سکرتێرە 70

گۆتمە مام عەوڵای : ئەگەر بەگێی من دەکەی لەگەر هەیبەتووڵلای ڕێککەوەو وەمەکە کێشەکە گەورەبی، بڕوات هەبی بە ئاسانی وازت لێناینی، مام عەوڵا گۆتی : کورە ئوستاج سەی ئەوها چیە هەتا ئەمن لێی بترسێم، ئەگەر پەتکم نەکردو نەمهینا پێراوی توو ماچکا ئەمن عەوڵا نیمە..! گۆتم : ئەتوو جارێ واز لەهەندێ بینە، بابچین بە دوو خەبەرەکی میرۆی بکەوین، جەعۆ گۆتی : قوربانی ئەو زروفەی بم، زەلامت دەگیرێ سەرۆک جاش سۆراغت لۆ دەکا، تەقەی بەخەرکی وەدەنێی سەرۆک جاش پەنات دەدا، مام عەوڵا گۆتی : ئیلاهی چ زروفەکە تێی کەتینە..!
سواری تڕومبێلی بووین و بەڕێکەتین لۆ مەزرەعەی محێدینی، ئەوەی باشبوو ئەوجارە مام عەوڵاو جەعۆ ملیان لەبەر ملی ئێکدی نەنا، گەیشتینە پێش مەزرەعەیی و ئیزنیان داین و چووینە ژۆرێ، وەکی گەیشتینە لای ڤیللەکەی دیتمان محێدین شۆرتەکی لەبەر کردیەو دوو چووپی لەقۆری هەرکێشایەو مەلەوانی دەکا، جەعۆ گۆتی : تەماشایکە بەخۆو بەو چووپانە دەرێی قازی قوون شکایە ڕاستەو چەپەی دەکا..! مام عەوڵا گۆتی : جەعۆ بێدەنگ بەو وەزعەکەمان لێ تێک مەدە.! محێدین وەکی چاوی بەمەکەت، هێدی هێدی لەناو ئاوێ هاتە دەرێ، ماستاو چیەک غاریداو خاولیەکی گەورەی لێ لوول دا، محێدین بەخێراتنی کردین و چووین دانیشتین، ئەو لەسەر کورسیە پلاستیکیە درێژەکان ئەوی لە دەورەی مەسبەحی دایدەنێن ڕاکشاو لاقە بە تووکەکانی هاویشتە سەر ئێکدی، ئەوجە گازی جاحێرەکی کردو گۆتی : وەرە کورە سەی خۆڕی وەرە، کابرا بە غاردان هات و گۆتی : ئەمرکە خارە ! محێدین گۆتی : بزانە ئەو مێوانانە چدەخۆتەوە لۆیان بینە ! کابرا گۆتی : خارە، با یەکەمجار شەربەتەکی لیمۆی بە نەعنای لۆتوو بینم، ئەوجە ئەوانیش چیان دەوێ لۆیان بینە، کابرا گۆتیەمە : چدەخۆنەوە، مام عەوڵا گۆتی : قەنداوەکی لۆمن بینە، جەعۆ گۆتی : پخخخخخ، ماشەڵلا کەونی پیرە سە..! وەڵلاهی مادام ئەتوو قەنداوی دەخۆیەوە ئەمن چایەکی ئەلمۆدە دەخۆمەوە..! گۆتمە کابرای : کاکە گێمەدە وانەو بڕۆ سێ شەرپەتی پرتەقاریمان لۆبینە، کابرا ڕۆیی و هەندەی نەبرد شەربەتەکانی هیناو لەپێشی داناین، جەعۆ قوومەکی لێداو گۆتی : ئەرێ معێدین دەقسەکی خۆشمان لۆبکە، چت کرد چت نەکرد لۆ میرۆی ؟ محێدین گۆتی : وەڵلاهی مەلەفی میرۆی گەورەو قورسەو هەموو کەس ناوێری شانی بداتە بەرێ، بڕوا بکەن بەهەزار ناری عەلی سەگە سۆراغەکم دەست کەتیە، مام عەوڵا گۆتی : دەتێمان بگەینە کاک معێدین ئەو سەگە سۆراغە چیە ؟ محێدین گۆتی : کاکە، میرۆ چووە سێ چار زەلامی بردیەو سایەق لۆریەکیان گرتیەو هەنکی یەک کەریان لێدایە، لە گووشیان نایەو ویستیتیان بیڕفێنن، لۆ ناکەونە ناو مەفرەزەکی، وەکی تەماشا دەکەن زەلامەک لەناو گووشیەو وا لەقوونی تڕومبێلیە، کاکە میننا دوونەک عیندەک، دەرکەتیە ئەو سایەق لۆریە زەلامی خۆیتیان و میرۆ دەیەوێ بیڕفێنی، ئەمن و مام عەوڵاو جەعۆ تەماشایەکی ئێکدیمان کردو زانیمان میرۆ ویستیتی قسەی خۆی بگەینتە سەری و سایەق لۆریەکەی بەسەر من و پۆلیسەکەو پارێزەرەکەی کەتیە بڕفێنی و لۆ ماری مەی بینی، ئەمن هەر بەجارەکی هیشک بووم، گۆتم : میرۆ نەیگۆتبی وەڵلا ئەو کەونە وەزیرە ڕێی لۆ من دانایە، بەران بەوەی بڕەک پشیم هاتەوە بەرێ کە هەتا ئێستا نەگیرایمەو لێیان نەپێچایمەوە لە دری خۆم گۆتم : دیارە میرۆ هەتا ئێستا ناوی منی نەدایە..! جەعۆ گۆتی : باشە چارە چبکەین ؟ محێدین گۆتی : وەڵلاهی با پێتان برێم، میرۆ لەئەوەلی و ئاخیری مەلەفەکەی تێکەری مەلەفی ئەو وەزیرەی دانیشتیە کرایە، ئەوجە ئەگەر بەگێی من دەکەن، ئەنگۆش لەو کابرایەی دوور کەونەوە، دەنا بەخوای ئەنگۆش تووشی کێشە دەبن، با پێشتان برێم لەوەش زیاترم پێناکرێ، مام عەوڵا گۆتی : ئەوجە کاک معێدین ئەگەر ئەو ئیشە بەتوو نەکرێ بەکێ دەکرێ، وەڵلا دەبی هەر بەخۆت هیممەتەکی لۆ بکەیی و لەو وەزعەی قورتاری بکەی ! محێدین بەینەکی داماو گۆتی : ئەگەر هەرێم بدەنێ لەو کابرایەی دوور کەویتەوەو وازی لێبینی ممکینە چشتەکم پێبکرێ، ئەوەی باشیشە لێرە ئەوەیە میرۆ خەباتەکی زۆری هەیە لەچیای، وەختی خۆی کە ئەمن تەنزیم بووم لەناو شاری میرۆش لە چیای بوو، هەردووکیشمان لەیەک کەرتی چالاکیمان ئەنجام دەدا..! جەعۆ گۆتی : ئەتوو تەنزیم بووی معێدین ؟ ئەو وراتەم بەقوڕێ گرت کە ئەتوو تێیدا تەنزیم بووی ! محێدین بەسەرەخۆی نەهیناو گۆتی : ئەمن لۆیێ لە جەعۆی توڕە نابم چونکە دەزانم بڕەک کەرە..!
بەینەکی باش دانیشتین و محێدین هەرێی دا هیممەتەکی دی لۆ میرۆی بکا، ئیدی خواحافیزیمان کردو محێدینمان بەجێهێشت و گەڕاینەوە لای مارێ، هەرکەسەو چۆوە ماری خۆی، جلکم گۆڕی و نوێژی عیشایێم کردو لێم پارداوە، وەختەکی لەگەر تەقەکی زۆر بەخەبەر هاتم، هەموومان تێکڕا ڕاپەڕین، دەستم دا دەبانچەیی و غارم دا دەرێ، دەرکەی حەوشێم کردەوەو دیتم ماتۆڕەک بەتووندی لەکۆرانێمە بزر بوو و چووە کۆرانەکەی دی، وەختەکی مام عەوڵاو جیرانیش هەموو هاتنە دەرێ، بووە یا ئەڵلا یا ئەڵلاو ئەو تەق و تۆقە چبوو ؟ تەماشامان کرد دارو دیواری مارێمەو مارێ مام عەوڵای نەمابوو ! گۆتیان : باشە ئەوە کێبوو، کەستان نەدیت ؟ گۆتم : وەڵلاهی مانتۆڕەکم دیت وەکی فیشەکی تێپەڕی ! مام عەوڵا گۆتی : هەوە، ئەوە هەیبەتووڵلای خۆڕی بووە، گۆتم : باشە ماری من لۆ، هەیبەتووڵلا چ پەیوەندی بەمن دایە ؟ مام عەوڵا گۆتی : ئەدی ئەمن لەسایەی توو زێخەم نەناسی، دەی سەری هێران و بنی گەواران ئەتووی..!
