پەپوولە
#ڕەسول سەفەریانی#
جەستەیەکی لاواز, ڕوخسارێکی ڕەنگ پەڕیو، جووتێ چاوی بەقووڵاچوو. لەسەر قەرەویلەکەی ڕاکشا بوو. یان باشترە بڵێم ڕایانکشانبوو. بە دەگمەن چاوی دەتروکاند. فرمێسکەکانی هێڵێکی بچکۆلانەیان لە دەشتی وشک هەڵاتوی گۆنای پڕ له چرچ و قەڵەشیدا داخستبوو. لە نێو ئه و هێڵە سپییەدا دەزویێک ئاو بەردەوام وەک دوا هەناسەی کانیاوێکی هیوا بڕاو لە بارانی بەهاری، بە ئاستەم و نەخۆش ئاسا بچڕ بچڕ خۆیان تا ژێر چەناگەی دەکێشا. لەگەڵ فرمێسکە بێوچانەکانی ئەو، مێردەکەیشی هەناسەی هەڵدەکێشا و چاوەکانی پڕ دەکرد و بەدەستماڵەکەی دەستیشی تاونەتاو چاوەکانی ئه و و خۆی دەسڕی.
- بیکە بەخاتری خودا و مناڵەکان کەم بگری. چەند ساڵە ئەمە کاری تۆیە. دەزانم ناخۆش بوو بەڵام خۆ بە ئەنقەست نەمانکرد. هەڵەیەک بوو کە بۆمان قەرەبوو ناکرێتەوە. ئەوە خۆت وەها لەناوبرد. ئایا پەپولەمان بۆ دەگەڕێتەوە؟
چەند ساڵە دەرو دەشت دەگەڕێیت. پەپوولە نەماوە نەیبینیت. هەموویانت بەسەر کردوەتەوە. بەڵام هیچ ئاکامی نەبووە. ئەوەی تۆ لێیدەگەریت، لەم دونیادا نییە. ئەوە خەوبوو بەقوربان، خەوێک کە تەعبیرەکەی بۆ نەگبەتی وەهای لێهات. هەر کە خەوەکەت گێڕاوە، من دڵم داچلەکی، ترسام، بەڵام بیرم نەدەکردەوە کە پەپوولەکەمان بە هەڵەی خۆمان باڵ دەربکات و بفڕێت. بفڕێت ووەها زامێک لە جەستەی ژیانمان بدات، کە پاش ساڵەها هەر بە تەڕی بمێنێتەوە. بفڕێت و نەک هەر خۆی بەڵکو تۆش و هەموو تامی ژیانم لە گەڵ خۆی بەرێت. ئه و فڕی و دەنگی تۆش بڕا. له و ڕۆژەوە دەنگی تۆ و ڕەنگی پەپوولە تەنیا لە ناو بیر و خەیاڵمدا ماوە.
ئەمڕۆ ڕێک سێهەمین ساڵی ئه و ئێوارە نەگبەتەیە کە تا ئێستاش هەر بەره و تاریکی چووە و، کازێوەیەک سەری نەکردوە بە حەوشەی ماڵەکەمدا. شه و وبێدەنگی وخەفەت بوونەتە خۆرەی ڕۆح وگیانی خۆم و خێزانم.
هەناسەیەکی قووڵی هەڵکێشا و بە دەسماڵەکەی چاوەکانی سڕی و ئاخێکی دووکەڵاوی هەڵکێشا... ئاخ پەپوولە. کەس نییە ئه و ساتانەی تۆی دیبێت. کەس چاوی لە جەستە بچکۆلە ناسکەکەت نەبوو کە چۆن وەک پەڕەی گوڵ بەدەستی ترسەوە هەڵدەوەری. چۆن دڵە بچکۆلانەکەت بە چنگاڵی گورگی مەرگ وەستا و دەنگە ئازاراوییەکەت لە گوێی ئاسمانی کەڕدا خنکا.
