قوماش 107
نووسینی: #ئوسامە جەمیل#

گۆتم: برێ بزانم چیە، لە ئێستاوەش پێت دەرێم ئەوەی لە توانام دابی دەیکەم! گۆتی: یان دەبی ئەمن و ئەتوو بڕۆین و ئەو وراتەی بەجێ بێلین، یانیش دەبی بەرگەی هەموو چشتەکی بگری ئەگەر ئەمن چشتەکم بەسەرهات؟ گۆتم: چشتی کووت بەسەربێ؟ گۆتی: زۆر ئاساییە ڕۆژەکی خەبەرت لۆبێ و برێن هەورین خۆی کووشت یان خۆی سووتاند! کە ئەو قسەی کرد ڕنگەم لە هەناوی وەهات، گۆتم: ئەتوو کوو ئەو قسەی دەکەی؟ ئەتوو ئەگەر چشتی ئەوها بکەی و هەموو لەحزەک و هەموو ڕۆژەک و هەموو دەمەکی ئەمن دەکوژی، دیارە دەتەوێ بەخەم و ئازاری توو سەر بنێمەوە و شێت ببم و بە ئاقاری بکەوم! گۆتی: دە مادام وایە هەرم گرە و بابڕۆین! گۆتم: کوو بڕۆین، دوایێ کێوە بچین؟ گۆتی: یەعنی لەو دنیایە پان و بەرینەی جێیەک نیە ئەمن و ئەتوو ڕووی تێبکەین؟ گۆتم: باشە ئەمن هەرت بگرم خەرک چمان پێدەرێ، چ بەمارینگۆ و ماریمە دەرێن؟ دوایێ پێت وایە ئەو سەرۆک جاشە ئەوها دابنیشی؟ بەخوای دەستیشی نەگاتە من و توو، تەئکیدبە ماریمە و مارینگۆ تەفروتوونا دەکاو ئێکەکی زیندی ناهێلی! گۆتی: برێ ئەتووم خۆش ناوێ و ناموێ لۆمن بی! گۆتم: وەڵلا مەسەلەکە ئەوە نیە، ئەمن هەتا دەمرم ئەتووم خۆش دەوێ و موستەحیلە پاشی توو درم لۆ ئێکەکی دی لێبدا، ئەتوو هەموو ژیان و گیانی منی، گۆتی: خەمی پارەشت نەبی، ئەمن دەتانم کیلۆ زێڕەک و دە هەزار دیناری لەگەرە خۆم بینم، تەئکیدبە، بەو پارەی دەگەینە هەموو جێیەکی، با داک و بابیشت لەو گەڕەکەی بار بکەن و خۆیان بزر بکەن، گۆتم: هەورین، مەسەلەکە ئەوها ئاسان نیە کە ئەتوو لۆی دەچی، جارێ ئەتوو لە ڕووی شەرعی خێزانی ئەو پیاوەی، خەرک چ بە بابم دەرێ کەببینن بەخۆی مەلایە و کوڕیشی ژنەکی بە مێردی هەرگرتیە؟ گۆتی: باشە کێ دەرێ ئەمن مارەییم لەو سەگبابەی هاتیە، لە کاتەکی بەزۆری زۆرداری ئەمنی لێ مارەکرایە! گۆتم: ناکرێ بڕەک بە هێمن تر و هێور تر بڕیار لەسەر شتەکی ئەوها بدەین، پێم وایە ئەوە زۆر خەتەرە، تەئکید بە ناترسێم، ئەمن لەسە توو کەتمە ژۆری لە سێدارەدانی و تەنازولم نەکرد، پێشت وانەبی وازم لە توو هینایە و ئەتووم خۆش ناوێ، هەتا دەمرم ئەتوو لەناو درمی، جێگای توو لەناو درم بە هەموو کیژی ئەو دنیایەی چۆل نابیت و نابی! گۆتی: دە مادام وایە بڕیارەکی ئازایانە بدە و یان هەردووکمان دەردەچین، یان تێدەچین!