سبەینێ دەوری سعات نۆی بەیانی لەگەر مام عەوڵای ڕێککەتین بچینە مەخفەری و دیسان شکایەت لە هەیبەتووڵلای بکەینەوە، سواری تڕومبێلی بووین و بەڕێکەتین، وەکی گەیشتینە وێ، دیتمان پێش مەخفەری زۆر قەرەبارغە، نێزیک بووینەوەو پرسیارمان لەپۆلیسەکی کۆسە کرد، گۆتی : وەڵلا ئەوشۆ وەختی بەرەبەیانی بەسەر مەخفەریان دادایەو دوو پۆلیسیان بریندار کردیە..! مام عەوڵا گۆتی : هەوە کەرەگای میللەتی کوردە، بەسەر ئێرەشی دادایە..! گۆتم : بابە هەیبەتووڵلا کوو دەوێری بەسەر مەخفەری دابدا، مام عەوڵا وەرامی منی نەداوەو گۆتیە پۆلیسە کۆسەکەی : قوربانی ئەو تەنکە سمێرو ڕدێنەت بم، نەزاندرایە کێبووە ؟ پۆلیسەکە گۆتی : ناوەڵلا بەران دەرێن مانتۆڕەک بووە، دەستڕێژەکی کردیەو تێی تەقاندیە..!

مام عەوڵا گۆتیە من : خۆ دەبینی ئەو تڕڕووهاتە چدەکا، کورە ئەوە نەک هەر ئەمن و ئەتوو، عوکمەتیشی لەزەواق نایە، یاڕەببی خوایە زۆر شوکر تووشی چبووین..! گۆتم : باشە هەونکە چبکەین !؟ بچین دیسان شکایەتی لێبکەین ؟ گۆتی : شکایەت لەکێ دەکەی و لەکن کێ دەکەی، ئاخر دختۆرەک بەخۆی نەخۆش بی، چارەی دەردی من و تووی کوو پێ دەکرێ !؟ گۆتم : ئەتوو ماری ئەو ئامۆزایەی پێ دەزانی ؟ گۆتی : قاتی ناتەوێ بچیە کنی ؟ گۆتم : بەرێوەڵلا، دەچم دەرێم کاکە ڕجای خوات لێدەکەم ئەو بەرایەی لەکۆرەمە کەوەو دارەکیش بەبەینی مام عەوڵاو هەیبەتووڵلای دابینە..! مام عەوڵا گۆتی : کوو دەزانیە ئەو بینایە مەخفرەو ئەو کاکە کۆسەش پۆلیسە ئەوها دەزانم مفاوەزاتی توو لەگەر هەیبەتووڵلای سەرناگری، کورە ئوستاج هەیبەتووڵلای بە حەفت ئاوان بشۆیەوە هێشتا هەر ئاوەگرە، ئەتوو دەچی لەگە کێ دادەنیشی..!؟ گۆتم : ئێ باشە دەردی عارەبان گۆتی : ئەینەلمەفەر ؟ ئەدی چبکەین سەرلۆ کێندەرێ هەرگرین، هەیبەتووڵلا لەمە بوویتە عەنتەری کوڕی شەددادی..! مام عەوڵا گۆتی : ئاهەه، تەواو دیتمەوە ! گۆتم : چت دیتەوە ؟ گۆتی : چارەی ئەو کێشەی، وەڵلاهی دەبی ئەو هەیبەتووڵلایەی نار بکەم نار..! گۆتم : کوو ناری دەکەی، دەپێم برێ ؟ گۆتی : تازە ئەتوو باسی عارەبت نەکرد ؟ گۆتم : با، گۆتی : ئێ ئەوە بەردی بناغەی ئیشەکەیە، گۆتم : کوو ؟ گۆتم : لەبە دەکشێمەوەو ڕاست پیرەژنە عارەبەکی دەینم، ئەوجە با خانێ و هەیبەتووڵلا هەر لە گووپی خۆیان بدەن..! گۆتم : کورە چاوەکەم ئەو ئیشەی نەکەی، وەڵلا وەبیللا ئەوجارە هەیبەتووڵلا هەر چار پارچەی کوردستان لە زەواق دەنێ ! گۆتی : ئەتوو ئەو ئیشەی لۆمن لێگەڕێ، گۆتم : مام عەوڵا چاوەکەم، ئەمنیش ئێستا تەڕەفەکم لەو شەڕەیی و هەیبەتووڵلا گووللەی بە ماری منیش وەنایە، بڕوات هەبی یەکەم جار ئەمن دەکوژی، ئەوجە ئەتوو..! مام عەوڵا گۆتی : دەتوو جارێ با ئەمن گۆلی خۆم بکەم، دەوجە خوای دەکرد سێسەت فیشەکی لێدەدام..!
