دیدار: دلۆڤان هالۆ
نڤیسەرێ مێژوویا باژێڕێ زاخۆ (سەعید ڕەزڤان زاخۆیی)، ژ بنەماڵەکا کەڤن و بناڤ و دەنگە ل باژێڕێ زاخۆ، دەرچوویێ خۆلا پەروەردا (موصل)ە، پشتى (28) ساڵان ژ خزمەتا ماموستايەتیێ هاتيە خانەنشين کرن، گەلەک گۆتار ل ڕۆژنامە و گۆڤاران بەڵاڤ کرینە، بەردەوام بەڕنامەيێن ڕاديۆیێ ل دوور مێژوو و کەلەپوورێ زاخۆ پێشکێش کرینە، ئەندامێ ئێکەتيا نڤيسەرێن کورد – تايێ دهۆکێ یە، ل ساڵا (2005)ێ ب هاريکاريا چەندین هەڤالان ڕێکخراوەکا جڤاکێ سڤیل بناڤێ (ڕێکخراوا فەرەشين) يا پاراستنا ژینگەهێ ل زاخۆ دامەزراندی یە. (سەعید ڕەزڤان زاخۆیى) نڤیسەرێ مێژوویا (باژێڕێ زاخۆ) بۆ مالپەرێ (خەدەنگ) گوت: ” من بەهرا پتریا دەمێ خۆ ژ بۆ دویڤچوون و نيشاندان و ڤەکۆلينان ل دوور مێژوویا (باژێڕێ زاخۆ) تەرخان کریە، هەتا نوکە من (3)ێ پەرتوک ل دوور مێژوویا باژێڕێ زاخۆ چاپ کرینە کو هەر دوو پەرتوکێن {زاخۆ وێنە و مێژوو، زاخۆ کەلەپوور و ئەڤسانە و پێزانین (1900-1961)ێ} ب زمانێ کوردى و عەرەبى هاتینە چاپ کرن، و پەرتوکا سيێ ب زمانێ عەرەبی (زاخو الماضي والحاضر) هاتیە چاپ کرن”.
نڤیسەرێ ناڤهاتی، زێدەتر ژی گوت: ” ژ بلی چاپ کرنا پەرتوکێن مێژوویا باژێڕێ زاخۆ، من چەندین پەرتوکێن دی یێن ئەدەبی ژی ب زمانێ کوردی و عەرەبی چاپ کرینە، وەکو پەرتوکێن (ڕۆمانا خێڤزانک، ڕۆمانا پەری خان، چیرۆکا ئاخینک، چیرۆکا خەون، چیرۆکا میرێ میران) کو ب زمانێ کوردی هاتینە چاپ کرن، پەرتوکێن ئەدەبی یێن کو ب زمانێ عەرەبی هاتینە چاپ کرن (رواية الحلم، قصة الآهات، قصة الغجرية العاشقة، قصة المحاکمة العادلة)”.
ل دوماهیێ ژی گوت: ” پەرتوکەکا من یا نوی ل ژێر چاپێ یە ب ناڤێ (خابیر ژین و ژیان)، و ئەڤە بۆ ماوێ (2) ساڵانە ئەز مژویلى نڤیسینا پەرتوکەکێ مە ل دوور (مێژوویا جوهى یێن زاخۆ) ئەڤ پەرتوکە ژ قوناغا وەرگرتنا ژێدەران ب دوماهیک هاتیە و نوکە د قۆناغا چاڤپێکەڤتنان دایە دگەل دانعەمران، ل دەمەکێ نێزیک دێ هێتە چاپ کرن و کەڤیتە بەر دەستێ خواندەڤانان”.[1]