باوکی پەپوولە ڕاستی دەکرد کەس جگە لە من ئه و ساتە جەرگبڕەی نەبینی بوو. ئه و ئێوارەی کە کۆتایێکی تاڵ بوو بۆ ڕۆژێکی خۆش و دڵ لاوێنی دوو بنە ماڵە.
پەپولەیەکی بچوکی بەدەستەوە بوو. بە هەڵاتن ئەهات و لەبەر خۆیەوە قسەی بۆ پەپولەکە دەکرد:
- ئێستا بە دایکمت نیشان دەدەم. باڵەکانتی بۆ بکەوە با بزانێت من چیم گرتووە، باش. ئەزانی منیش نێوم پەپوولەیە. دایکم پێم دەڵیت پەپوو. من پەپوولەی دایکمم و تۆش پەپوولەی منی.
لە لێژییە بچکۆلەکەی نێو باخەکە سەرکەوت. گەیشتە نزیک ئه و شوینەی وا هەموو خێزانەکەی خۆیان و ماڵی خاڵی پێکەوە لە بەیانی پێش تاو کەوتنەوە هاتبوونە ئەوێ. گەیشتە پەنای ئه و کانییەی وا تەنیا چەند هەنگاو لە دارەکانی شوێنی دانیشتنەکە دوور بوو، بەڵام دەنگی کەس نەدەهات. لای سەیر بوو. ئەمڕۆ چەند جار وەدوی پەپوولە کەوتبوو، پەپوولەی ڕەنگاورەنگی گرتبوو، وەک ئێستا دەیهێنا بۆ لای دایک و خوشکەکانی. هەر کە دەگەیشتە نزیکەی کانییەکە دەنگە دەنگی ئەوان سەرنجی ڕادەکێشا. کانییەکەی جێهێشت و گەیشتە بن ئه و چەند دارەی وا ئەم بەیانییە ڕاخەریان لەژێر داخست و نان و خواردنیان لەسەر دەخوارد. بەڵام ئێستا تەنیا توێکڵە تۆو و بڕێک ورتکە نانی بینی لە شوێنەکەیان. بڕێک سەیری دەوروبەری خۆی کرد، کەس نەبوو. دڵی پڕبوو، قیژاندی، دایە... دایه... دایەگیان. بەره و جادە خاکییەکەی ڕووانی کە ئەم بەیانییە لێوە هاتبون. لەدوورەوە لە نێو هێڵێکی چڕی تەپوتۆزەکەدا هەردوو ماشینەکەی ناسییەوە. دەڕۆیشتن و دوور دەبوونەوە. هەڵات بە شوێنیاندا و قیژاندی. دایەگیان، دایە، خاڵە... منتان نەبرد من ماوم. من... دایەگیان...
بەڵام ئەوان هەر دووردەبوونەوە و وردە وردە تەنیا هێڵێکی تۆز و خۆڵ دەبیندرا و ئەویش تا دەچوو کاڵتر دەبووەوە. پەپولە دەگریا و دەیقیژاند و هەڵدەبەزییەوە. بەرو دوای دەکرد و بە چوار دەوریدا هەڵدەهات و دەیقیژاند. بەڵام ڕۆژ درەنگ بوو، کەس لە مەزرا و دەشت نەمابوو. کەس دەنگی نەدەبیست. تاو نیشتبوو. سەنگی سامی تاریکی قورستر دەبوو. پەپوولە تەنیا. تەنیاتر لە پەپوولە کێوییەکان لە قوڕگی شەوە زەنگدا نامۆ و بێکەس دەزریکێنێت. هاتەوە بن دارەکەی ئەمڕۆیان. بەدەم گریانەوە، جەستەی وەک چڵی دەم با بە دەس ترسەوە دەلەرزی. تەنیا ناسراو و جێ متمانەی، دارەکەی ئەمڕۆ بوو. پااڵی پێوەدا و بە دەم گریانەوە وردە وردە لاقەکانی شل بوون، دانیشت و ئەژنۆکانی لە پاوەشگرت و بە ترسەوە بۆ دەوری خۆی دەڕوانی. هەوا تاریکتر ببو. گریان بەردەوام، بەڵام هێزی هاواری نەمابوو. دەنگی تا چەند مەترێک پتر بڕی نەدەکرد. جادەکە لاڕێ و چۆڵ بوو. دارودەوەن زەبەلاح و سامناکیان دەنواند.