لەگە مام عەوڵای گەڕاینەوە لای مارێ، هەر کووی هەبوو تانیم ناونیشانی ئامۆزایەکەی هەیبەتووڵلای لێ وەرگرم، وام دانا هێوارێ لەگە جەعۆی بچم سەرەکی لێدەم، ئەگەر لەگەریشم نەهات بەتەنێ دەچم، ویستم مام عەوڵای بەجێبێلم، پیکابەک لەتەنیشتەمەی ڕاگرت و معاونەک و سێ چار پۆلیس هاتنە خوارێ، سەلامیان کردو کەتنە پرسیاری تەقەکانی شەوێ، مام عەوڵا گۆتی : کاکە خۆ لەگەمە ماندی مەکەن، کێ مەخفەری دایتە بەر گووللان، هەر ئەویش ماری من و ئوستاجی کردتە بێژینگ، معاونەکە گۆتی : ئەدی نایێن شکایەت بکەن، مام عەوڵا گۆتی : دونێ شکایەتمان لێکرد، بەران ئەوشۆ لەڕکی هەندێ بەسەری داداینەوە، تەئکیدبە بێینەوە مەخفەری لۆ شکایەتی، ئەوشۆ تۆپی نەمساویمان پێوە دەنێ، ئەوجە خێرتان دەگاتێ واز لەمە بینن و بڕۆن چارەکی لۆ خۆتان ببیننەوە، کێ دەرێ ئەشۆ نایێ مەخفەری لە بناغەوە بتەقێنتەوە..! معاونەکە بینەکی تەماشای مام عەوڵاو خانیەکانی کردو پاشان سواری پیکابی بوون و تێیان تەقاند، ئەمنیش پێشی مام عەوڵای بەجێبێلم، زۆرم قسە لەگەر کرد واز لە هینانی ژنە عارەبی بینی و گۆمەکەی لەوەی زیاتر شێلوو نەکا، بەران فایدەی نەبوو، چونکە مام عەوڵا وەکی کەراتی دەیگرت چاوی تاریک دەبوو، کەسی نەدەناسی، بتکوشتباو بتبڕیبا لە قسەی خۆی نەدەهاتە خوارێ، لۆیێ بەناچاری بەجێم هێشت و وام دانا پاشی عەسرێ لەگە جەعۆی بچم سەرەکی لەو ئامۆزایەی هەیبەتووڵلای بدەم، بەشکوو ئاگری ئەوتڕڕووهاتەی لەمە دوور دێختەوە..!

تەلەفۆنم لۆ جەعۆی کردو هات، سواری تڕومبێلی بووین و بەڕێکەتین لۆ ماری ئامۆزایەکەی هەیبەتووڵلای، گەیشتینەوێ لەوێ نەبوو، پاسەوانەک لە پێش دەرکەی بوو، گۆتی : وەڵلا لێرە نیەو چوویتە مەزرەعەی، گۆتم : دەکرێ پێمان برێی مەزرەعەکەی لەکێیە ؟ گۆتی : چونکە ئەتوو دەناسم، ناونیشانەکەتان دەەمێ ! خواخێری بنووسی ناونیشانەکەی داینێ و لەگەر جەعۆی بەڕێکەتین، جەعۆ لەڕێیێ ڕایگرت و گۆتی : باهەندە گورە بەڕۆژەی بکڕم، لەوێ لەماری ئەو خزمەی هەیبەتووڵلای بە چایەی دەیخۆین، گورە بەڕۆژە لەگەر چایەی زۆر بەتامە ! گۆتم : وەختی هەندێ نیە جەعۆ ! گۆتی : بەدارێشم وەبکەن هەر دەیکڕم، چارم نەماو بێدەنگ بووم، جەعۆ نیو کیلۆ گورە بەڕۆژەی کڕی و بەڕێکەتین..!
