بەبۆنەی هاتنی جەژنی نەورۆز و، سەری ساڵی 2720ی کوردی پیرۆزبایی لە خانەوادەی سەربەرزی شەهیدان و پێشمەرگە قارەمانەکان و هەموو کوردستانیانی خۆشەویستی ناوەوە و دەرەوەی وڵات دەکەم و هیوای ئاشتی و ئارامی بۆ هەموو لایەک دەخوازم.
بەداخەوە ئێستا ناوچەکەمان و هەموو جیهان لەگەڵ هەڕەشەی پەتایەکی جیهانی دەستەویەخەیە و بە هۆیەوە لە زۆربەی وڵاتانی جیهان بارودۆخێکی نالەباری تەندروستی و ئابووری هاتووەتە ئاراوە. بۆ گەلی کوردستانیش ئەم پەتایە بووەتە تەحەدییەکی گەورە و، تێپەڕاندنی ئیرادەیەکی هاوبەش و پابەندبوون و خۆپارێزیی گشتی پێویستە. لێرەوە بە پێویستی دەزانم داوا لە هەموو لایەک بکەم کە وەک ئەرکێکی نیشتیمانی بە وردی پابەندی ڕێنمایی تەندروستی و ڕێوشوێنەکانی حکوومەتی هەرێم و لایەنە پەیوەندیدارەکان بن. چەندە هەموومان پابەندی ڕێنماییەکان بین و خۆمان بپارێزین ئەوەندەیش هەڕەشەی ئەو پەتا مەترسیدارە لەسەر هاووڵاتیانی کوردستان کەمتر دەبێ.
جێگەی خۆیەتی دەستخۆشی لە دەستپێشخەری و بڕیار و هەنگاوەکانی حکوومەتی هەرێمی کوردستان بکەم کە هەر لەسەرەتای دەستپێکی ئەم پەتایە هەتا ئێستا، بوونەتە هۆی ئەوەی ڕێژەی بڵاوبوونەوەی پەتاکە لە ئاستێکی زۆر کەمدا بمێنێ و بە بەراورد لەگەڵ وڵاتانی دەوروبەر، هەرێمی کوردستان پارێزراوتر بمێنێتەوە. سوپاسی ماندووبوون و شەونخونیی تیمە پزیشکییەکان و ئاساییش و پۆلیس و پێشمەرگە و گشت لایەنە پەیوەندیدارەکان دەکەم کە لەم ڕۆژە سەختانەدا بەرپرسیارێتیی مێژوویی و هەستیاریان لەسەر شانە و ئەرکێکی نموونەییان جێبەجێ کردووە.
لەوە دڵنیام کە پشت بە خودا و بە هاوکاریی نێوان خەڵک و حکوومەت و پابەندبوونی هەموو لایەک ئەم کۆسپ و تەگەرەیەش بە سەلامەتی تێدەپەڕێنین.
نەورۆزتان پیرۆز و هیوای خۆشی و شادی و تەندروستی بۆ خەڵکی خۆشەویستی کوردستان دەخوازم.
مسعود بارزانی
#20-03-2020#
⚠️ تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!