ماشینەکان گەیشتنە نێو شار و چەن شەقامیان بڕی و لە دووڕیانی نزیک هەردوو ماڵەکە بە بێ ئەوەی بوەستن، هەر لەناو ماشینەکەوە بە دەست خواحافیزییان لەیەک کرد و هەرماڵە و بەره و شوێنی خۆی لێخوڕی. بە پەلە درگاکانیان کردەوە و سەیارەکەیان خستە حەوشە و هەڵاتنە سەر بۆ بەردەم تێڤێکە. باوکی پەپوولە خەوی دوای خواردنەوە سەری لێدابوو. بەڵام بە هانی دایکی پەپوولە و باقی مناڵەکان دانیشتنە سەیری ئەوسریاڵە تەلەفزیونییەی وا پەلەیەن بوو بۆ دینتنی.
- هەموو شەوێک تا ئێستا سەیرم کردوە و نامەوێت بپچرێ و چیرۆکەکەم لێ بشێوێت. ئەمە دایکی پەپوولە لە دەشت وتبووی.
- بەڕاستی منیش پێم خۆشە زووتر بچینەوە ماڵ و سەیر بکەین. ئەڵێن چی ؟ خاڵۆژنی پەپوولە وتی.
خاڵۆی و باوکیشی کە ئیتر یاری تەخته و خواردنەوەیان تەواو ببو، لەگەڵیان ڕێک بوون و وتیان ئەگەر وایە خێرا بکەن. خۆتان کۆکەنەوە با درەنگ نەکەوین.
پەپوولە لە ژێر ڕەشایی قورسی شەودا سەری لەسەر ئەژنۆکانی دانابوو. به دەستەکانی دەم و چاوی داپۆشی بوو بۆ ئەوەی تا ڕیکی و دەوروبەرە سامناکەکە نەبینێت. خشەی گەڵا و دەنگی جڕوجانەوەر خەریک بوو زریکەی پێدەکرد. هاواری نەمابوو. هەنیسک و گریان توانای لێبڕی بوو. بە نوزەیەکی ئاستەم و بەدەم هەنیسکێکی بێ وچانەوە لە بەر خۆیەوە هیوابڕاوانە دەیگوت: دایەگیان بۆ، بۆ جێت هێشتم، خۆ ئەملۆ من کچی چاک بووم. بەقسەتم کرد. جلەکانم پیس نەکرد نانەکەم خوارد. دایەگیان ئیتر پەپولەش ناگرم توخوا وەرە بمبەوە. گووم خوارد ئیتر بەقسەت دەکەم. خۆ تۆ وتت ئەگەر درەنگ بێیتەوە جیت دێڵم. من خۆ درەنگ نەهاتومەتەوە. بۆ جێت هێشتم. خۆ تۆ وتت من پەپوولەی تۆم...
درەنگ بوو سریاڵەکە خەریک بوو دەستپێبکات. لە نیوەی سریاڵە کەدا مناڵەکان خەویان لێکەوتبوو. کۆتایی فیلمەکە دڵتەنگ بوو. باسی مردنی مناڵێکی نەخۆش بوو. کروزاننەوە و گریانی دایکەکە، هەستی دایکانەی دایکی پەپولەی بزواند و دڵی پڕ بوو. چەند دڵۆپ فرمێسکیش لە گۆلی چاوەکانی بەره و گۆناکانی ترازا و بە نەرمی و ئارامی خۆیان تا لای لێوی خزاند. بە گۆشەی ڕوسەرییەکەی سەری، کە ئێستا ئیتر لەسەری خزابووە دەور ملی، سڕی و ڕووی لە باوکی پەپوولە کرد و پی وت کە تێلێک بۆ ماڵی خاڵی پەپوولە بکات با بزانێت ئەگەر پەپوو نەخەوتوە بچێت بە شوێنیدا.