گەیشتینە مەزرەعەکەیی و ئیزنیان داین بچینە ژۆرێ، نێزیک بووینەوەو گێمان لە دەنگی گۆرانی و مۆسیقای بوو، جەعۆ گۆتی : یان ژن گواستنەوەیە یان بەغەرەتی هاتینە، گۆتم : بابگەینەوێ، ئەوجە تێدەگەین مەسەلەکە چیە، وەکی گەیشتینە وێ دیتمان سێ چار بەندبێژو گەعدەچی دانیشتینەو یا مەهایەکیان لەتەنیشتەو جاحێرەکی پرچ لوولی خەنافس درێژ لێیدەداو سەر لەگەر دەینی و دەبا، دوو سێ موکەببیرەی گەورە لەولاو لەولا داندرابوو، ئەو بەند بێژانە شەڕە بەندەکیان دەکرد نەبیتەوە، ڕێزە کورسیەک داندرابوو، ئێکەک لەسەرەوە دانیشتبوو، کرەکی زۆر خاوینی #زاخۆ#یی لەبەربوو، پڕی پێشی بتڵە بیرە بوو، چار پێنج جاحێر لەپشتی ڕاوەستابوون، ئێکیان مەخزەنی لە کلاشینکۆفی دێخست و سواری دەکرد و دەیدا کابرای کر لەبەر، ئەویش وەری دەگرت و لوولەی لەلای سەری بەند بێژەکان دەکرد و پەنجەی پێوەدەناو بەجارەکی هەمووی دەتەقاند، لە دوو وی دەبانچەکی کلۆکی ئەمریکیان دەدا دەستی، پەنجەی بەویش وەدەناو هەمووی بەجارەکی دەتەقاند، زەلامەکی مل باریک لەپێش جەماعەتی گەعدەی دوو پەڕۆکی بەدەستی وەبوو، سەمای دەکردو خۆی دەلەراندەوە، بەین بەین ملی بادەداو لۆ پێش و پشتی دەبرد، وەکی گەرمیش دەبوو، دەبانچەی دەردەهیناو ئێدەکەکی بە حەوای وەدەنا..! چووینە لای کورسیەکان و دەستمان برند کردو سەلاممان کرد، کابرای کر لەبەر تەماشایاکی منی کردو ئێک دوو جار داما، وەکی برێی فکری دەکردەوە، بزانی ئەمنی لەکێ دیتیە، وەختەکی سەری برند کردو بەدەستی ئیشارەتی دامن و گۆتی : وەرە لە تەنیشتە من دانیشە ! ئەمنیش بەسە کەتم و چوومە تەنیشتی، سەلامم کردو هەستاوەو دۆقەی لەگەر کردم و بەخێراتنی کردم، هەر دانیشتم، سەرم لەبن گێی ناو خوندە خوندەکم کرد، یەکسەر بە جاحێرەکانی گۆ : ئەو مەشڕوبەی لێرە لابەن، ئەوانیش هەندی دەمێ هەریانگرت و لایان برد..!
گۆرانی و بەند گۆتن بەردەوام بوو، هەر بابایەو سەری دەلەقاندو هەردەپەڕی قوونی بادەدا، جەعۆش لەگەوان گەرم ببوو، بەین بەین هەردەستاوە، بەڕاست و بەچەپ سەمای دەکردو یەک بەدەنگی دەیگۆ : ئیوو ئیوو..!
بێزار بووم لە وەزعەکەیی و سەرم لەبن گێی کابرای ناو گۆتم : حەزدەکەم بەتەنێ دابنیشین و دوو قسان بکەین، تەماشایەکی کردم و گۆتی : بەچاوان، هەستاوەو گۆتی : فەرموو بەبچینە جێیەکی هێمن، ئەو ڕۆیشت و ئەمنیش کەتمە دووی، بڕەک دوور کەتینەوە لەهەراو هۆریایەکەی، ئێک دوو جاحێر لەگەرمان هاتن، کابرای مل باریکی سەماکەری دەبانچە تەقێنیش لەگەرمان هات، ئەو ئێکەکی پووزەی سمێر گەورەی مل باریک بوو، ڕانک و چۆغەرەکی شین شینی بلوری لەبەربوو، پشتێندەکی گور گوری بەستبوو، دەسکە ڕحانەکی هاویشتبووە بن پشتێندی لەلای چەپی، لای ڕاستیشی دەبانچەک و مۆبایلەکی لەبن بوو..!
