سەرۆکایەتی ئەنجومەنی وەزیرانی هەرێم بودجەی پێویست بۆ نۆژەنکردنەوە و چاککردنی ڕێگاوبانەکانی ئیدارەی ڕاپەڕین تەرخان دەکات و بەڕێوبەری ڕێگاوبانی ڕاپەڕینیش دەڵێت لەسەر ئەو بودجەیە 5 ڕێگای سەرەکی دەڤەرەکە نۆژەنکردن دەکرێنەوە.
بەختیار ئەحمەد بەڕێوبەری ڕێگاوبانی ڕاپەڕین بە دواڕۆژی ڕاگەیاند: سەرۆکایەتی ئەنجومەنی وەزیران بڕی 13 ملیار دیناری بۆ نۆژەنکردن و چاککردنی ڕێگاوبانەکانی سنوری پارێزگای #سلێمانی# تەرخان کردووە و لەو بڕە بودجەیەش بڕی 3 ملیار دینار بەر دەڤەری ڕاپەڕین دەکەوێت بۆ نۆژەنکردنەوەی ڕێگاوبانەکانی.
وتیشی لەسەر ئەو بودجەیە پێنج ڕێگای سەرەکی دەڤەری ڕاپەڕین نۆژەن دەکرێنەوە کە بریتین لە ڕێگاکانی (#ڕانیە# دەربەندی ڕانیە، چوارقوڕنە دووکان، بێتواتە بالیسان، کورتەک بناری #قەندیل#) و چاککردنی پردەکانی (سەنگەسەر و ژاراوە) کە بەهۆی لافاوی ساڵی ڕابردوو زیانیان بەرکەوتبوو.
باسی لەوەشکرد: سەرجەم پڕۆژەکان لەلایەن بەڕێوەبەرایەتی ڕێگاوبانی ڕاپەڕینەوە سەرپەرشتی دەکرێن، لە ئێستادا سەرجەم ئەو پڕۆژانە کەوتوونەتە بواری جێبەجێکردنەوە و هەوڵدەدرێت لە ئایندەیەکی نزیکدا کۆتایی بە کارەکانیان بێت.[1]