چوونە سەر گۆڕی وەلی دێوانە
دێوانەی ناشاد دێوانەی ناشاد
جێنشینی خاس مەجنون و فەرهاد
ژێر کەوتووی دەستی چەرخی ستەمکار
خێر نەدیو لە ژین لە دڵدار و یار
هەمیشە داماو دەرون پڕ لەکەیل
ئەی قیبلە نمای جێی باوانی لەیل
ئاوی سەر چاوگەی دوو دیدەکەی تۆ
پەرەی داوەتە زەڵم و تانجەرۆ
بەئاهو ناڵە و بەڕۆ ڕۆو گریان
چەند شەم شەمت کرد شەو هەتا بەیان
چەند ڕۆژی بەهار چەند شەوی پایز
چاوەڕوانیت کرد بۆ کۆچی ئازیز
ڕازی دڵی تۆ و هەڵبەستی جوان جوان
گفتوگۆی خۆشی گەرمیان و کوێستان
بەڵام داخەکەم کۆمەڵی نەزان
ئەخاتە ژێر پێ ئاواتی ئینسان
ئاخری بەئاهی گەرمیان و ئیلاخ
چویتە ژێری خاک دەرون پڕ لەداخ
ئیستاش لەژێر خاک لەو شوێنە تەنگە
لەژێر ئەو بەردە ساردی بێ دەنگە
کێڵی مەزارت وەکو باڵای شەم
لە ژوری سەرتە بۆ کەمبوونی خەم
تاقی برۆی ئەو وێنە بۆ کێشراو
بوەتە باوەشێن بۆ فێنکی هەتاو
جواب و سوئال و پرس و تەڵقینت
بیر و باوەڕ و دڵ و یەقینت
جومگەی ئیسقان و ئەو خۆڵی سەرە
هەمووی خەریکی زیکری دولبەرە
بەڵام بەیادی شێت و شەیدایت
بەکۆڵ نەدان و گیانی فیدایت
بەپایەی بەرزی دونیای عاشقان
شیعری بەنرخی مەجلیسی کوردان
بەو جێگای گرتت لەڕیزی عاشقان
لە دنیادا بوی بە قەیسی کوردان
هاتمە خزمەتت چون تۆ سەرداری
بۆ دڵسوتاوان جێگای هاواری
بمکە بە خاتر عەشقی باڵای شەم
ئەو شەمەی لەڕێی توایتۆ وەک مۆم
منیش وەکو تۆ فیدای و شەیدام
بۆ یارەکەی خۆم دڵ پڕ لەهیوام
منیش وەکو تۆ دوچاری دەردم
هەمیشە داما و هەناسە سەردم
توشی لەیلێکی لەحاڵ نەزانم
هەمیشە خەریک ئاهو گریانم
بەشەو و بەڕۆژ وا هەر ڕۆڕۆمە
مەعلومت لابێ دەردەکەی تۆمە
دوچاری عەشقی یارێکی خوێن ڕێژ
باڵا عەرعەرێک چاو وەک گەلاوێژ
یاری من جیایە بیرو بڕوایە
ڕێ نیشاندەرە عەزمە و توانایە
کۆن ئەروخێنێ نوێ دروست ئەکا
خەم ئەرەوێنێ زوڵم لائەبا
ئێستاش پێم بڵێ چیە دەرمانم
چۆن وا دوایی دێت ڕۆژانی ژیانم
لەناو خاکەوە دەنگێ هاتە گوێم
وتی ئەی داما و تۆزێ گوێ گرە لێم
عاشق خۆ ئەبێ شێت و شەیدا بێ
بەری لە ژیان و ماڵی دونیا بێ
وێڵ و سەرگەردان چوڵ گردی هەردبێ
بۆ غەیری یاری دڵ وەک بەرد بێ
لەپێناو یاری دانێ ڕۆح و سەر
بەزکری لەیلی پڕکات دەشت و دەر
زیز نەبێ لەیار ئەگەر نەیدوێنێ
هەر وەک پەروانە خۆی بسوتێنێ
جنێو و مەرحەمەت لەلای یەکسان بێ
پشت لەیار کردن کفری گران بێ
گوێ نەدا بەقسە و یاخود تانەی کەس
هەر بەیادی یار دایم بوێ پەس[1]
سەلام سۆڵەیی
1971