شەوبەڼ یام پەچە و مەقنەع کەلتوورێ مروڤەکا وېشانە، بەرهەموو ژیوای و ژیوگەیشانە. کەلتوورو عورف و عادەتیچ گەر ناشیرین نەبۊ، چەنی دینی کېشەش نیەن.
تۊ واچی ئېمە جە زاناو مەڵڵا ئایینیە وەڵینەکاما خاستەر جە دینی یاوێبیمېنە؟ گەر لاکەرمێ پەی ویەردەیما جە هۆرامان و کوردەوارینە بە هیچ تەحرێ نە شەوبەڼ نە پەچە و مەقنەع نمەوینمۍ. ژەنیما بە ئەوپەڕو نەجابەتی و سەنگینیۆ چەنی پیای کارش کەردەن و هەرەوەزیش کەردەن، جلۍ وېمانۍ هەم ئاڎەمیانۍ و هەم شەرعیۍ.
خۊ گەر ژەنێ ڕوومەتش پۊژنابۊرە، دلۍ خەڵکینە نامۊ بېیېنە.
مەڵڵا مستەفاو بېسارانی وەختێ وەشەویسەکېش مەوینۊ هەکە شەوبەڼش کەردەن و چەمېش پۊژنێنېرە، پېسە دەماوەندی خەم و تەم ملشەرە مجیان، ناحەقیچش نەبیەن، چونکم هەم کارێ نامۊ ق هەم بۍ بەشەن جە پەیکان و موژانیش پەی بەردەوامی ناسۊری زامەکاش. بېسارانی چەنەش مەپەرسۊ، چ کارێش کەردەن؟ مەگەر تووشوو نەوەشی یا ئېشێ بېیېنۍ پاسە پۊژنێنېتەرە؟
واتش نەخێر، ئېش نیەن، بەڵکم دیڎۍ من بۍ ڕەحمېنۍ، ۋن مجېنۍ، دڵ و ڕاویارا مەپېکان، ئەر پېسە جارا مەرەخەسېشان کەروون، ئانە هیچ ڕاویارێ بە سڵامەتی بەرنمەشۊن. ئیتر بېسارانیچ زاناش مەعشووقەکېش هەقش بە دەسەن، دیڎۍ و چەمانش بە ئەنقەس بەستەن.
ئارۊ خەمانم چوون دەماوەند بۍ
دیڎەی قیبلەی وېم، بەندی شەوبەند بۍ
واتم ئەی قیبلەم ئیمان و دینم
من بە دیڎەی تۊ، دنیا مەوینم
مەر نەئیشەڵڵا ئېشێ ها تېشدا
پەوکەی شەوبەندت ئاوەردەن پېشدا
واتش بۍ ڕامەن، وە شەڕ شەریکەن
هوونینی، دەردین، ڕاوییار پەیکەن
ئەر مەرەخەس بۊ چوون هەردە جاران
دەییار نمازۊ جە ڕاویاران
منیچ جەو بۊنە مەحبووسم کەردەن
هوونی ناحەقم نەیۊ وە گەردەن
سا زانام ئاخر هەقش بە دەستەن
ڕاویار کۊشەن، ئەنقەسش بەستەن.
[1]