دواڕۆژ، #دهۆک#
هنگڤینێ سرۆشتی یێ چیایێن پارێزگەها دهۆک ل بازاری گەلەک کێم بوویە، سەرۆکێ کۆمەلا هنگەڤانێن دهۆک ژی دبێژیت: لەشکەرێ ترکیا 3 هنگەڤانێن وان کوشتینە و هێرشێن وی وەلاتی ئەگەرێ سەرەکینە ئه و هنگڤین کێم بووی.
شڤان چۆلی، وەلاتیێ باژارێ دهۆک ل بازارێ سپیاتی و هنگڤینی بۆ دواڕۆژ گۆت: دەمێ 5 مەهانە، ئەز هنگڤینێ سروشتی یێ چیا دکرم، لێ گەلەک جاران ژ بەر کێمبوونا وی هنگڤینی ئەز ئێک کیلۆ ب 100هزاردیناران دکرم و ب زەحمەت ب وی بهایی بدەست من دکەڤیت.
پتریا وەلاتیێن دهۆک دەمێ کرینا هنگڤینی داخوازا هنگڤینێ چیا و سروشتی دکەن، لێ سەرۆکێ کۆمەلا هنگەڤانێن دهۆک دبێژیت: پیدڤی ناکەت وەلاتی گەلەک خوە بدووڤ هنگڤینێ چیاڤە مژوول کەن، چنکو پتریا هنگڤینێ دهۆک ب رەنگەکێ سروشتی بەرهەم دهێت و گەلەک جوداهی دناڤبەرا مێشێن پەروەردەکری و یێن چیا نینە.
خۆرشید پیرۆمەری، سەرۆکێ کۆمەلا هنگەڤانێن دهۆک خوەیاکر: ئەڤ ساله، هنگڤینێ چیا ل بازارێ دهۆک گەلەک کێمبوویە، چنکو هنگەڤان و کەسێن ل چایێن دەڤەرا #ئامێدی#ێ لدووڤ مێشێن هنگڤینی دگەریان کارناکەن، ترکیا ئەڤ سالە 3 ئەندامێن کۆمەلا مە ل چیایێن دەڤەرا ئامێدیێ کۆشتن، لەورا ژ ترسێن وان هێرشان گەریانا ل هنگڤینێ چیا گەلەک کێمبوویە.
پیرۆمەری ئینا زمان: باشترین بها بۆ هنگڤینێ ل بازارێ دهۆک بۆ ئێک کیلۆ 30 هزار دینارن، لێ باوەرییەک بۆ وەلاتیێن مە چێبوویە ئێک کیلۆیا هنگڤینێ چیا تا 120 هزار دیناران ژی بکرن کو گەلەک جاران ئه و هنگڤین ل دەمێ بڕینێ کرمکی بوویە یان پیس دهێتە بڕین.
نوکە ل سنوورێ پارێزگەها دهۆک، 3283 هنگەڤان یێن سەرب کۆمەلا هنگەڤانێن دهۆک، کارێ مێشڤانیێ دکەن و ئەڤ سالە پتریا بەرهەمێن مێشێن خوە ل بازارێن کوردستانێ و پارێزگەهێن ئیراقێ فرۆتینە.
ئیسماعیل #شنگال#ی، خودانێ مێشێن هنگڤینی ل دهۆک، بۆ دواڕۆژ گۆت: جوداهی دناڤبەرا هنگڤینێ مێشێن من و هنگڤینێ چیا دا نینە، چنکو ئەڤ سالە هنگڤینێ مێشێن من و هنگڤینێ چیایێن کوردستانێ پشکداری پێشانگەهەکا هنگڤینی ل وەلاتێ مسرێ بوون و هنگڤینێ مێشێن من لسەر 30 وەلاتان ل رێزا ئێکێ هات.
سالێن دەربازبووی، گەلەک ژ بەرهەمێ هنگڤینێ چیا د هات بازارێ دهۆک ژ چیایێن دەڤەرا ئامێدیێ و #زاخۆ# بوو، لێ نوکە نێزیکی 70% ژ سنوورێ قەزا ئامێدی و 30% ژ قەزا زاخۆ، ل ژێر کۆنترۆلا گەریلایێن پارتیا کارکەرێن کوردستان-ە، لەورا بەردەوام ئه و دەڤەر دبن ئارمانجا هێرشێن ترکیا و وەلاتیێن دهۆک بۆ مەرەما لێگەریانا ل هنگڤینی نەشێن بچن وان دەڤەران.[1]
#29-11-2018#