مەیێ بۆ لام
بۆ بەهارەی کچم
لە کتێبی: #قەڵای ڕاز#
بەرهەمی: #ژیلا حسێنی# (1964-1996)
نا، نامەوێ تۆ بێی بۆ لام
هەرچەن وڵاتیش تاریکە و بەبێ چرام
بیرم کردووی و خەمبارم
بەقەد باڵای ئەوینیشت
دڵ پڕ لە خۆزگە و لە هیوام
بەڵام نا، نامەوێ تۆ بێیت
تۆ ناتوانی لای من بژیت
زستانی من دوایی نایەت
تۆش بەهاریت
دەستەکانت لە گۆ ئەچن
تاقە هەناسەیەکی گەرمیش شک نابەم
بیکەم بە پێشکەشی باڵات.
تۆ بەهاری
تۆ ناتوانی لای من بژیت
نا، نامەوێ، تۆ بۆ لام بێیت.
1994-03-09
[1]