ئەڤرۆ:
هەتا نوکە ئالیێن سیاسی یێن کوردستانی نەگەهشتینە رێککەفتنێ ل سەر نڤیسینا دستوورێ هەرێما کوردستانێ کو پێدڤیەکا حوکمرانیێ یە ل هەرێمێ، بسپۆرێن دستووری ژی دبێژن، دستوور دێ بیتە ئەگەرێ یەکخستن و ب هێزکرنا پێگەهێ هەرێما کوردستانێ.
د. نەجیبە ئیبراهیم، بسپۆرا قانوونا دستووری بۆ رۆژناما (ئەڤرۆ) گوت” هەبوونا دستووری و سەروەریا دستووری بۆ دەولەتەکێ یان هەرێمەکێ کاکلکا سیستەمێ قانوونی یێ دەولەتێ یە، ژ بەر کو دستوور پەیوەندیێن د ناڤبەرا دەولەتێ و وەلاتیان دا دیار دکەت و د ناڤبەرا دەولەتێ و سیستەمێ قانوونا نێڤدەولەتی دیار دکەت مەبەست ژێ ئەوە رێنمایێن بنەرەتی یێن بلند کو شێوێ دەولەتێ و سیستەمێ حوکمرانیێ و رێیێن چاوانیا پێکئینانا دەستهەلاتێن دەستهەلاتداران دیار دکەت هەروەسا ئەڤ رێنمایە روهنکرنێ ددەن ل سەر چاوانیا چەسپاندنا دەستهەلاتێ و چاوانیا بکارئینانا وێ زێدەبارێ ورۆهنکرنێ ل سەر تاکان و ئازادیێن وان”.
دیارکر ژی” دستوور وەکو قانوونا بنەرەتیە و چارچۆڤێ سیاسی و جڤاکی و ئابووری ددانیت و تاکە لایەنە کو دەستهەلاتان دیار دکەت و پێدڤیە ئه و دەستهەلات رێزێ ل دستووری بگرن چونکە ئه و پشتەڤانیا شەرعیەتا وان دکەت”.
وێ بسپۆرا قانوونا دستووری خویاکر” دستوور دشێت رێکارێن حوکمرانیێ رێکبێخیت بەلێ دڤێت نەهیچتە ڤەشارتن ئەم یێن ل هەرێمەکێ دژین کو ل دەڤەرا رۆژهەلاتا ناڤینە کو دشێین بێژین زێدەتر هێز رێکارێن حوکمرانیێ دکەت”.
زێدەتر دبێژیت” ئه و ب خوە دستوور پەیوەندیێن نێڤدەولەتی و هەرێمی رێک دئێخیت ژبەر وێ چەندێ دستووری سەروەریا رەها یا هەی بەلێ سەبارەت هەرێما کوردستانێ و ئیراق ژی دگەلدا یێن کەفتینە دناڤ چارچۆڤەکێ هەرێمی و ڤێ چەندێ وەکریە هندەک ئالی ل بن کاریگەریا وەلاتێن هەڤسنوور بن کو پەیوەندیێن وان زێدەتر ب رێیا حزبان بن” .
ناڤبریێ ئاماژەکر ژی کو هەبوونا دستووری دێ گەلەک کێشێن هەرێما کوردستانێ چارەسەرکەت و دێ بیتە هۆکار بۆ ئێکرێزیا کوردان و ب دەستڤەئینانا سەقامگیریێ ژبەرکو دستوور پێدڤیەکا نیشتمانیە بۆ ئێکرێزیا ئالیێن سیاسی.[1]