لە باوبۆراندا
داوود پینسکی
لە ئینگلیزییەوە: #محەممەدئەمین مەجیدیان#

وەک ئامۆژگاری و ئاگادارکردنەوەیەک بۆ گوناحکاران، بۆ لاوان و نوێخوازان، ژنێکی ئیماندار و لەخواترس ئەمەی بۆ من گێڕاوە.
پەڵە پەڵەی هەوری ڕەش کەوتنە ئاسمانی ڕوون، هەورێکی چڕ و گرژ لە پێشدا لەدوور لەوپەڕ لێڕەوارەکەی قەراخ دێوە، هەر زوو هەموو ئاسمانی گوندی داپۆشی. بایەکی توند ئەم هەورانەی بەرخۆ دابوون؛ ئەوانیش مڕومۆن، ئاڵۆز و تووڕە، لە پێشیەوە هەڵدەهاتن. گێژەڵۆکەیەکی شێتۆکە ئەستوونگەلێکی لە تەپووتۆز تا بەرزایی لای هەوران بەرز کردبۆوە، بانی سەرماڵانی ڕادەماڵی و دار و درەختانی لەبن دەردەهێنان. ترس ولەرز هەموو خەڵکی دێکەی داگرتبوو. ڕۆژی ڕووناک لەناکاو ببوە شەوی تاریک، ئەرێ، وەک شەمۆی تۆبە و پەشیمانی، شەمۆی بەر لە ڕۆژی سڕینەوەی گوناحان تاریکییەکی تۆقێنەر، دڵگر و ناخۆش هەروەک دڵی جوویەکی دیندار، کشابوو بەسەر ئاسمانی دێدا. خەڵکی خۆیان لەماڵەوە زیندان کرد. پەنجەرەکانیان پێوەدا و درگاکانیان داخست. سۆز و دڵگەرمی تۆبەکارانی جوو هەر دەهات و زیاتر دەبوو. تاریکیش هەموو دێی لە باوەش خۆی گرت.

چەینی پیر سەری لە مەزموورەکەی هەڵبڕی و لە پشت چاوێلکەکانیەوە چاوێکی لە خیابان کرد و گوتی:
ئۆ هۆ!
بە دڵێکی لەرزۆکەوە هەناسەیەکی قووڵی هەڵکێشا. تاوێک ڕوانی بۆ دەرەوە. سەری خۆی ڕاوەشاند. سەری سووڕمابوو لە توانایی بێ سنووری خوا.
هەوا ڕوونتر نەدەبۆوە. هەورەکان بێئارام و ئاڵۆز لەجووڵەدا بوون. بایش دەیلووراند. ستوونە ئەستوورەکانی تەپووتۆز لە ڕیگەدا خولیان دەخوارد.
چەین لەوە زیاتر نەیتوانی کتێبە مەزموورەکەی بخوێنێتەوە، چاویلکەکەی لە چاوان داگرت و لەسەر پەڕەکانی کتێبەکەی دانا و هەستا چوو بۆ هۆدەی کچەکەی.
چی دەڵێی بەم؟

چەین پرسیارەکەی بۆ تەواو نەکرا. ژوورەکە کەسی لێنەبوو. پیرێژن چاوێکی بە هۆدەکەدا گێڕا، چوو تەماشایەکی چێشتخانەکەی کرد و گەڕایەوە بۆ هۆدەکە. کڵاوی کچەکەیش لەجێی خۆی نەبوو. بەدەستێکی لەرزۆک دەرکەی ژوورە بچووکەکەی کردەوە، چاکەتەکەشی هەر لەوێ نەبوو!
کچەکەی ڕۆیشتبوو! پێشتر ئاگاداری و وریایی دابوویێ، لەوە دەچوو ئەمڕۆ نەچێتە دەر. لانیکەم لەم شەمۆی تۆبە و پەشیمانییەدا دەبوو لەماڵ بمێنێتەوە و ڕاینەکردایە بۆلای ئه و خوێندکارە' لە دین وەرگەڕاوە' دا.
