تەونی بریا
ئەم ڕۆمانە، نەوای ئاوازێکی خەمگینە، برینێکە بە ڕۆحی گەنجێکی کوردەوە، کە لە هەر پانتاییەکی جوگرافیدا بە فۆرمێکەوە دەیناسین و لەگەڵیدا سەفەر دەکەین. وەک خۆی دەڵێت چیرۆکی ژیانی ئەو سەفەرێکە لە ماڵزارۆکی دایکییەوە تا زیندان، نە عاشقێکی فەرهادی لێ دەردەچێت، نە ئیماندارێکی زاهیدانە.
ئەو بە نێو ساڵ و ڕۆژانێکی تەمەنی وەها لینجدا سەفەر دەکات، کە ئایدۆلۆژیا و پەڕگیریی و دەزگا هەواڵگرییەکان لە پێی دەخەن. خوێنەر بە پێچەڵپێچی ڕووداوی هێندە لەپڕ و هەڵگەڕاوەدا دەبات ئەو هەستەی تێدا وەئاگا بهێنێتەوە کە ئەوە خۆیەتی، ئەوە پەتی چارەنووسی لەنێو تەونی ئایدۆلۆژیاکاندا بەدەست هەزارانی ترەوەیە و ناتوانێت خۆی بێت.
تەونی بریا خوێندنەوەی مێژووی نزیکی ئێمەیە، بە نیشاندانی هەموو ئەو تراژیدیایانەی تیایدا دەژین و ئەگەر بەنێو لاپەڕەکانیدا گەشت بکەین و بوەستین و ئاوڕ بدەینەوە وەک ئەوەی بەسەر کارەساتێکدا کەوتبین، ڕابردووی ژیانی خۆمان نیشان دەداتەوە.[1]