دەنگێکی نەرم و دلاوێن وەک دەنگی دایکی هاتە گوێی: پەپوولە. پەپولە سەری هەڵێنا، لەبەردەمیدا پەپولەیەکی سپی گەورە. وەها گەورە کە دەکرا سەرو چاوی ببینیت.هەستی کرد دەیناسێت. جووتێ باڵی نەرم و سپی لە تاریکییەکەدا دەدرەوشاوە. پەپوولەکە وتی: هەستە با بڕۆین. لێرە نابێ دانیشیت.
پەپوولە: ئاخر من نابێت بڕۆم بۆ هیچکوێ. ئێستا دایکم دێتەوە. ئه و هەمیشە پێمی وتوە بەتەنیا نەچم بۆ جێگایەک. پێمی وتووە ئەگەر هاتوو ون بووم هەر لە شوێنەکەی خۆم دانیشم دێتەوە بۆ لام. دەبێ چاوەڕیی بم.
پەپوولەکە: نا تۆ تەنیا نیت . تۆ لە ئێستاوە ئیتر لە گەڵ من دەبیت. تۆ ئیتر باڵت هەیە. دایکیشت هیچ ناڵێت.
بەم قسەی پەپوولەکە، پەپوولە بیری ئه و ڕۆژە کەوتەوە کە دایکی خەوەکەی خۆی بۆ باوکی دەگێڕاوە. پەپولە جووتێ باڵی سپی دەرهێنابوو.
پەپولەکە دەستە نەرمەکانی لە ژێر باڵەکانییەوە ڕاکێشا بەره و پەپوولە. ئەویش بە نەبەدڵی بەڵام بە ناچاری دەستی خستە نێو دەستی. بەڵام هەستی بە نەرمی و بێ هەستی دەکرد. نەرم و بێ دەنگ وەک فڕینی نێو خەو، لە عەرزەکە بەرز بووەوە. سوک وەک پەل لە هەوادا وەستا بوو. سەیری خۆی دەکرد کە دانیشتبوو. گرمۆڵە و ترساو.
پەپوولەکە ڕایکێشا و ئەویش وەک بازەحەواییکی سوک بە شوێنیدا بەرز بووەوە. پەپولە وەک چاوەڕوان، تا دەچوو هەر لای دەکردەوە. لە تاریکاییەکەدا خۆی لێ ون بوو. وەک دڵۆپێک لە تیشک دەرۆیشت و شوێنێکی هێڵ ئاسای لە دڵی ئاسماندا دەکێشا.
هێڵی تەپوتۆز لە دڵی تاریکییەکەدا وەک دووکەڵێکی چڕ دەهاتە بەرچاو کە بەشوێن موشەکێکەوە دەبیندرا. تا دوایین توانای ماشینەکە پێ لە پداڵی گازەکەی نرابوو. هاواری دەگەیشتە ئاسمان. پاوکی پەپولە بە جەستە ماشینی لێدەخوڕی و بە ڕۆحیش خەیاڵ. دایکی پەپوولەش گەرمتر لە هەناسەی ماشینەکە گڕ لە دەروونی دەردەپەڕی و هاواریشی لە ئاسمان توند ببوو. خۆی دەڕنی و شیوەنی دەکرد. بە کەس ئارام نەدەبووەوە. خاڵ و خاڵۆژنی پەپولەش هەوڵیان دەدا هێوری بکەنەوە.
ئەتۆ خۆت مەکوژە، باش نییە، ئینشااللە هیچ نەبووە و ئێستا دەیگەینێ و دەیێنینەوە. بەڵکو شوانێک، دەشتەوانێک، ڕێبوارێک لەلای بێت. خۆ قڕە ئینسان لە دوونیا دانەکەوتە.