سیمای پیری لە ڕقان وەک ئاسمان گرژ و تاڵ بوو. تۆفانی تووڕەیی لە دەروونیدا هەڵیکرد. چاوێکی بە ژوورەکەدا گێڕا، هەر وەک ئەوەی بۆ دەرفەتێک دەگەڕا ڕقی دەروونی خۆی بەسەر کەسێک یان شتێکدا بڕژێنێتە دەر.
بەدەم ئاخ هەڵکێشانەوە دەستی بەره و ئاسمان بەرز کردەوە. تووڕەیی لە سنگیا تەقیەوە. لەبەرخۆیەوە دەیبۆڵاند و دەیگوت:'' ئه و ئیتر کچی من نییە!''
لەم شەمۆ ڕەش و دڵتەنگکەرەدا پیرێژن ترسی ڕەویبۆوە، زاری نەدەوەستا لە نەفرین کردنی کچەکەی بە پیسترین واژەگەلی ناشیرین. ئەگەر دەستی گەیشتبایە، قژەسەری ڕادەکێشا و بە زللە دەیکێشا بە ڕوومەتیدا.
خێرا چارۆکەکەی بەسەر خۆیا دا و لەماڵ هاتەدەر. ئه و دەیهەویست لەدەرەوە لە دوویان بگەڕێ. ئارەزووی دەکرد هەردووکیان بەره و ڕووی کارەساتێکی خراپ ببنەوە.
ڕووناکیی برووسکەیەک دڕی بە هەوران دا. هەوریش بەدوایدا گرماندی. برووسکە لە دوای برووسکە، گرمە لە دوای گرمە چاویان زیاتر لە بینین دەبڕی و گوێیان زیاتر لە بیستن دەخست.
ترس و سام کەوتە نێو دڵی دانیشتوانی دێ... برووسکە و هەورە گرمە له و شەمۆی تۆبە و پەشیمانییەدا، ئەویش به و شێوە ئەهریمەنییە! کاری کردە سەر دڵان و هەموو لە ترسانا کەوتنە نوێژ و نزا کردن.
بەڵام خۆ پیرە چەین گوێی لەمانە نەبوو.
با تەپوتۆزی ئەدا بە چاوانیدا، لەچکەکەی سەری دەڕفاند، داوێنی کراسەکەی بەملاولادا دەبرد و قژەکەیشی له و سەرە پیرەی دەئاڵاند.
ئاشکرا بوو زۆر بەپەلەیە.
لە ڕێگەدا نەدەنگێک دەهاتە گوێی نە شتێک دەهاتە بەرچاوی. تۆفانی ڕق و قین لە دەروونیدا هەڵچووبوو و بەره و پێش پاڵی پێوە دەنا. دنیای بەردەمی تاریک و خوێن بەری چاوی گرتبوو.
باڵا بچووکەکەی لەوەش کەبوو بچووکتر ببۆوە. بە نووشتانەوەوە هەنگاوی گەورەی هەڵدەهێنان، هەناسەی لێبڕابوو، دەتگوت توندتر لە با دەڕوا و با بەشەلە شەل بەدوایەوەیە. ئەگەر هاتوو باش بگەیشتبایە لای تەنیا نەقیزەیەک بوو بۆ ئەوەی خێراتر پێی پێ هەڵگرێ.

پیرێژن لە ڕێدا سەیری ئەملاولای خۆی نەدەکرد، سەرنجی نەدەدایە ئه و چاوانەی بەدزیەوە لە پشت پەنجەرە داخراوەکانی ئه و ماڵانەی سەر ڕێ، بۆیان دەڕوانی. ئه و نە چاوی لە هیچ بوو نە گوێی لە دەنگێک، تەواو نوقمی گێژاوی تووڕەیی سروشتی خۆی بوو.
سروشتی بیر و ڕای بەڵایەک بوو، بەڵایەکی ترسناک، بەڵایەکی کوشندە، نەک لە قسەدا بەڵکوو لە هەموو گیانیدا. ئەم بیرکردنەوە لە ناخیدا هاواری دەکرد و دەیگرماند، بەجۆرێ که گرمەی هەورە ڕەش و تاڵەکانی ئاسمانی لە خۆیا مراندبوو.
