قوماش 39
نووسینی: #ئوسامە جەمیل#

گۆتم: بازۆ ئەگەر دنیاش خرابی ئەمن ئەو ئیشەی ناکەم، کاکە بەس ئەمن هەورینی هەگرم، ئەو زەلامە بن و پۆتکی دوو بەرەبابی لەبن دەینی، خوا قبور ناکا لۆ گەیشتن بە ئاواتەکی خۆم، ژیانی کۆمەرە خەرکەکی بکەمە قوربانی! گۆتی: وەڵلا ئەمن قسەی خۆم کرد و ئەتووش کەیفی خۆتە، گۆتم: ئەدی ئەتوو چ دەرێی لۆ هەناری؟ گۆتی: جارێ واز لەمن بینە، هەورین لۆ توو نەبی، ئەمن کوو هەناری دەینم! لەو قسەو باسانە دابووین، گەیشتیە مەخفەری، چووینە ژۆرێ و بە معاونەکەم گۆ: لۆ مەسەلەی ئەو تەقەکردنەی دونێ شەوێ هاتیمە کە لە مارێمە کرابوو، گۆتی: زۆر باشە، فەرموو وەرە بچینە ئەو ژۆرەی، چووینە ژۆرێ و بانگی مفەوەزەکی کرد و گۆتی: فایلی تەقەکردنەکەی شەوێ بینە! ئەویش هینایی و داینا، ئیدی پرسیار و وەرام دەستی پێکرد و کە گەیشتە سەر ئەوەی شک لە کێ دەکەی؟ گۆتم: لە سەرۆک جاشەکی! مفەوەزەکە گۆتی: لۆ شکت لەویە، گۆتم: چونکە لە ڕێی ژنەکی بەناوی فەیرۆزی هەڕەشەی لەمن کردیە ئەگەر ئەمن کیژی قادرە فەندی بینم بمکوژی! گۆتی: ژنەکە ناوی چیە؟ گۆتم: ناوی فەیرۆزە و لە مەعمەل مافوری دەوام دەکا، گۆتی: زۆر باشە، لە دوو فەیرۆزی دەنێرین و قسەی لەگەر دەکەین، بزانین چدەرێ، بەران ئەتوو دەلیلت هەیە کە فەیرۆز هەڕەشەی لەتوو کردیە؟ گۆتم: دەلیلی کوو؟ گۆتی: ئێکەک گێی لێببی یان ئەتوو تەسجیلت کردبی؟ گۆتم: ناوەڵلا، بەران ئەمن دوو جار لە دائیرەی چوویمە کنی و قسەم لەگەر کردیە، گۆتی: باشە ئەگەر ئەو گۆتی وەڵلا ئەو پیاوە هاتیە هەڕەشەی لەمن کردیە هەنگی ئەتوو چدەکەی؟ گۆتم: وەڵلا چبکەم، لۆ شتی واش دەبی؟ گۆتی: لۆ نابی، وەڵلا چاوەڕێی هەموو شتی بکە، بەران با ئەمە بەخۆمان قسەی لەگەر بکەین، ئەوجە قسەی زیاتری لێدەکەین!
نێزیکەی سعاتەکی لەوێ بووم و وەرامی هەموو پرسیارەکانم داوە، ئەوجە ئیمزام کرد و گۆتیە من دەتانی بڕۆی، ئەمە جارێ خەریکی تەحقیقی دەبین! ئیدی خواحافیزیم کرد و هاتمە دەرێ، بازۆ گۆتی: کێوە بچین؟ گۆتم: بابچینە تەواری و سەرەکی لە قادرە فەندی بدەین و بزانین کووە! گۆتی: یاڵلا بابڕۆین.
گەیشتینە پێش دەرکەی تەواری، زۆر قەرەبارغ بوو، کەسیان ئیزن نەدەدا بچتە ژۆرێ، گۆتم: دختۆر شێرۆ لە کێندەری فریامان کەوی، ئێکەک لە پشتە من گۆتی: لێرەمە سەرلووس! ئاوڕم داوە دەبینم دختۆر شێرۆیە، بازۆ مرد هەنکی پێبکەنی، گۆتی: وەڵلا شێرۆ هەربەخۆت، هەتیم ئەمە لە عاسمانێ لەدووت دەگەڕاین، ئەتوو لە عاردی لەمە پەیدابووی! شێرۆ گۆتی: چاو بەلەبۆق، لەوچەی مەکە و بەدووم کەون! وەڵلا کەتینە دوو دختۆر شێرۆیی و چووینە ژۆرێ، لەڕێی شێرۆ گۆتی: عەرز حیزینە دەبی دەعوەتەکم بکەن، بازۆ گۆتی: دمبکەکەی لێدە! شێرۆ گۆتی: ئەگەر ئەنگۆم بردە کن قادرۆکی ئەو مووە لە پیاوان نەهاتبی، یاڵلا بگەڕێنەوە یاڵلا! یەک سعات ڕجام لە شێرۆی کردیە هەتا دری نەرم بوویتەوە، گۆتیە من: ئەتوو وەرە، بەس نابی ئەو بازە سەر مازە بێ، گۆتم: شێرۆ ئەوجارە عەفوی کە لەبەر خاتری من، وەلحاسر هەرکووی هەبوو شێرۆم ڕازی کرد و چووینە کن قادرە فەندی، دیاربوو لەسەر قەرەوێرەکی درێژ کرابوو، کوڕی لە دیاری بوو، زۆر دەترسام تووندبی لەگەر من و ڕووم نەداتێ و دەرمکا، بەران قادرە فەندی زۆر مەرد بوو، هەرچاوی بەمن کەت، پێکەنی، گۆتی: یاخوا بەخێر بێی زاوا زێڕینە! سەلاممان کرد و چاک و چۆنیم لەگەر کرد، وەرامیان داوەو گۆتیە من: وەرە تەنیشتە من دانیشە، چوومە تەنیشتی و گۆتی: خەمت نەبی کوڕم، مادام ئەو نامەردە ئەوهای کرد، ئەگەر پارچە پارچەشم بکا ئەمن هەورینت دەدەمێ، ئەمن ئەو پیاوە نیمە لە خۆڕی ئەوها بترسێم، ئەمن و ئەو نەوعە زەلامەیان نەگۆتیە، خەمت نەبی، هەورین هەر ئی تووە!

بن و پۆتک: ڕەگ و ڕیشە.
مایتی[1]
⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!