داستانو حەیدەری و سنۊبەرۍ
بەشۍ هەشتەمە
حەیدەر بەردەوامەن جە تاریفدای شەمعەو دلۍ سیاماڵەکۍ، وېناش کەرۊن بە گردو جوانیەکان، زڵېخا و عوزرا، لەیلۍ و شیرینەو ئەرمەنی، گردشان سەرسامېنۍ بە دیمەن و ڕوخساری گوڵئاسایش، بە زوڵفانی نەرم و کاڵش، بە لیموانی بېگەرد نە باخی سینەش.
لەیلێ گەردەن کەچ، پای زوڵفی زەردش
زڵېخا سەرسام، لیمۊی بېگەردش
سەمەنبەر، مایېل، زەردی گەردەنش
جان ئەفرۊز بۍ هۊش، نیگا کەردەنش
شاخنەبات، شاگرد، بە لەنجەولارش
عوزرا، هەم سەرسام، دیڎەی خومارش
حەیدەر بەگ، سەرسام بەژنی باڵاش بۍ
گرفتار، خەمین، خاڵی ئاڵاش بۍ
ناگاه جە ڕووی ئەسپ، کېشا ئاهی سەرد
ئاهش، جە سەما، زیاتەر ویەرد
نەزەر ۋست وەلا، ئەو ماهی پارە
دیش، کە جوانێ، مدران، سوارە
زەریف، نازار، شیرین، سوارەن
موکەممەل بوراق، تەمام تەیارەن
عومری جوانیش، بە بیست نەیاوان
تازە وەنەوشەی، خەتش شکاوان
بەیازیی کەردەن، نە سای زوڵفی دېز
مەنمانۊ، بە تەرح، سوبحی سادق خېز
باڵاش چوون نەو توول، ڕاژەی خەسرەویی
شان و شەوکەت خاس، بازووی پالەوی
سوارەن بە ئەسپ، مەرسەعی لەجام
مدران سوارێ، شیرینتەر جە سام
ماچی یوسفەن، جە کەنعان ئامان
یا بەدری کامڵ، بەینی نەمامان
سەرسامەن نە شەوق ساوای سەرهەندە
مەدیا، چوون شاهەن، شای گەڵدەوکەندە.[1]