قوماش 51
نووسینی: #ئوسامە جەمیل#
گۆتم: بابە کوو لە بیری بکەم ئەی هاوار، ئەتوو نابینی ئەمن لەسەوی چم لێهات، بابە لە بیرکردن ئاسان نیە، پیاو ئەگەر جێیەکی سووتا، ئەو جێیە چاکیش ببیتەوە ئاسەواری هەر دەمینێ، لەبەر هەندێ ناتانم لە بیری بکەم! داکم فرمێسک بە هەردوو چاوی داهاتە خوارێ و گۆتی: خوایە زۆر شوکر ئەلحەمدولیللا، کەس ژنی نەهینا کوڕی مە نەبی، گۆتم: بابە ئەمن بەخۆم تاقیبی ماری قادرە فەندی دەکەم، هەتا بزانم چیان بەسەر هاتیە، خۆ ئەگەر هەورین مێردی کردبی، ئەوە چارەم نیە و دەبی لە بیری بکەم و فکر لە ژیانەکی تازە بکەمەوە لۆ خۆم، ئەگەر مێردی نەکردبی و هەر چاوەڕێی منی کردبی، ئەوە ئەمنیش وازی لێناینم هەتا دەیهینم! بابم گۆتی: یاڕەبی کوڕم، کوی باشە، خوا ئەوهات لۆبینی!
حەفتەک تێپەڕی و ماری من هێور بۆوە و ژیانم هوردە هوردە ئاسایی دەبۆوە، هەرچەندە برینەکانی لەشم هێشتا هیشک نەببوون و هەموو ڕۆژێ دختۆر شێرۆی جیرانمان دەهات لۆی تەداوی دەکردم، لە ڕۆیشتنێش لاقی چەپەم باش لە دووم نەدەهات، ئەوەی دیقەتی دابا، دەیزانی لاقم تەواو نیە و لە ڕۆیشتنێ بڕەک دەلەنگم! سبەینەکی پاشی نان خواردنی بەیانی، جلکم لەبەر کرد بچمە دەرێ، داک و بابم مشەوەش بوون و گۆتیان: ئەوە کێوە دەچی؟ گۆتم: پیاسەکی دەرێ دەکەم و جەوەکی دەگۆڕم، داکم گۆتی: وەڵلاهی بەگێی مە دەکەی ناچیە دەرێ، با نەتگرنەوە یان تووشی کێشەکی نەبی! گۆتم: دایە ئەگەر بیانەوێ بمگرنەوە زۆر بە ئاسانی دێن لەناو مارێ دەمبەن، خێرو دەگاتێ لێم گەڕێن با پیاسەکی بکەم و هەوایەکی دەرێ هەرمژم، بابم گۆتی: باشە کوڕم باشە، بەران زوو وەرەوە بابەکەی بابم، گۆتم: بەچاوان و هیچ خەمتان نەبی!
چوومە دەرێ و بەسەکەتم لۆلای مەعمەل مافوری، گۆتم بزانم فەیرۆزی نابینم و لێی بە خەبەرەکی ناکەوم، گەیشتمە مەعمەلی و چوومە پرسگەی، کابرای گۆرین هەر لەوێبوو، دیسان جەریدەکی بەدەستبوو، هێدی هێدی دەیخیندەوە، سەلامم لێکرد و جەریدەکەی لابرد، تەماشایەکی کردم و ئەمنی ناسیەوە، گۆتی: تەیری موبارەک هاتیەوە؟ گۆتم: هاتنەوەی من لۆ ئێرە هیچ زەرەر بەتوو دەگەینی؟ گۆتی: نابابە نا، ئەتوو لۆ توڕە دەبی، خۆ هیچمان نەگۆتیە! گۆتم: هێشتا هیچت نەگۆتیە، نازانم ئەو پرسگانە کەنگی فێر دەبن، بە ڕووەکی خۆش قسەی لەگەر موڕاجیعان بکەن! گۆتی: کاکە با زۆری لۆ کەمی نەرێین، ئەوەی بە دووی داهاتیەوە لێرە نەمایە! گۆتم: کێ لێرە نەمایە؟ گۆتی: ست فەیرۆز، ئەدی ئەتوو هەموو جارێ نەدەهاتیە کن ست فەیرۆزی! گۆتم: باشە لۆ لێرە نەمایە؟ گۆتی: وەڵلا دەوری هەشت مانگی دەبی داوای نەقری کرد و لێرە نەما! گۆتم: نازانی نەقری کێندەر بووە؟ گۆتی: ناوەڵلا، تەئکیدم بچیە ژۆرێش بپرسی پێت نارێن، لۆیێ خۆت ماندی مەکە!
