باخچێوە بېگەرد
نویستەی: میرزا ئۆلقاڎرو پاوەی
بەشۍ پەنجەمە

میرزا ئۆلقاڎر باس جە سەرەتاو وەشکەردەی بەهەشتی کەرۊن،
نیعمەتەکا دلۍ بەهەشتی باس کەرۊن:
گیۋاۋش زەعفەران، خاکش شەکەرەن، سەنگش مرواری، دانەی گۆهەرەن، پەڕەن دار و درەخت، گوڵ و گوڵزار، تەیر و تیور، هەرچیت گەرەکەن ئینا وەردەمتەنە.
کەریمی کارساز، بۍمیسل و نەزیر
پادشای عادل تەنیای بۍ وەزیر
جە شەش دانگ نووری، موستەفای سەروەر
یەک دانگ جیاکەرد، دانای دادگەر
کەردش وە بەهەشت، وە قەسر و قسوور
وە ڕېزوانی پاک، غوڵمنان و حوور
گیاش زەعفەران، خاکش شەکەرەن
سەنگش مرواری، دانەی گەوهەرەن
گوڵەن، گوڵزارەن، ڕۊحەن، ڕېحانەن
لەعلەن، یاقووتەن، دوڕ و مەرجانەن
نەخڵەن، ڕوممانەن، میوە سەڎ ڕەنگەن
زەیتوون و توففاح، تازە قەشەنگەن
نوقڵەن، نەباتەن، شەکەرەن شیرین
عوودەن، کافوورەن، عەترەن، عەنبەرین
فەسڵش دایېم وەقت، نەو وەهارانەن
سۊزە هەواش، فەرش، بەزمی یارانەن
شەرابەن، تەهوور، بادە، موففەسەل
شیرە و شەربەت، پاڵودەی، عەسەل
حەوزش کەوسەرەن، جۊگەش سەلسەبیل
باغش، جەننەتەن، ئوستاد جوبرەئیل
قەسرش خشتی زەڕ، خشتی جەسیمەن
بادە، عەتری عوود، باخچەی نەعیمەن
لیباسش فاخر، دیبای قەشەنگەن
حوللەی ئەلوانات، سەڎ هەزار ڕەنگەن
گیاش لەزیزەن، تەعمش وەش تامەن
زرووفی جەواهیر، ئاینەی جامەن
حەقق، لەزایزات، ئاماڎە کەردەن
وە لەحمی تەییر، سوگەندش واردەن
پەی ئەهلی بەهەشت، پاکی بېتاوان
تەشتەهیڼەفس، حەقق، وېش فەرماوان
نەفس، پەی هەر ئەشېیا، ئیشتەها مەکەرد
فەوری خزمەتکار، پەرېش ماوەرد
ئارەزووی هەرچی، باوەرۊ نە دڵ
وە پای وېش، مەیۊ، پەی ئەو، وە مەنزڵ
موختەسەر هەرکەس، خوڎا پېدادەن
ئیمانش کامڵ، کارش ئاماڎەن
بېشک، جەڼەتولمەئوا، جاش مەبۊ
دایېم، پای تەجیر، تەکیەگاش مەبۊ.
[1]