'چەین' هەر کە گەیشتە بەر ماڵی ئه و کافرە لە دینوەرگەڕاوە، تاوی دەرکەیدا و کردیەوە، بە هەموو هێزی خۆی دایەوە بەیەکدا. ئەوانەی له و ژوورە بوون، له و بەسەردادانە کوتوپڕیەدا مووچڕکەیەک بە لەشیاندا گەڕا و ڕاپەڕینە سەر پێیان.
چەین بەچاوێکی پڕ لەقین تەماشایەکی کردن. بە نێویانا تێپەڕی و ڕووی لە ژوورەکان کرد. لەم ژوور بۆ ئه و ژوور، له و ژوورەوە بۆ یەکی تر، بەدەم هاوار و هەڕەشەوە دەرکەکانی دەکردەوە و بەدوای خۆیدا توند ئەیدانەوە بەیەکدا. هەر وەک ئەوەی بیهەوێ بزانێ کامە درگایان زیاتر لەوی تر ئه و شووشە پەنجەرانە دەخاتە شەقە شەق و هاڕە هاڕ. مناڵێکی بچکۆڵە لەم شەقە شەق و هاڕە هاڕە ترسا و کەوتە گریان.
پیرە چەین لەم دیو ڕایدەکرد بۆ ئه و دیو، کەچی نە ئه و بێدینەی دییەوە نە کچەکەی.
لە گەڕانەوەدا بۆ دەم دەرکە، تاوێ ڕاوەستا، چاوەکانی بەره و ئاسمان گێڕا و دەستەکانی بۆ لای خوا بەرز کردەوە و به و دەنگە گڕ و نووساوەیەوە هاواری کرد: ''دەک خوایە ئەم ماڵە ئاگری تێبەربێ!''
ئەمجار چووە دەر، دەرگای سەرخیابانی لەگەڵ خۆی بەتوندی ڕاکێشا و بە کراوەیی بەجێی هێشت. خێزانی ماڵ واق و وڕ، دەم داچەقیو مابوونەوە، هەر وەک گەردەلوول ماڵی لێ ڕووخاندبێتن. لە کاسی و حەپەساندا کەس بیری ئەوەی نەبوو زاری هەڵپچڕاوی خۆی لێکبنێتەوە.
لە هەورەکانەوە تاوە بارانێکی توند تێکەڵ بە تەرزە دایکرد. تۆفان وەک مەنجەڵی سەر ئاور هاتە کوڵین. تۆفانی سنگی چەینیش هاتبوە کوڵین، شتێکی ترسناک لە دەروونیدا هەڵچووبوو، ئیتر چاوی لەبەرپێی خۆی نەبوو. هەموو گیانی لە ئاوا خووسابوو.

بەڵام ئەمانە ڕێگری سەر ڕێی نەبوون، تەنیا دڵڕەقیە دەشتەکیەکەی بەهێزتر دەکرد.
لەم ماڵ ڕایدەکردە ئه و ماڵ، لە هەر کوێ شکی بچووبایە کە کچەکەی و ئه و بێدینە لەوێن سەری پێدا دەکرد، ئۆقرەی لێبڕابوو، بەبێ ئەوەی دەم بکاتەوە کە چیی دەوێ، دەهاتەوە دەر و خێزانی ماڵەکەی بە سەرسووڕماوی و حەپەساوی بەجێدەهێشت.
هەرچۆنێک بێت دەبێ پەیدایان بکا، ئەگەر لە ژێر زەویشدا بن.
لە دوایین ماڵ کە دەرپەڕی، تاوێک حەساوە. بیری کردەوە ئەی ئێستە بۆ کوێ؟ ڕووی لە ماڵی خۆی نا. دڵی دەیگوت ئێستا کچەکەی دەبێ لەماڵەوە بێت.
خراپترین نفرین و لەعنەت لە زاری دەکەوتنەدەر، ڕق و کوڵی دەروونی لە ئەوپەڕی خۆیدا بوو.
لەگەڵ ڕەشەبایەکی توند، بروسکەیەک و هاڕەی هەورەگرمەیەک خۆیکرد بە ماڵا، کچەکەی نەهاتبۆوە.
