باخچێوە بېگەرد
نویستەی: میرزا ئۆلقاڎرو پاوەی
بەشۍ هەشتەمە

میرزا ئۆلقاڎر باس جە یەکەم ڕۊ خەلق بیەو ئینسانی کەرۊن(ڕۊ ئەلەستی): خالق تەمامو ئەرواحەکاش خەلقۍ کەردۍ، پېسە شارە مرۊچا ورد ورد جووڵیېنۍ، خالق پەرساش وەنەشان: من مەعبوودو شمەنان؟ ئەرواحەکی بیۍ بە دوۍ باڵۍ، یام دوۍ فیرقۍ، بەعزێشان واتشان (بەلا)، باعزەکەی تەرشان واتشان (نەعەم)، ئیتر ئەچا وەختۆ فیرقەو ئیماندارا و بۍ ئیمانا جیێ بیێ.
دارای جیهان دار، سەتتاری مەعبوود
خالیقی مەخلووق، واجیبە لوجوود
مەیل کەرد، بسازۊ، دنیای پەڕ مەلاڵ
ئەوەڵ، چوون عەرووس، ئاخر، پیرە زاڵ
نە چەرخی چوارەم، واقیعەن، یەک دەشت
تەمامی موفرح، جە قاپی بەهەشت
وە قەولی ڕاوی، یەک پارچە لاڵەن
ڕاگە، درازیش، سێ هەزار ساڵەن
ڕۊحی مەخلووقات، ئینس و جان، یەکسەر
وە ئەمری بۍ چوون، دەهەندی داوەر
ئەرواحی جانی، ئەولادی ئادەم
جە ئەوەڵ قەدەم، تا یەومولعەدەم
نەوجا، نە حوزوور، جەماجم، جەم وەرد
وە یەدی قوددرەت، تەمام زیڼڎە کەرد
وېنەی مووریچەی، زەعیفی بۍ نوور
جووڵیان کەم کەم، نمانان جۊر جۊر
حەقق پەرسا، لېشان، جە ڕووی ئیلتیفات
چەو دەم(الست و بربکم) وات:
یانی، ئایا من، مەعبوودی ئێوەم
هەرچەن بۍ جیسم و بۍ شەبهو شېوەم
جوملە ئەڕواح بی، دوو فیرقە جەو دەم
باعزێ وات؛ بەلا، بەعزێ وات؛ نەعەم
مەوقیف کەرد، مەتڵەب، یانی های ئەلەخ
بەلا، پەی بەهەشت، نەعەم پەی دۊزەخ
هەر ئەو ڕۊ واحید، تاکی تەنیای فەرد
موئمن و کافر، یەکسەر، جیاکەرد
دەرسات، دوو مەنزڵ، شەهەنشای فەتاح
قەراردا، جە غەیب، پەی جەمعی ئەڕواح
یەکێ، عوللیین، قەریب، وە ڕیزوان
یەکێ، سنجیین، بە دۊزەخ عەیان
دوو فیرقە ئەڕواح، شاد و پەرېشان
تا شین، وە ماوای مەنزڵگەی وېشان
نەوجاگە ساکن تا چەند هەزار ساڵ
تا کە بزانین، زاتی بۍ زەواڵ
تەقدریش، چېشەن، مەیلش کام نەردەن
ئیرادەی سازنای، کام سنعەت کەردەن.[1]