کابرا گۆتی : فەرموو جەنابی وەزیر ئەمرکە ! وەکی وەیگۆ کابرای پوزەی سمێر گەورە ڕەنگی تێکچوو، چاوی لەمن زەق کردەوەو دەستی هاویشتە سەر دەسکی دەبانچەی، بەوەیڕا زانیم ئەو قونکە زەلامە هەیبەتووڵلایە..!

گۆتم : ئەوی ڕاستی بی لۆ گلەییەکی هاتیمە، گۆتی : گلەیی !! گلەیی توو سەر سەرو سەرچاوم، گۆتم : مەسەلەکی کوردی هەیە دەرێ : شەڕ لە بادینان و تۆز لەپێش دەرکێمە، پیاوی توو لەگەر خزم و کەسی خۆی بەشەڕ دێ، دێ تەقەی بە ماری من وەدەنێ، لۆ توو بەچەندی لە جێیان برێن ئامۆزای فرانی خین بەری چاوی گرتیەو دەست و تفەنگی شەڕە ! گۆتی : پێم خۆشە دۆغری بچیە ناو مەسەلەکەیی و چیدی پێچ و پەنام لەگەر نەکەی، ڕاست و ڕاست پێم برێ، کێ گێچەری بەتوو کردیە ؟ گۆتم : وەڵلاهی پێش ئەوەی بێمە ئێرەو چاوم بەو قوونکە زەلامەی بکەوی، ڕسمی ویم وا لە مێشکی خۆم دروست کردبوو کەوا زەلامەکی چار شانەیەو جەمی هەشت نۆ سەموونان لەسلۆری دەخواو لەسەر کەلەشی دانیشی هەتا بنی لێنەینی هەرناستی، وام دەزانی ناوقەدی کەری بگری و ڕایبووکشی نۆ تڕی پێدەکا، جارێ هەر لەناوەکەی زەندەقم چووبوو، هەونکەش وەکی هاتم و دیتم دەبینم ئەو هەیبەتووڵلایە بەخۆو بەو پشتێندە گورگوریەی دەرێ ڕیویەو تەنەکەیان لە کلکی هێخستیە..! کاکە وەکی ئەمن ئەو قسانەم کرد، هەیبەتووڵلا شێت و هار بوو، هەر بەجارەکی خین بەری چاوی گرت و هەموو قالبی دەستی بە لەرزینێ کرد، هەریکێشا دەبانچەیی و دوو فیشەکی لەبن دەست و پێی تەقاندم..! ئەمن هەر زەندەقم چوو، غارم داو خۆم لەپەنا کەونە سەرۆک جاشی ئامۆزای هەیبەتووڵلای نای ! کابرای کر لەبەری سەرۆک جاش لەسە پشتێ کەت و گۆتیە جاحێرەکان : ئەو دەبانچەی لەو کەرەی بستینن هەتا ئێکەکی نەکووشتیە، باشبوو غاریاندایێ و دەبانچەکەیان لەبە دەستی هەیبەتووڵلای دەرینا، هەیبەتووڵلا وەها گەرم ببوو بە نۆ زەلامان ڕانەدەوەستا..! لەدری خۆم گۆتمە خۆم : هەقەمستت بی، ئاخر برێ زەلام نەما حەلل و فەسلی لەگەر بکەی ئەو کەر پیاوە نەبی..!
وەلحاسر بەهەزار ناری عەلی هەیبەتووڵلایان هێور کردیتەوە، کەونە سەرۆک جاشی پلە لیوای هەونکە گۆتی : کاکە لەو کەرەی مەگرە، ئەو بەچ زەفت نابی، بەس پێم برێ بزانم کوو کێشەکەت لۆ چارە بکەم، گۆتم : نەنەخانێی خوشکی هەیبەتووڵلای لەگەر مێردەکەی دەمەقاریەکی بووە، ژنە توڕەبووەو چوویتەوە مارێ هەیبەتووڵلای، هەیبەتووڵلا لە دونێوە بە تفەنگان دوو جار بەسەر ماری عەوڵای زاوای دادایەو جارەکیش بەسە مارێمەو بەسەر مەرکەز شورتەی دادایە، ئێ کاکە شتی وەها کوو دەبی ئەتوو دەست لەو قوونکە پیاوەی بەردەیی و ئەویش ببیتە کەرەگای مەنتیقەی..! کابرای کەونە سەرۆک جاش لەباتی دوو قسان بە هەیبەتووڵلای برێ، هەر بەشەپان لە چۆکی خۆی دەداو پێدەکەنی و لەگە پێکەنینێ لەناو قەدیڕا لۆ پشتەوە دەچوو، پاشان دەهاتە پێشەوە..! گۆتم : کاکی من ئەمن لۆیێ نەهاتیمە ئەتوو لەقریتەی پێکەنینێ بدەیی و شان لەگەر بلەرزێنێ، یان چارەکی کەرەگای مەنتیقەی بکە، یان ئەمن دەڕۆم و ئیللەڵلاو بڕایەوە، کابرا گازی هەیبەتووڵلای کردو گۆتی : وەرە ئامۆزا وەرە با دوو قسان بکەین و چارەکی ببینینەوە ! هەیبەتووڵلا بە تووندی گۆتی : ئەمن نایێم قسان بکەم، ئەمن دێم شڕوتی خۆم فەرز دەکەم و تەواو..! گۆتم : وەڵلا ببورە کە بەتووم گۆ کەرەگای مەنتیقەی، ئەتوو وەکی ئەمریکای کەرەگای هەموو گۆی زەوی..!!

