دواڕۆژ، #دهۆک#
پشتی 5 سالێن بێ بازاریێ و نزمبوونا بهایێن پارچەیێن ئەردوخانییان ل دهۆک، 24 دەمژمێرێن دەربازبووی ب رەنگەکێ گەلەک بلەز بهایێن پارچە ئەردان گرانبوون و ل چەند تاخان بلندبوونا بهایان گەهشتە گۆپیتکێ.
شەڤا 23 لسەر 24 ڤێ مەهێ، جڤاتا نوونەرێن ئیراقێ پرۆژە قانوونا بودجەیا گشتی یا ئیراقێ بۆ سالا 2019-ێ پەسەندکر، د پرۆژە قانوونێ دا هەموو شایستەیێن دارایی یێن هەرێما کوردستانێ هاتینە دیارکرن.
پشتی پەسەندکرنا بودجێ، رۆژا دووڤدا جۆدا ژ هەموو رۆژێن دی سپدێ بلەز هەموو خۆدان نڤێسینگەهێن ئەردو خانییان ل دهۆک دەرگەهێن نڤێسینگەهێن خوە ڤەکرن و دەست ب بازاران کرن، چنکو ل گۆرەی گۆتنێن وان دەمەکێ درێژبوو ئه و ل هیڤییا پەسەندکرنا بودجێ بوون.
نزار دێرگژینکی، خوادنێ نڤێسینگەها فۆرات یا کرینوفرۆتنا ئەردو خانییان بۆ دواڕۆژ گۆت :5 هزار دولار تا 15 هزار دولاران چوونە سەر بهایێ ئێک پارچەیا ئەردی یا 200 مەتری و لدووڤ جه و تاخێن دهۆک پارچە ئەرد ب بهایێن جۆدا گرانبووینە.
ناڤبۆری خوەیاکر :ل دەوروبەرێن دهۆک وەک سێمێل، مسێریک، حەوشک-ێ بهایێ ئێک پارچەیا ئەردی یا 200 مەتریی 2 - 5 هزار دولاران گرانبوویە، دناڤ دهۆک ژی دا ل تاخێن ماسیک و زرکا، شاخک، (K.R.o)، ئێتیت، نزارک-ێ، 5 - 15 هزار دولاران پارچە ئەردێن 200 مەتری گرانبووینە.
ل گۆرەی گۆتنێن ناڤبۆری :بۆ جارا ئێکێیە پشتی 5 سالێن دەربازبووی، بهایێن ئەردی ل دهۆک ب ڤی رەنگی و بلەز گرانببن و ئه و پێشبینی دکەن دوو جارێن دی بهایێن ئەردی ئەڤ سالە گرانببن، دەمێ گەهشتنا پارەی ژ بەغدا بۆ هەرێمێ و پێکئینانا حکومەتا هەرێما کوردستانێ.
کرینوفرۆتنا ئەرد و خانییان ل دهۆک ژ گرنگترین کارێن بازرگانیێن وەلاتیێن وێ پارێزگەهێ دهێتە زانین کو ژئەنجامێ وێ بازرگانیێ گەلەک جاران بەری قەیرانێن دارایی ل هەرێما کوردستانێ پارچەیێن ئەردی ل دهۆک ب بهایێن گەلەک گران و نەچاڤەرێکری دهاتن فرۆتن.[1]
#25-01-2019#