بەڵام دایکی خەریک بوو دەسوتا. دەیگوت فیلم بە زووخاوم بێت. خەتای من بوو. لەخۆشی فیلم لەبیری کچەکەمدا نەمام. کوێرایم داهات. پێم وابوو لەگەڵ نازدار پێکەوە وەک ئەم بەیانییە لە ماشینەکەی ئێوەدایە. بۆیە دڵنیا بووم. جا ئێستا من چی بکەم. دە پێم بڵێن، بۆ پێم ناڵێن من چی بکەم. دە پێم بڵێن. پێم بڵێن ئێستا پەپوولە تۆقی کردوە. پەپوولە بێ دایک، بێ باوک، بە تەنیای تەنیا. کوێراییم دا بێت. دەک لال بم ڕۆڵە.
جادە چۆڵ و تاریکەکە کۆتایی هات و گەیشتنە شوێنەکە. باوکی پەپولە ماشینەکەی بەره و دارەکان ڕاگرت و بە بێ ئەوەی بیکوژێنێتەوە بە خێرایی دەرپەڕییە دەرەوە و ڕوو لە شوێنی دانیشتنەکە هەڵات. چرای ماشینەکە تا ناوقەدی دارەکانی ڕوناک دەکردەوە بەڵام شوێنی دانیشتنەکە بە هۆی سێبەری دارەکانەوە و دوورییەکەی هێشتا تاریک بوو.
دایکی و ئەوانیش بە هەڵاتن بە دوای باوکیدا بەره و شووێنەکە دەرویشتن و هاواریان دەکرد و بانگی پەپوولەیان دەکرد. دەنگە دەنگ و شیوەن پانتایی دەشتەکەی گرتبوو. بەڵام وەڵام نەبوو. هەوری بێدەنگی و بێوەڵامی تا دەچوو تیشکی هیوای پتر کپ دەکرد. خالۆژنیشی کە تا ئەودەمە خۆی ڕاگرتبوو، دایە گریان و، ئەم کارە کوانووی گریانی دایکی پەپولەشی خۆشتر کرد.
باوکی پەپولە هەر لە چەند مەتریەوە هەستی بە ڕەشاییەک لە بن دارەکەدا کرد. بڕێک هیوا کەوتە دڵی. له و چەند چرکەدا پێش گەیشتنە لای دارەکە، لە خودا پارایەوە کە پەپەولە بێت و خەوی لێکەوتبێت. هەر کە گەیشتە سەری بە ئارامی دەستی هێنا بە سەریدا بۆ ئەوەی دانەچڵەکێت. بەڵام جووڵەی نەبوو. بە هێواشی بە نوکی پەنجەی لە سەر شانی دا. هەر دەنگ نەبوو. هەر دوو بن باڵی گرت بۆ ئەوەی لە باوشی بگرێێ. کە بەرزی کردەوە ، سەری کەوت بە پشتا و ڕوومەتی بێرەنگ و بێگیانی، هەواڵی لە درەنگ گەیشتنی ئەوان دەدا.
دایکی پەپوولە کە تازە گەیشتبووە شوێنەکە و پەپوولەی وەها بێگیان و بێ ڕەنگ و دەنگ بینی، لە ناخی دڵییەوە زریکانیپەپوولە و لە سەرخۆ چوو. خاڵ و خاڵۆژنی کەوتن بە کۆی دایکیدا. هەوڵیان دا بی هێننەوە هۆش، بەڵام بێسود بوو. ناچار بە دوو کەسی پەلکێشیان کرد بۆ لای ماشینەکە. کە گەیشتن، باوکی پەپولە لە پشتەوە دانیشتبوو، پەپولەش لە باوشیدا. بە کوڵ دەگریا و ئاگای لە دەوروبەری نەبوو. بە بینینی دایکی پەپولە بەدەم گریانەوە هاواری دەکرد: ماڵ وێران بووم.
لەورۆژەوە کەس وشەیەکی لە دایکی پەپوولە نەبیست. باوکی پەپولە دەڵێت: زبانی لەگەڵ پەپوولە چوو. له و ڕۆژەوە ماڵەکە کپ و مناڵەکانیش گوڵی خەندەیان هەڵوەریوە و ئەڵێی باخی پاپیز گەستەن. ڕۆژێکی خۆشیان نەبینیوە. بۆنی خەم هەر لەبەر دەرگای حەوشەکەوە هەستدەکرێت.