لەسەر کورسییەک دەمێک ڕۆنیشت و دەستی کرد بە شیوەن و لاڵانەوە.
لەپڕ تەقینەوەی هەورە گرمەیەکی سامناک لە ئاسماندا دەنگی دایەوە. یەک له و هەورەگرمانە کە دەبنە هۆی وێرانکارییەکی بەرین. دەتگوت سروشت خۆی لە پاشماوەی ئه و هەموو هێز و وزەی کە له و هاوینە گەرمە بەجێمابوو بەجارێ ڕزگار کرد. خەڵکی دێ هەموو لەترسا لە جێیان وشک بوون، ڕوانیان بۆ دەور و بەریان. دوایی بۆ دەرەوە، ئاخۆ کارەساتێک ڕووی نەدابێ؟ تۆبەکارانی جوو زیاتر سەریان خزاندە نیو کتێبە دۆعاکانیان و زۆرتر لە هەمیشە دڵ و دەنگیان کەوتە لەرزین.
وادیار بوو 'چەین' ئەم شریخەی نەهاتبوە گوێ. دەگریا و دەکڕووزایەوە، دوایی وەک هەورەگرمەیەک شیڕاندی: ''هۆ خوای هەموو جیهان؛ ئەم کچەم بەزیندوویی نەگەڕێتەوە ماڵ! خوایە بەمردوویی بۆم بهێننەوە!''
هەوران بە گرمەیێکیتر وەڵامیان دایەوە. بایش توندتر لە پێشوو گڤەگڤی دانا.

کوتووپڕ چەین لە جێی خۆی بەرز بۆوە و لەماڵ دەرپەڕی. بایش بوو بە هاوڕێی... دەمێک لەدوایەوە پاڵی پێوە دەنا و دەمێکیش وەک سەگێکی بەوەفا لەپێشیەوە دەڕۆی و دەیدا لە هەموو شتێکی بەرپێی، قوڕ و چڵپاوی سەر ڕێگای بەملاولادا دەپڕژاند و تێکەڵ به و دڵۆپە ڕەش و درشتانەی بارانی دەکرد کە لە هەوران دەبارین و ئه و فرمێسکە گەرم و داخانەی لەچاوی چەین دەڕژانە خوار.
چەین لە ڕێگاکەی ئەوپەڕ دێوە ڕایدەکرد. بێگومان له و ڕێگاوە چوون بۆ گەڕان. لەوێ کە زۆرجاری دیکە بینرابوون.
له و ڕێگایە، یان لە میوانخانەکەی جۆناJonah، نزیک دارستانەکە دەیانگاتێ.
لە کۆڵانەکەی جەنتیل، دوایین کۆڵانی گوند، سەگەل لە حەوشەی ماڵەکاندا، زرمەی پێیان هاتە گوێ کە بەنێو ئه و قوڕ و چڵپاوەدا بازی دەدا. دانه دانەیەکیان لە پشت دەروازەکانیانەوە کەوتنە وەڕین، بەڵام لەبەر باران نەیانوێرا بێنەدەر؛ ئەوانیتر ئەوەند تەمبەل نەبوون، لە کەلی ژێر دەروازەکانەوە بە سنگەخشکێ هاتنە دەر و بە حەپەحەپ دوای کەوتن.

پیرە چەین سەگوەڕی گوێ لێنەبوو، سەگیشی نەدەهاتە بەرچاو. ئه و تەنیا دەیڕوانی بۆ دووری ئه و ڕێگە کە له و کۆڵانەوە دەستیپێدەکرد و ئه و لەسەری ڕایدەکرد.
سەگێکیان داوێنی کراسەکەی گرت. داوێنی کراسەکەی لەئاوا تەڕ و قورس ببوو. چەین گوێی بەمە نەدا، مەودایەکیش سەگەکەی بەدوا خۆیدا ڕاکێشا. بەڵام سەگ نەیتوانی له و لیزمە بارانەدا بەپێی ئه و دەرچێ، بۆیە داوێنەکەی بەردا. ماوەیەکیش بیری لەوە کردەوە، شوێنێکی تری بگرێ، بەڵام خێرا پەشیمان بۆوە و بە مڕەیەکی ترسناک گەڕاوە بۆ حەوشەکەی خۆی.
