بەڕێوەبەری بەشی یاسایی لە فەرمانگەی تەندروستیی #هەولێر# ئاشکرای دەکات لە پێنج ساڵی ڕابردوودا 238 سکاڵا لەسەر پزیشکان و کارمەندانی تەندروستیی هەولێر تۆمارکراون، ئەو پزیشک و کارمەندانەشی کەمتەرخەم بوون، سزادراون.
بڵاوبوونەوەی ڤیدیۆی نەشتەرگەریی هاووڵاتییەک بەناوی سەڵاح محەممەد لە هۆڵی نەشتەرگەریی یەکێک لە نەخۆشخانەکانی هەولێر کە کۆسەرەی تێدا بەکاردەهێنرێ‌ بۆ بڕینەوەی شیشێک کە لە جەستەی سەڵاح چەقیوە، هەرایەکی زۆری بەدوای خۆیدا هێنا. کار گەیشتە ئەوەی لێژنەی لێکۆڵینەوەی بۆ پێکبهێنرێ‌.
سامان بەرزنجی، بەڕێوەبەری گشتیی تەندروستی هەولێر بە (رووداو)ی گوت دوای بڵاوبوونەوەی ڤیدیۆکە لیژنەیەکمان پێکهێنا، حەوت کەس لە پزیشکی پسپۆڕ، کارمەندی تەندروستی و خزمەتگوزار گواستراونەتەوە، مووچەبڕکردن و سزادراون، هەندێکیشیان ڕێکاری کارگێڕییان بەرامبەر گیراوەتەبەر و ماوەی 6 مانگ لە پلەبەرزکردنەوە ڕادەگیرێن.
بە گوتەی دکتۆر سامان، سزادانی ئەو پزیشک و کارمەندانە بەهۆی ڕەچاونەکردنی تایبەتمەندیی نەخۆشەکە بووە کە ڤیدیۆکەیان بڵاوکردووەتەوە، نەک بەهۆی بەکارهێنانی کۆسەرە، چونکە لە هەندێک نەشتەرگەریدا ناچارن ئامێری وەکو درێل و کۆسەرە بەکاربێنن.
بەپێی ئاماری فەرمانگەی تەندروستیی هەولێر کە لەلایەن زەینەب محەممەد فەرەج، بەرپرسی بەشی یاسایی فەرمانگەکە دراوەتە (رووداو)، لە پێنج ساڵی ڕابردوودا 238 سکاڵا لەسەر پزیشک و کارمەندانی تەندروستیی هەولێر تۆمارکراون، بۆ ئەم مەبەستە 124 لێژنەی پزیشکی پێکهێنراون و بەدواداچوونیان بۆ 94 کەیس کردووە کە 17 کەیسیان ڕەوانەی دادگا کراون، 59 کەیسی هەڵەی پزیشکی هەبووە و، پزیشک و کارمەندە کەمتەرخەمەکانیش سزادراون.
گوتیشی: ئەمساڵ 9 کەیسی هەڵەی پزیشکی لەلای ئێمە تۆمارکراون، هەندێکیان سزادراون و هەندێکیش هێشتا لە دادگان، جگە لەو کەیسانەی ڕاستەوخۆ لە دادگا و پۆلیس و ئەنجوومەنی دادوەری تۆمارکراون، کە ئەمانە لەلای ئێمە تۆمار ناکرێن.
بەڕێوەبەری تەندروستیی هەولێر پێیوایە نەخۆشخانە حکومییەکان زۆر لە نەخۆشخانە ئەهلییەکان باشترن زۆربەی هەڵە پزیشکییەکان لە سەنتەر و نەخۆشخانە ئەهلییەکان دەکرێن و سکاڵایان لەسەر تۆمارکراوە، ئەمساڵ تەنیا یەک کەیس لە نەخۆشخانەیەکی حکومی تۆمارکراوە، ئەویش لە دادگا بێتاوان دەرچوو.