هەیبەتووڵلا خۆی توڕەکردو لێیدا ڕۆیی، گۆتی : ئەتوو شایەنی ئەوەی نی لەگەرت دانیشم، گۆتمە ئامۆزایەکەی چاوەکەمی ئەو کەرە پیاوەی بینەوە با دوو قسانی لەگەر بکەم، بڕوا بکە لێرە بزربی دیسان دەچی بەسە ماری من و مام عەوڵای دادەدا..! ئامۆزای هەیبەتووڵلای مردبوو هەنکی پێبکەنی، خۆی ئەوەندە برند دەکردو بە عاردی دادەدا، سەری بادەداو دەیگۆ لەو دەورو زەمانەی پیاو چەند کەربی هەرکەمە، ماشەڵلا هەیبەتووڵلا کەراتی زۆر جوان لێدێ..! گۆتم : دەتوو جارێ پێم برێ ناوت چیە ؟ ئەویش خۆی گیڤ کردەوەو گۆتی : سەیفووڵلا..! گۆتم : ئەه قوڕم بەسەری، ئەمن کەتیمە بەرامبەر ڕوسیاو ئەمریکای، هەونکە بە هەردووکان خلاسم دەکەن..! سەیفووڵلا گۆتی : خەمت نەبی هەونکە هەیبەتووڵلا دەینمەوە، گۆتیە جاحێرەکی بڕۆ کورە بیهینەوە بڕۆ، ئەویش گۆتی : بەسەرچاو خارە، ئیدی کەتە دوو هەیبەتووڵلای بچی بیهینتەوە..!
سەیفوڵلا گۆتیە من : ئەوە کووبوو لە وەزیراتی نەمای ؟ گۆتم : چونکە دز نەبووم ! گۆتی : ئەوجە لۆ دز نەبووی ؟ گۆتم : چ جوابی خواو مێژووی بدەمەوە ! گۆتی : سەی لە مێژووی بەردە، ئەوانەی مێژووی ئەو میللەتەیان ڕەش کرد، ئەوڕۆ سینگ لە پێشی پێشەوەی هەموو چشتەکینە، ئەممان جوابی خوای قورسە، بەران ئەگەر ئەوڕۆ عیسابیان لۆ خوای کردبا ئەمە لۆ ئەوهامان لێدەهات..! گۆتم : لۆ ئەتوو چت لێهاتیە، ئەوەنیە فوولی و لە هیچت کەم نیە، ئەگەر عەدالەت هەبایە دەبا ئەتوو لە قەنارەی بدرێی..! گۆتی : هیچ وەختەکی کەونەجاشی وەکیمە لە قەنارەی نادرێ، چونکە هەموو کاتەکی ئیشیان بەمە دەبی..!
وەختەکی کابرا هەیبەتووڵلای هیناوە، هەیبەتووڵلا هەر حسابی لۆمن نەکردو گۆتیە سەیفوڵلای ئامۆزای : ئەوە لەبەر خاتری توو هاتیمەوە، دەنا نەدەهاتمەوەو لۆێش بەتووندی ڕۆیشتم هەتا بچم چالاکیەکی ئەنجام دەم..! سەیفۆی ئامۆزای گۆتی : هێبۆ وەختی چالاکی نیە، وەرە دوو قسانم لەدەستی بنێ و پێم برێ کوو ئەو سوڵحەی بکەین ؟ هێبۆ گۆتی : زۆر گۆتن قورعان و ئینجیل و تەورات و زەبور خۆشە، بەکورتی و بەکوردی ئەوە شەرت و شڕوتی منەو دەبی ئەوان ڕازی بن ؛ هەر لەبایی غارێ دەفتەرەک دۆلار لۆمن، عەوڵارۆک زێخەی تەراق دەدا، ئەوجە خانێی دەدەمەوە، نابی چیدیش لەگەر ئەو وەزیرە دەرکرایەی بگەڕێ..!