لەسەر ڕێگاکە با هێشتاش هەر بەهێزتر دەبوو. هەور دەیگرماند، نزارە نزیکەکانیش بە هەزاران جۆرە ئاهەنگ بۆیان دەسەندەوە. چەین لە نێو ئه و کەش و هەوا چڕ و تەموومژاویەدا تەنیا بۆ دوور لە بەردەمی خۆی دەیڕوانی.
سەر جادەکە پڕ بوو لە چیلکە و چەوێڵ و شووڵ و تووڵی ئه و دارانەی برووسکە لێی جیا کردبوونەوە. چەند داریش لە ڕیشەوە دەرهاتبوون. هەموو ببوونە خەڵووز و لەبەر پێدا کەوتبوون.
چەین لە ژێر لێوەوە بۆڵاندی:'' خوا بکا هەورە تریشقە لێیاندا و وەک ئەم دارە سووتاوانە ببنە کۆی زووخاڵ!''
ئه و لەبەر هاوار و ناڵەی دەروونی خۆی هێزی لێبڕابوو، ئێستا بە بێگومان شێوەی ئه و هەموو نەفرینانەی خۆی هاتبوە بەرچاو، کە ئه و هەورانەی سەرەوە لەویان جیا کردبۆوە.
به و حاڵەش چەینی هەر هەڵدەهات.
ئەی ئەوە چییە لێرە؟
چەند هەنگاوێک دوور لەبەردەمیا دوو کەس کەوتبوون. ژنێک و پیاوێک، بەسەر و چاوێکی شێواو و خوار و خێچەوە گرمۆڵە ببوون. دەمووچاویان ڕەش هەڵگەڕابوو. ڕەشایی لە چاویانا نەمابوو. هەردووکیان هەورە تریشقە لێیدابوون.
هەورێک چەخماخەی لێدا، شریخەیەکی کەڕکەریش بە دوایدا هات.
چەین کچەکەی خۆی ناسییەوە، زیاتر بە جلەکانیا تا لاشەی ڕەشەوەبووی؛ بە شێوەی بەژن و باڵایا تا به و چاوە سپییەوە بووانەی.
باسکێکی کچەکە کەوتبوە ژێر باسکی کوڕە گەنجەکەوە. چەتری دەستی کوڕەکەش ئاگری تیبەرببوو.
پیرێژن خەریکبوو بە نەفرین کردن بشیڕێنێ و هەڕەشە و گوڕەشەی خۆی تێکەڵ بە گرموهووڕی تۆفان بکا؛ لەگەڵ برووسکەیەک چاوەکانی بر یقایەوە ؛ لەناخیدا گەردەلوولێکی وێرانکەر بەرز بۆوە.
ئه و دەیویست بەدەم قیژاندن و هاوارەوە بڵێ ئه و کچە مردوە بە ئەنجامی کردارەکەی خۆی گەیشت. دەیویست بەدوایدا جنێوی پێس و قسەی سووک ڕەوانە بکا.
بەڵام لەناکاو بەرچاوی ڕەش بوو، وەک لێشاوێک لە قورقوشمی تواوە ڕژابێتە نێو سەری، ئەندامی کەوتە لەرزین. جلەکانی لە ئاو هەڵکشابوون، لەوانەبوو بیدەن بە زەویدا. چاوەکانی لەکار کەوتبوون.
برووسکە و هەورەگرمە و لوورەی با سەرلەنوێ دەستیپیکردەوە.
بەڵام لە دەروونی ئەم پیرێژنە ئیتر هەموو شتێک دامرکابۆوە. لەبەردەم تەرمی کچەکەیدا ئەژنۆی دادا. بە باڵە لەرزۆکەکانی کچەکەی لەباوەش گرت. گڕێکی سارد لە چاوەکانیا کەوتە پرتەپرت.
هەموو گیانی کەوتە لەرزین. دانەکانی بە یەکدا دەدران، بە دەنگێکی خاو و بێ تین بەدەم هەنیسکدانەوە، هاواری کرد: ''ڕۆڵە ئازیزەکەم! هەنی، کچە خۆشەویستەکەم.''[1]