بەڕێوەبەری یاسایی فەرمانگەی تەندروستیی هەولێر دەڵێت کە سکاڵاکان کەمتر لەلای ئەوان تۆمار دەکرێن زۆربەی هاووڵاتیان لە دادگا سکاڵا تۆمار دەکەن، دادگاش بە نووسراو داوای پێکهێنانی لیژنەی زانستیمان لێدەکات و لیژنەکە پێکدێنین، ڕاپۆرتی لیژنەکەش دەنێرینەوە بۆ دادگا، بۆیە ئەمساڵ بە نووسراوی دادگا زۆرترین لیژنەی زانستیمان پێکهێناوە.
بەڕێوەبەرە یاساییەکە ڕەتیدەکاتەوە لە کەیسەکاندا پشتیوانی لە پزیشکەکان بکەن بەرگری لە پزیشک ناکەین، بەهۆی سکاڵای هاووڵاتیانەوە زۆر پزیشک و نەخۆشخانەمان سزاداون، پزیشک هەیە بە 50 هەزار دۆلار سزامانداوە، نەخۆشخانەمان بە 15 ملیۆن دینار سزاداوە.
$لە 5 ساڵدا تەنیا دەرمانسازێک بەند کراوە$
ئەو پزیشک و کارمەندە تەندروستیانەی سکاڵایان لەسەر تۆمار دەکرێت سزای جۆراوجۆر دەیانگرێتەوە، بەڵام لە 5 ساڵی ڕابردوودا تەنیا یەک دەرمانساز بەند کراوە، زەینەب محەممەد دەڵێت :ئەگەر پزیشک یان کارمەندە تەندروستییەکە میلاکی ئێمە بێت، بەپێی یاسای ئینزیباتی فەرمانبەران سزا دەدرێت، سزاکانیش بریتین لە سەرنجڕاکێشان، ئاگادار کردنەوە، سەرزەنشت، کەمکردنەوەی مووچە، دابەزاندنی پلە، هەروەها دەرکردن و عەزلیشمان هەیە کە دەبێت وەزیری تەندروستی واژۆی لەسەر بکات.
گوتیشی: لە پێنج ساڵی ڕابردوودا تەنیا یەک دەرمانساز بۆ ماوەی شەش مانگ بەند کراوە.
$رەچاوی مافی نەخۆش ناکەن$
د.فەتاح هەورامی، بەڕێوەبەری سەنتەری هۆشیاری و خۆپاراستن لەبارەی ڕەچاونەکردنی مافی نەخۆش لەلایەن پزیشک و کارمەندانی تەندروستی بە (رووداو)ی گوت :پارساڵ توێژینەوەیەکمان کرد و دەرکەوت پزیشک و کارمەندانی تەندروستی نەک هەر بەتەواوی کار بە پاراستنی مافی نەخۆش ناکەن، بەڵکو ئاستی هۆشیاریی کارمەندانی تەندروستی لەبارەی مافەکانی نەخۆش زۆر کەمە و مافی نەخۆش پێشێل دەکرێت.
لەماوەی 6 ساڵی خوێندنی پزیشکی تەنیا 12 کاژێر بۆ بابەتی پاراستنی مافی نەخۆش دانراوە، د. فەتاح هەورامیش پێیوایە پرۆگرامی کۆلێژە پزیشکییەکان گرنگی بەو لایەنە گرنگە نادەن و دەڵێت لە پرۆگرامە تازەکانی دونیادا گرنگییەکی زۆرتر بە پاراستن و مافی نەخۆش دراوە، بەڵام لە کۆلێژە پزیشکییەکانی ئێمە بەشێوەیەکی ڕووکەش دەخوێنرێ.
سەڵاح محەممەد، کە بەهۆی بڵاوبوونەوەی ڤیدیۆکەیەوە 7 پزیشک و کارمەندی تەندروستی سزادران، نیگەرانە و دەڵێت هەرچەندە بڵاوکردنەوەی ڤیدیۆکە لە تۆڕە کۆمەڵایەتییەکان ناخۆش بوو، بەڵام پزیشک و ستافەکەی زۆر خەمخۆرانە نەشتەرگەرییەکەیان کرد، بۆیە داواکارم وەزارەتی تەندروستی لە سزادانی ئەو پزیشک و کارمەندانە پاشگەزبێتەوە.[1]
#14-08-2018#