گۆتم : کاک سەیفوڵلا ئەتوو چدەرێی ؟ گۆتی : وەڵلا شەرتەکانی هەیبەتووڵلای زۆر سووکەو، دەفتەرەکی منیش باوێ سەرێ و ئیللەڵلا و بڕایەوە ! گۆتم : دەفتەری چ ؟ گۆتی : هەقی من ! گۆتم : هەقی توو چیە ؟ گۆتی : هەقی ئەوەی لەناو مەزرەعەی من و لەبن سێبەری من ئەو سوڵعە کرایە، لۆ ئەمن بەلاش لێرە دانیشتیمە، ئەگەر ئەمنیش دوو دینارم پێنەبڕێ، ئەو گەوادەیەی لێرە لۆ دەکەم..! زانیم لەگەرەوانە پێدابچم تووشی زەرەری زیاتر دەبم، لۆیێ گۆتم : کاکە دوو قسەم هەیە پێشی بڕۆم، هەیبەتوڵلا گۆتی : زوو قسەکەت بکەو زۆر درێژەشی مەدێ، ئەمە عەفلەو گەعدەمان هەیەو هاتیمە ئێرە مێشکم سافکەم، نەهاتیمە گێ لەو شێرو ڕیویەی توو بگرم..! بەینەکی تەماشای هەیبەتووڵلام کردو دەماری مێشکم هەمووی شۆرتیان کرد، دووجاران ویستم هەستمەوەو بیدەمە بەر پێلەقان و هەردوو جۆتە گوونی فس کەمەوە، بەران ترسام بە سێ چار چەکداران پڕم دەنێ و زۆرم لێدەن، دوایێش هەیبەتووڵلا دەبانچەی دەرینی و ئێدەگەکم لێدا..!
پاش بینەو بەردەکی زۆر دوو دەفتەرەکەم پێکردنە دەفتەرەک و حەفتا وەرەقەو شەرتەکانی دیش وەکی خۆی ماوە، دەمزانی مام عەوڵا هەتا دەستی تێدایە ئەو شەرتانە فڕێ دەداو بیکوژی و بیبڕی دینارەکی ناداتە هەیبەتووڵلایی و سەیفووڵلای ئامۆزای، بەران لۆ ئەوەی لەوێ تووشی کێشە نەبم نەمگۆ مام عەوڵا ڕازی نابی، بەرکو گۆتم کاکە دەچم لەگەر مام عەوڵای قسەی دەکەم و وەرامەکتان دەدەمەوە، سەیفوڵلا گۆتی : زۆر باشە، چاوەڕێی هینانی پارکەینە، وەکی برێی مسۆگەری کردبوو، ئەمن پارەکەیان لۆ دەبەم..! هەیبەتوڵلاش دوا پەیامی خۆی پێداگەیاندم و گۆتی : هەتا سبەی شەوێ ئەو وەختانە پارەکە نەگاتە دەستمان و مەرجەکان جێبەجێ نەکرێ، هەموو دەرکەکان لەسەر پشتن لەبۆ هەموو ڕووداوەکی نەخوازراو..! وەرامی هەیبۆم نەداوەو هەر تەماشاشم نەکرد، لەدری خۆم گۆتم : ئەو زەلامە کەرە ئێکەکی دەوێ بەرامبەری ڕاوەستی لەخۆی کەرتربی..
لەگەر جەماعەتی گەڕامەوە لای گەعدەکەی، دیتم جەعۆ بەهەرچارپەلان هەردەپڕی، لەناو ئارەقەی نووقم ببوو، ئەو ڕۆژەبوو کە جەعۆ لەدووی دەگەڕا، چووم قۆر گرت و جوودام کردەوەو ڕۆیشتین، هەتا سواری تڕومبێلیش بووین، هەر سەری دەلەرزاندو قوونی بادەدا، ئەو هەرپەڕینەی جەعۆ لەوێ کردی، ئەگەر سەت ملیۆن دیناریشی لە یانسیبی لۆ دەرچووبا هەر هەندەی دەکرد..!
مایتی[1]