گەرەکی #تەعجیل# و #خانەقا# و #عارەبان# بووەتە وێرانەیەک و خانووەکانی داڕماون، ئەو هاووڵاتیانەی پێشتر لەو گەڕەکانە نیشتەجێ بوون، بە سیمای گەڕەکەکەیان، کە خەریکە لەناودەچێت، دڵتەنگن، بڕیار بوو دوای قەرەبووکردنەوەی هاووڵاتیان دەست بە نۆژەن کردنەوەی بکرێت، بەڵام جێگری پارێزگاری #هەولێر# دەڵێت بەهۆی قەیرانی داراییەوە کارەکان وەستاون.
گەڕەکی تەعجیل، یادگارییە تاڵ و شیرینەکانی سەردەمی منداڵیی کاوەیە، کە لەگەڵ 11 کەسی خێزانەکەی نیو سەدە لەو گەڕەکە ژیاوە، کار و کەسابەتیشیان تا ئێستا هەر لە نزیکی ئەو گەڕەکەیە، ئەو دڵتەنگە بەوەی گەڕەکی تەعجیل و عارەب و خانەقا بەردەوام مەترسیی لەناوچوونی لەسەرە و نۆژەن ناکرێنەوە، هەندێک کەسیش کەلوپەلی خانووەکان دەبەن و دەیفرۆشن.
کاوە مستەفا، دانیشتووی گەڕەکی تەعجیل بووە، ئاماژەی بەوە کرد، لە سەشتەکانی سەدەی ڕابردووەوە له و گەڕەکە ژیاوم، ئەوانەی وەکو من لەم گەڕەکە ژیان و بۆ بینینی یادگارییەکانی منداڵی دێنەوە و ئەم دیمەنە دەبینن، فرمێسک لە چاوەکانیان ناوەستێت، ئەوەی دێت، تەنیا خەم لە دیمەنەکە دەخوات و دەڕوات.
حکومەت قەرەبووی خاوەن خانوو و کرێنشینەکانیشی کرد، بە مەبەستی چۆڵکردن و نۆژەنکردنەوەی گەڕەکەکان، بەڵام چەند ساڵێکە کارەکان ڕاگیراون، تا ئێستاش هەندێک هاووڵاتی تێیدا دەژین و هەندێک شوێنیش کراوە بە کۆگا و گەراجی وەستانی ئۆتۆمبێل.
هێمن قادر، جێگری پارێزگاری هەولێر گوتی: لە ماستەرپلانی شاری هەولێر ئاماژەی پێکراوە، لە پارێزگای هەولێر لیژنەیەکمان هەیە، سەرپەرشتی ئه و شوێنانە دەکات، لەدوای درووستبوونی قەیرانی دارایی لە ساڵی 2014ەوە، کاری لیژنەکە سست بووە.
گەڕەکەکانی خانەقا و تەعجیل و عارەبان مێژووییەکی گرنگی شاری هەولێرن و هەموو پێکهاتەکانی هەولێر تێیدا ژیاون، بەتایبەتی جووەکان، پارێزگاریکردن لەم گەڕەکانە مێژووی پێکەوەژیانی سەدان ساڵەی ئەم شارە دەپارێزێت، بەڵام تا ئێستا ئەم گەڕەکانە بێناز ماونەتەوە.[1]