.
ئاماژەی بەوەشدا ئه و بەرهەمی ماسییەی لە بازاڕدایە ماسی باشور و ناوەڕاستی عێراق و ئێران و کێڵگەکانی ناوخۆ و دەریاچەکانە، ئەگەر لەئێستادا گرنگی بە بەرهەمی ناوخۆ بدرێت لە داهاتوودا دەتوانرێت بەرهەمی ناوخۆی زیاتربێت و پشتی پێببەسرێت.
لای خۆیەوە ژووری بازرگانی سلێمانی لەپێناو پارێزگاریکردن لە بەروبومی ناوخۆی و پشتیوانیکردنیان، بەشی کشتوکاڵی زیادکردووە، لەدوای کۆکردنەوەی زانیاری لەسەر خانووی پلاستیکی و لەئێستاشدا سەرقاڵی کۆکردنەوەی ژمارەی کێڵگەی مریشک و پاشان کاردەکەن بۆ کۆکردنەوەی کێڵگەی بەرهەمهێنانی ماسی تا بتوانین لەوڕێگەیەوە داهاتی بەرهەمە ناوخۆییەکان بە حکومەت بدرێت و پارێزگاریان لێبکرێت.
سیروان محەمەد، سەرۆکی ژووری بازرگانی و پیشەسازی سلێمانی بە دواڕۆژی وت داوا لە ژوورە بازرگانیەکانی هەولێر و دهۆک دەکەم ئەوانیش ئەو ئەرکە بگرنەئەستۆ تا بتوانین پێکەوە کارێکی گەورە بکەین بۆ زیادکردنی بەرهەمی ناوخۆیی و ڕێگری لە بەرهەمە دەرەکییەکان.[1]
#22-06-2018#