دایکی پەپوولە وا سەردەمێک جوانییەکەی بە ناو بانگ بوو، ئەمڕۆ بە دایکە شێتەکە ناسراوە. له و باڵا بەرز و ڕێک وپێکە کە جووتێ چاوی ڕەش لە ڕوخساری سپی و خڕیدا نەخشابوون و کەس تێری لە نیگایان نەدەخوارد. تەنیا مشتێک ئیسک و، پێستێکی سوتاوی بەر تاو و وشکهەڵاتوو ماونەتەوە. ئێستا لە هاتو چۆش کەوتووە. هیچ ناخوات. دوێنی دوکتور هات بینی. دەڵێت لە باری جسمیەوە ساخە بەڵام ڕۆحی سەرگەردانە.
لە دوا نیوەڕۆوە خزمەکانی لەلای کۆبوونەتەوە. بەڵام ئه و چاوەکانی مۆلەق ڕوولە پەنجەرەکە وەستاوە و نایانگەڕێنێت. ئەڵێی ئاگای لە هاتنی کەسیان نییە. یان ڕەنگە ئاگای لێبێت و بە هێندیان ناگرێت. ئەڵێی چاوەڕوانی کەسێکی تایبەتە.
هاوینه و هەوای گەرم. پەنجەرەکان کراونەتەوە. خۆر داچووە بەڵام تاریک نەبووە. خاڵۆژنی پەپوولە بە پچە بە مێردەکەی دەڵێت ئێستا ئه و سەعاتەیە وا لە باخەکە هاتینەوە و ئه و کارەساتە ڕوویدا. مێردەکەی ڕەنگ دەگۆرێت. ئەوانیتر سەیری یەکتر دەکەن و بە بێدەنگی خەمێک دەستاودەست دەگەڕێنن. یان زامێک هەڵدەدەنەوە. هەناسەکان قورس بووون. بیدەنگی باڵی قورستر کرد بەسەر ماڵەکەدا. هەستێکی ناسراو، وەک کسپەی سوتان بەرۆک بە خیزانەکە دەگرێت. بەڵام کەس ناوێرێت دەری ببڕێت. چاوەکان کاری زبان و وشە و دەنگ دەکەن. لە پەنجەرە ئاوەڵاکەوە پەپوولەیەک دێتە ژوورەوە. پەپوولەیەکی سپی و زل. بێدەنگە بەڵام هەمووان هاتنی هەست پێدەکەن. نەرم و سامناک بە ژوورەکەدا دەفڕێت. سوڕێک دەگەڕێت و پاشان لە سەر سنگی نەخۆشەکە دەنیشێتەوە. چاوەکانی ئه و پێشتریش سوڕی پەپولەکەی شوێن گرتبوو. ئێستا سەیریان دەکات. ڕوخساری دەگەشێتەوە. خوێنێکی کەمی تێدەزێت. بە نەرمی و ئارام وشەیەک دەڵێت. وەها کە هەمووان لە بێدەنگیەکەدا بیستیان.پەپولە. پاشان زەردەیەک دەنیشێتە سەر لێوی و لە ڕومەتیدا وەک نەخشێک جێدەگرێت. پەپولەکە بە ئارامی هەڵدەستێت. نیگاکان لەگەڵی هەڵدەستێت. سوڕێک دەخوات بە ژوورەکەدا. لە بەر ڕوومەتی باوکی پەپولەدا چەند باڵ لێدەدات و بەره و پەنجەرەکە دەفرێت. نیگاکان لەگەڵی تا دەرەوە دەچن و ڕەوانەی دەکەن. کە ون بوو، نیگاکان دەگەڕێنەوە. هەموویان بە ئارامی ڕوو لە دایکی پەپوولە دەکەن. زەردەکە بە لێویەوە بەستویەتی و لەشی سارد بووەتەوە. کەسێک لە پەنایەوە دەستێک بە چاوە هەمیشە کراوەکانیدا دەهێنێت. چاوەڕوانی کۆتایی دێت.[1]