گۆتم: ئازایەتی ئەوەنیە ئەو بڕیارەی بدەین، ڕەنگە بەو بڕیارەی ئەمن و ئەتوو لۆ یەکبین، بەران کۆمەرە کەسەک تێدەچی و دوو مار وێران دەبی، باش دەزانم ئەو کابرایە ئاگر لەمارینگۆ و ماری مە بەردەدا، حەز دەکەم بە هێوری فکر بکەینەوە و بڕیارەکی بدەین لە قازانجی هەردوو ماری دابی، هەستاوە و گۆتی: ئەمن دەڕۆم و هەتا دوو ڕۆژی دی چاوەڕێی وەرامی توو دەکەم، وەکی پێمگۆتی پارە و زێڕیشم تەرتیب کردیە، ئیدی ئەمن سەبرم نەماو تەواو! پاشان بێ خواحافیزی چووە دەرێ! لەگەر داکم هەتا دەرکەی حەوشێ لەگەری چووین، خواحافیزی نەکرد و سواری سۆپەرەکی سۆر بوو و ڕۆیی! گەڕاینەوە ژۆرێ، داکم گۆتی: ئەو ژنە لۆ ئەوها بە توڕەیی ڕۆیی؟ گۆتی: تەواو بێزار بووە و ئیدی بەرگەی ئەو هەموو خەم و خەفەتەی ناگری! گۆتی: ئەدی بەتەمای چیە؟ گۆتم: وەڵلا بەمن دەرێ، یان هەرم دەگری و دەڕۆین، یان خۆم دەکوژم! داکم گۆتی: ئەی کۆرەبم ڕۆرە، وەڵلا ئەتوو کەتیە بەینی چار و ماری، ئەدی ئەتوو چتگۆ؟ گۆتم: پێمگۆ سەبر بگرە، ئیشەکە ئەوها ئاسان نیە، ئەگەر ئەمن هەرت بگرم ئەو جاشە هەردوو بەرەبابیمە دەتاوێنتەوە، هەرچەندی کردم قەناعەتی نەهات، بەتوڕەیی ڕۆیی و گۆتی: هەتا دوو ڕۆژیدی چاوەڕێی وەرامی توومە، ئەگەر نا بەخۆم بڕیارەکی دەدەم! داکم زۆر مشەوەش بوو، گۆتی: با هێوارێ بابت بێتەوە، قسەکی لەگەر دەکەین، بزانین ئەو چدەرێ! گۆتم: زۆر باشە، ئەمن هەتا بازاڕی دەچم، چت پێویست نیە دایە؟ گۆتی: نا بابی من، بڕۆ خوات لەگەربی!
پاش مەغریبێ گەڕامەوە مارێ، دیتم بابیشم هاتەوە، داکم کولیچەی(ناوسێری، ناوساجی) کردبوو، سەماوەری دانابوو، لەگەر بابم وەکی برێی چاوەڕێی منیان دەکرد، بگەڕێمەوەو پێکەوە نانی هێوارێ بحۆین، سەلامم کردو چوومە ژۆرەکەی خۆم، جلکم گۆڕی و دەستم شووشت و چووم لە تەنیشت بابم دانیشتم، بابم گۆتی: نوێژی هێوارێت کردیە بابی من؟ گۆتم: ئەرێوەڵلا لە مزگەفتی شێخ مستەفای کردم، ئەوجە هاتمەوە، گۆتیە داکم: دەتێکە حورمێ، چایەکەی تێکە! داکم چایەی لۆ تێکردین و لێم وەرگرت و ئێکم لە پێش بابم داناو ئەویدیش لە پێشە خۆم، چایەمان تێکداو بابم پارووەکی لە ماستەکەی داو هاویشتیە دەوی، گۆتی: ماشەڵلا بەتامە، ئەرێ بەمن برێ ئەو ماستەت لەکێ کڕیە؟ داکم گۆتی: وەڵلا لە حاجی حەسەنە ڕەشم کڕیە، ماستی وی دەرەجە ئێکە، بابم گۆتی: ڕاست دەکەی، ئەوجە بابم ڕووی لەمن کردو گۆتی: بەتەمای چی؟ گۆتم: لەچ؟ گۆتی: لە مەسەلەی هەورینی، داک هەموو شتی لۆ باس کردیمە! گۆتم: سەرم لێ شێوایە، بەخۆشم نازانم چبکەم و چنەکەم، بەران ئەوەی دەزانم، ئەگەر دنیاش خرابی، ئەمن هەورینی هەرناگرم، ئەوە بڕیاری زۆر غەرەتەو تووشی دەردەکی زۆر گەورەمان دەکا! بابم گۆتی: کوڕی گەورەم، ئەتوو پیاوەکی ئاقرو تێگەیشتی، نەکەی بە عاتیفە فکر بکەیەوەو مێشکت وەلا بنێی، ئەتوو بەتاقی تەنێ لەناو بەلەمەکی نی، ماری مەو ماری قادرە فەندیشت لەگەرە، یەک غەرەتی بکەی هەموومان دەخنکێین، ئەمن دەزانم هەورین لە ژیانەکی زۆر سەخت دایە، بگرە لە جهەنەمێ دایە، بەران ئەو ژیانە سەختەی وی بەوەی چانابی، ژیانی دوو بەرەبابان وێران بکرێ!
مایتی.[1]
⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!