بە نابەدری لە پرسگەی هاتمە دەرێ و دنیام هەموو لێ هاتەوە یەک، نەمدەزانی چبکەم و کوو سەرە داوەکی پەیداکەم، ئەتوو بڕۆنێ تووشی چبووم، لەلایەک بازۆ تێی تەقاند و چووە سەرێ، لە لایەکی دی کەس نازانی ماری قادرە فەندی کێوە چووینە، هەبوو نەبوو فەیرۆز، ئێستا ئەویش لێرە نەمایە و خۆی نەقر کردیە! یا ئیلاهی چبکەم و کوو خەبەرەکی هەورینم دەست کەوی!
بەخەمباری گەڕامەوە مارێ، داکم دیاربوو جەرگ و ناوی لێدەنا، بۆن و بەرامەی ئەو حەوشەی پڕکردبوو، قادر قرپەستووری جیرانمان لەسە دیواری سەری خوار کردەوە و گۆتی: ئاگایەکیشتان لە فەقیران بی، ئەو بۆنە ئەمەی کووشت! داکم گۆتی: ئەوجە ئەمە کوو درمان دێ بێینگۆ بیخۆن، زەکیە و بینە و بسوڕێنەوە، وا پێدەگا، قادر گۆتی: خوا ئەگەر بنێری ئەوهایە، ئەوە هاتین! ماندی نەبوونم لە داکم کردو گۆتی: هاتیەوە جەرگۆ، گۆتم: ئەرێوەڵلا، گۆتی: دە وەکی زێڕان بڕۆ ناندینی(مەتبەخ) هەشت نۆ نانان بینە و بیڕشێنە، با حازر بی هەتا بابت لە مزگەفتێ دێتەوە، چوومە ناندینی و نانەکەم هینا و هوردە هوردەڕشاندم و لە ناو سەرنانی پێچام، داکم جەرگ و ناوەکەی سۆر کردەوە و سفرە و مفرەی داناو سەوزە و تەماتە و پیازو ماستاوی ڕێزکرد، قادر و زەکیەش گەیشتنە مارێمە، سەلامیان کرد و بەخێراتنمان کردن، قادر چووە ناو هەدیقەیی لە بن دار پرتەقارەکی دانیشت، گۆتیە داکم: قبور ناکەم ئەوسار ئەو پرتەقارانە بەتەنێ بخۆن! داکم گۆتی: ماشەڵلا پار هەندتان ترێ لۆمە نارد، هەتا داوای پرتەقاری بکەی! قادرگۆتی: ئای زەکە کەپوو سەیانی کوو پیاوی شەرمەزار دەکەی! زەکیە گۆتی: لۆ ئەمە بەخۆ گەلەکن خوارد، هەر کیژو کوڕە دەهاتنەوە و عەللاگەیان لێ پڕ دەکرد، چما هوشیەکیان لۆمە هێشتەوە!
