داستانو حەیدەری و سنۊبەرۍ
بەشۍ پەنجەمە
داستانەکۍ چېگۆ دەس پەنەکەرۊن، حەیدەری هەرزەکار و دڵدار داواش کەرد شا عەباسی ڕۊخسەتش پەنە بدۊن پەی ڕاوەشکاری، ئاڎییچ ڕازی بیی و یەرۍ هەزار سوارېش وست شۊنی بە نیازو ڕاوەر ئاهووی کشمیرۍ، ئیتر حەیدەر فەرمانو جمارەیش دا.
شەهەنشای عالەم، وە ئەسڵش زانا
دایېم وە فەرزەند، دڵبەندش وانا
جە یومنی ئەڵاف، عەبباسی سانی
بیی وە باشقەی جەرگەی ئېرانی
یەک ڕۊ، کەفت نە خاک، جە لای شەهریار
ڕۊخسەت، تەڵەب کەرد، بە عەزمی شکار
عەبباسی سانی، جە ڕووی شەفەقەت
بە عەزمی نەخچیر، پەنەشدا ڕۊخسەت
فەرما وە نازر، نەوەی نامدار
سەلاح دان، پەرێش، سێ هەزار سوار
ئەساسەی شکار، کەردشان تەمام
بەردەن، پەرێش ئەسپ، مەرسەعی لەجام
پا، نییا، وە ڕەخش، ئەولادی دارا
پەی قەسدی قاتڵ، جەیرانی سارا
بە عەشق و نیشات، جە شار شیی وە بەر
بە عەزمی شکار، ئاهوورانی بەر
ڕوو نیا نە دەشت، نەتیجەی دارا
مەکەردش سەیران، گوڵگەشتی سارا
ناڵەی موتریبان، کزەی موکەشان
مەویەرا، نە چەرخ، سەما و کەهکەشان
ئاڵای خەمزەی خاس، ساقی سیامەت
بادە مەبەخشان، بە مەستانی مەست
مەنۊشان، بە شاڎ، پەی پەی جامی مەی
بە یادی دەوران، کەیکاوسی کەی
سەروەش مەگېڵان، نەو دەشت و دەردا
دین، چن جەیرانێ، ئامان وە سەردا
مەرسی تازەبان، کېشا وە لېشان
تا چەند جەیرانێ، بگېران لېشان
فیقە بەستشان، ڕوو نیان بە ڕا
هەی کەرد، پەرېشان، حەیدەر وېنەی با
مەهمېز دا سەمەند ، دەوەندەی ڕەهوار
نە شۊفی ئاهووی، چە دیڎەی تەتار.[1]