وەختەکی بابم هاتەوە، وەکی چاوی بەمن کەت هاتیمەوە مارێ، دری کراوە، سەلامی کرد و بەخێراتنی قادر و زەکیەی کرد، هەر دانیشتین، زەکیە گۆتی: با ئەمنیش بچم ئەو شیوەی لێمنایە بیهینم! داکم گۆتی: بەگێی من دەکەی ناینی، هەریگرە لۆ ڕۆژەکی دی، زەکیە گۆتی: چشتی وانیە، وەڵلا فڕوجاوەکم لێنایە دەست و پەنجەی خۆتان لەگە دەخۆن! بابم گۆتی: بڕۆ بینە بڕۆ، فڕوجاو دەرمانی حەفت دەردانە!
زەکیە هەندی دەمێ هاتەوە و فڕوجاوەکەی هینا، داکیشم جەرگ و ناوەکەی تێکرد و نان داندرا، ناوی خوامان لێهینا و دەستمان پێکرد، ئەوان باشیان دەخوارد، ئەمن نەبی لەبەر خەمی هەورینی هیچم پێ نەدەخورا، هەر مراکم لە جەرگ و ناوەکەی وەردەدا، بابم و داکم هەستیان پێکرد، گۆتیان: دەبخۆ کوڕم بخۆ، با بڕەک شنگ و تاقەتت بێتەوە بەرێ! قادر قرپەستوور گۆتی: کوڕم ئەلحەمدولیللا ئەوە بەربووی، لۆ دری خۆت تەنگ دەکەی، کێ هەیە لە سجنی ئەو دڕندانە بەربی، وەڵلا هەموو دوعای داک و بابت بووە ئەتووی قورتار کردیە! ئەمنیش لەبەر دری وان دەستم بە نان خواردنێ کرد، نانەکە خوراو چایە ڕێز کرا، قادر گۆتیە بابم: دەوجە خەمەکی بخۆو زوو ژنەکەی بگۆزنەوە، تاخیری مەکەن، با بەزمەکیدی دروست نەبی! بابم سەرەکی باداو گۆتی: دیارە ئاگات لێنیە چبووە؟ قادر گۆتی: چبووە؟ بابم گۆتی: ماری قادرە فەندی باریان کردیەو کەس نازانی کێوە چووینەو چیان بەسەر هاتیە! زەکیە گۆتیە من: وەی لۆت لاربم، کوو ئەو ژن هینانەی توو بووە مەسەلەی لەیلێ و مەجرومی، ڕەبی کوڕم خوا درت خۆشکا! قادر گۆتی: مەعقولە قادرەفەندی ئەو ئیشەی کردیە، هەبی و نەبی خۆی لە بەرایەکی گەورە قورتار کردیە، وەڵلاهی ئەوە خەبەرەکی ناخۆشە! بابم گۆتی: چوومە لای ماریان و پاشان چوومە دائیرەش هیچ سۆراغم دەست نەکەت! گۆتم: وەڵلا ئەمنیش ئەوڕۆ چوومە مەعمەل مافوری هەتا فەیرۆزی دەستە خوشکی هەورینی ببینم و بەخەبەرەکی بکەوم، بەران فەیرۆزیش لەوێ نەمابوو و خۆی نەقر کردبوو، قادر گۆتی: باشە خزمەک، کەسەک، ناسیارەک کەسیان نیە لێیان بپرسین؟ بابم گۆتی: هەتا ئێستا کەسم دەست نەکەتیە، ئەوی ڕاستیش بی چونکە ئەو کوڕەم گیرابوو، نەدەوێرام زۆر لە دوو بچم، دەترسام تووشی ئەمنەک جاسووسەکی ببم و ئەو کوڕە تووشی خەتەریات بی! قادر بەینەکی باش داماو پاشان گۆتی: دیتمەوە! درم ڕنگەی هات و گۆتم: چت دیتەوە؟ گۆتی: ئەو ئیشە بەمن عەل دەبی و دەزانم کوو قادرە فەندی دەبینمەوە! گۆتم: کوو؟ گۆتی: ئەوەی لۆمن لێگەڕێ، ئەتوو ناتەوێ لۆت ببینمەوە؟
مایتی.[1]